28 C
Phnom Penh

អ៊ុយក្រែន​ចោទ​រុស្ស៊ី​ប្រព្រឹត្ត​អំពើ​ប្រល័យ​ពូជសាសន៍ ខណៈ​រក​ឃើញ​សាកសព​ជនស៊ីវិល​៤១០​នាក់​ក្បែរ​ក្រុង​គៀវ

ដោយ ឌឹ ខេមបូឌា ដេលី

បទវិភាគ

ប្រធានាធិបតី​អ៊ុយក្រែន លោក Volodymyr Zelenskiy បាន​ចោទ​កងទ័ព​រុស្ស៊ី​ពី​បទ​ប្រល័យ​ពូជសាសន៍ បន្ទាប់ពី​ជន​ស៊ីវិល ៤១០​នាក់​បាន​ស្លាប់​តាម​ដងផ្លូវ​ក្រោម​គ្រាប់កាំភ្លើង​របស់​រុស្ស៊ី។ មនុស្ស​ទាំងនេះ​ស្លាប់​នៅ​ក្នុង​ភូមិ​របស់​ពួកគេ​នៅ​ទីក្រុង​តូចៗ​មួយ​ចំនួន​នៅ​ក្បែរ​រដ្ឋធានី​គៀវ ដែល​ចម្ងាយ​ជា ៧០​គីឡូម៉ែត្រ គឺ​ក្រុង Bucha និង​ទីក្រុង​ពីរ​ទៀត។

ទីភ្នាក់ងារ​សារព័ត៌មាន Reuters បាន​ធ្វើ​សេចក្តី​រាយការណ៍​មក​ថា រដ្ឋអាជ្ញា​ជាន់ខ្ពស់​ប្រទេស​អ៊ុយក្រែន បាន​រក​ឃើញ​សាកសព​ស្លាប់​ទាំងនោះ​ត្រូវ​គ្រាប់កាំភ្លើង​ដោយ​បាញ់​ចំ​ក្បាល និង​មាន​ចង​ដៃ​ទៀត​ផង។

អ្នកស្រី អ៊ីរីណា វែននីឌី-តូវ៉ា (Iryna Venedyktova) ជា​អគ្គ​រដ្ឋអាជ្ញា​អ៊ុយក្រែន ដែល​ដឹកនាំ​ការ​ប្រមូល​ភស្តុតាង បញ្ជាក់​ថា នេះ​ជា​អំពើ​ឧក្រិដ្ឋកម្ម​សង្គ្រាម​ដែល​ប្រព្រឹត្ត​ដោយ​កងទ័ព​រុស្ស៊ី។

ក្រុង Bucha ជា​ក្រុង​មួយ​ក្បែរ​ទីក្រុង​គៀវ ដែល​ទ័ព​រុស្ស៊ី​បាន​ដកថយ​ចេញ និង​ក្រុង​មួយ​ចំនួន​ទៀត​នៅ​ប៉ែក​ខាងជើង​ទីក្រុង​គៀវ ដែល​មាន​មនុស្ស​ដេក​ស្លាប់​យ៉ាង​រណេករណូក​តាម​ដងផ្លូវ។

ប្រធានាធិបតី Volodymyr Zelenskiy ចោទប្រកាន់​ថា រុស្ស៊ី​បាន​ប្រព្រឹត្ត​អំពើ​ឧក្រិដ្ឋកម្ម​ប្រល័យ​ពូជសាសន៍​មក​លើ​ពលរដ្ឋ​អ៊ុយក្រែន។

ក្នុង​បទសម្ភាសន៍​ជាមួយ​ទូរទស្សន៍​អាមេរិក CBS មេដឹកនាំ​អ៊ុយក្រែន Zelenskiy ថា​ប្រជាជន​ក្នុង​ប្រទេស​របស់​លោក​មាន​សញ្ជាតិ​ចម្រុះ​ជាតិ​សាសន៍​ដល់​ជាង ១០០​សញ្ជាតិ។ លោក​បញ្ជាក់​ថា ការ​កាប់​សម្លាប់​ពលរដ្ឋ​ទាំងនេះ​ពី​សំណាក់​កងទ័ព​រុស្ស៊ី គឺជា​ការ​កម្ទេច​ជាតិ​សាសន៍​លើ​ពិភពលោក ដែល​នេះ​ហើយ​គឺជា​អំពើ​ឧក្រិដ្ឋកម្ម​ប្រល័យ​ពូជសាសន៍​ដែល​ប្រធានាធិបតី​រុស្ស៊ី ត្រូវតែ​ទទួល​ខុសត្រូវ។

ក្រុម​រដ្ឋអាជ្ញា​នៃ​ប្រទេស​អ៊ុយក្រែន អះអាង​ថា ស្ថានភាព​សម្លាប់​ជនស៊ីវិល​ដូច​នេះ​មាន​ផង​ដែរ​នៅ​ទីក្រុង​ចំនួន​ពីរ​ទៀត​នៅ​ក្បែរ​រដ្ឋធានី​គៀវ គឺ​ក្រុង Irpin និង Hostomel។ ក្រុម​រដ្ឋអាជ្ញា​បាន​រក​ឃើញ​សាកសព​ទាំងនោះ​កាលពី​ថ្ងៃ​អាទិត្យ គឺ​ភ្លាមៗ​បន្ទាប់ពី​កងទ័ព​រុស្ស៊ី​ដក​ចេញពី​ទីនោះ។

រដ្ឋមន្ត្រី​ក្រសួង​មហាផ្ទៃ​ប្រទេស​អ៊ុយក្រែន លោក ឌែនស៍ មូណាស្ទីស្គី (Denys Monastyrskiy) និយាយ​ថា ជនស៊ីវិល​ទាំងនោះ​ស្លាប់​ភាគច្រើន​ត្រូវ​បាន​បាញ់​ចំ​ក្បាល និង​មាន​ចំណង​ចង​ជាប់​នឹង​ដៃ​ពួកគេ​ទៀត​ផង។

លោក​ប្រធានាធិបតី​អ៊ុយក្រែន Volodymyr Zelenskiy បាន​ប្រាប់​ទៅ​លោក ពូទីន ថា ព្រោះ​តែ​ការ​សម្លាប់​រង្គាល​ដូច​នេះ​ហើយ ទើប​លោក​ទាមទារ​ឱ្យ​រុស្ស៊ី ដក​ទ័ព​ទាំងអស់​ចេញពី​ទឹកដី​អ៊ុយក្រែន។ លោក​បន្ត​ថា សង្គ្រាម​នៅតែ​បន្ត​ឲ្យ​ជនស៊ីវិល​ស្លាប់​យ៉ាង​រង្គាល។ តែ​បែប​នេះ​ក្ដី រដ្ឋាភិបាល​រុស្ស៊ី បាន​ទាត់​ចោល​ការ​ចោទ​មក​លើ​កងទ័ព​រុស្ស៊ី​ថា​មាន​ការ​ជាប់​ពាក់ព័ន្ធ​នឹង​ការ​ស្លាប់​ជនស៊ីវិល​នោះ។

អំពើ​សម្លាប់​រង្គាល​នេះ​មាន​នៅ​លើ​ទីក្រុង​កំពង់ផែ ម៉ារីយូប៉ូល ផង​ដែរ។ បើ​តាម​កងទ័ព​អ៊ុយក្រែន ជនស៊ីវិល​ស្លាប់​ក្រោម​គ្រាប់កាំភ្លើង​របស់​កងទ័ព​រុស្ស៊ី មាន​ចំនួន​ជាង ៥​ពាន់​នាក់​ក្នុង​ទីក្រុង Mariapul។ ចំណែក​អង្គការ​សិទ្ធិមនុស្ស​របស់​អង្គការ​សហប្រជាជាតិ បាន​រក​ឃើញ​រណ្ដៅ​រួម​មួយ​មាន​សាកសព​ដល់​ជាង ១​ពាន់​នាក់ (១០៨១​នាក់)។

ប្រធាន​ស្នងការ​សិទ្ធិមនុស្ស អ្នកស្រី Michelle Bachelet ទទូច​ឲ្យ​រុស្ស៊ី បញ្ចប់​សង្គ្រាម ព្រោះ​ដែនដី​អ៊ុយក្រែន បាន​ក្លាយជា​វាល​ពិឃាត​មនុស្ស​ហើយ​នៅ​ពេល​នេះ។ អ្នកស្រី​បន្ត​ថ្កោលទោស​ចំពោះ​ដំណឹង​ដែល​ថា​ជនស៊ីវិល​បន្ត​ស្លាប់​យ៉ាង​រង្គាល។

ចំពោះ​ប្រទេស​អង់គ្លេស គឺ​រដ្ឋមន្ត្រី​ការបរទេស​អង់គ្លេស Liz Truss បាន​ទាមទារ​ឲ្យ​តុលាការ​ព្រហ្មទណ្ឌ​អន្តរជាតិ ICC បើក​ការ​ស៊ើបអង្កេត​ចំពោះ​បទល្មើស​ឧក្រិដ្ឋកម្ម​សង្គ្រាម។ ជាមួយ​គ្នា​នេះ រដ្ឋមន្ត្រី​ការបរទេស​អាមេរិក Antony Blinken បាន​ហៅ​អំពើ​របស់​ទ័ព​រុស្ស៊ី​នៅ​អ៊ុយក្រែន ថា​ជា​ឧក្រិដ្ឋកម្ម​ប្រឆាំង​មនុស្ស​ជាតិ និង​ចាត់ទុក​ថា​ជា​ឧក្រិដ្ឋកម្ម​ប្រល័យ​ពូជសាសន៍។

ចំណែក​ប្រធានាធិបតី​បារាំង លោក Emmanuel Macron ដែល​បាន​ឃើញ​រូបភាព​ដ៏​តក់ស្លុត អះអាង​ថា បារាំង​មិន​អាច​ទទួល​យក​បាន​ជាដាច់ខាត​នូវ​អំពើ​ព្រៃផ្សៃ​នេះ។ លោក​ស្នើ​ទៅ​រុស្ស៊ី ថា​ត្រូវតែ​ទទួល​ខុសត្រូវ​ចំពោះ​បទល្មើស​ឧក្រិដ្ឋ​ដែល​រុស្ស៊ី​បាន​ប្រព្រឹត្ត។

ដោយឡែក​ប្រធាន​ក្រុមប្រឹក្សា​សហភាព​អឺរ៉ុប លោក Charles Michel ក៏​បាន​សម្ដែង​ភាព​តក់ស្លុត​ចំពោះ​រូបភាព​ដ៏​ឃោរឃៅ​ដែល​កងទ័ព​រុស្ស៊ី​បាន​បង្ក​ឡើង។ លោក​ប្រាប់​ថា សហភាព​អឺរ៉ុប និង​អង្គការ​សង្គម​ស៊ីវិល នឹង​ប្រមូល​ភស្តុតាង​ប្តឹង​រុស្ស៊ី​ទៅ​តុលាការ​អន្តរជាតិ ICC។

ទាក់ទិន​នឹង​ភាព​ឃោរឃៅ​ដោយ​សង្គ្រាម​ឈ្លានពាន​នេះ លោក​ប្រធានាធិបតី ចូ បៃដិន បាន​ផ្ដើម​មុខ​គេ​ដោយ​បាន​ហៅ​លោក​ប្រធានាធិបតី​រុស្ស៊ី ពូទីន ថា​ជា​ឧក្រិដ្ឋជន​សង្គ្រាម។

យ៉ាងណា​ចំពោះ​សំណើ​របស់​លោក​ប្រធានាធិបតី​អ៊ុយក្រែន Zelenskiy ដែល​សុំ​ជួប​ផ្ទាល់​លោក​ប្រធានាធិបតី​រុស្ស៊ី វ៉្លាឌីមៀរ ពូទីន ត្រូវ​បាន​ទាត់ចោល។ ប្រធាន​ក្រុម​ចរចា​របស់​ភាគី​រុស្ស៊ី លោក Vladimir Medinsky បាន​បញ្ជាក់​នៅ​ក្នុង​បណ្ដាញ​សង្គម Telegram ថា លោក ពូទីន មិន​មាន​បំណង​ជួប​លោក Zelenskiy ទេ បើ​ការ​ចរចា និង​លក្ខខណ្ឌ​របស់​រុស្ស៊ី ដែល​ទាមទារ​ឱ្យ​អ៊ុយក្រែន ទទួលស្គាល់​តំបន់​គ្រីមៀរ និង​តំបន់ Donbas ជា​ទឹកដី​រុស្ស៊ី មិន​ត្រូវ​បាន​ព្រមព្រៀង​នោះ គឺ​គ្មាន​ផ្លូវ​ជួប​គ្នា​រវាង​លោក ពូទីន និង​លោក Zelenskiy ឡើយ។ លោក​បាន​បញ្ជាក់​ថា ទាំង​តំបន់ Crimea និង Donbas នៅតែ​ជា​លក្ខខណ្ឌ​នៃ​ការ​ចរចា គឺ​មិន​អាច​ធ្វើ​ឱ្យ​រុស្ស៊ី​ផ្លាស់ប្ដូរ​ជំហរ​បាន​ឡើយ។

នៅ​ពេល​ការ​ចរចា​ឈាន​ដល់​ថ្ងៃ​ទី​២ នៅ​ក្នុង​ប្រទេស​តួកគី ដែល​បាន​ធ្វើឡើង​កាលពី​ថ្ងៃ​ទី​២៨-២៩ មីនា លោក​ប្រធានាធិបតី​អ៊ុយក្រែន Zelenskiy ដែល​ទំនង​បាន​ដឹង​ជា​មុន​អំពី​លក្ខខណ្ឌ​របស់​ភាគី​រុស្ស៊ី បាន​ប្រកាស​ឲ្យ​កងទ័ព​ពង្រឹង​ស្មារតី​វាយ​ទប់ទល់​នឹង​កងទ័ព​រុស្ស៊ី ដែល​ប្រមូល​កម្លាំង​ទៅកាន់​តំបន់ Donbas នៅ​ភាគ​ខាងកើត​ប្រទេស។ លោក​ថា រុស្ស៊ី​មាន​ផែនការ​វាយ​យក​តំបន់​នេះ ហើយ​បង្កើត​រដ្ឋអំណាច​របស់​ខ្លួន​តាមរយៈ​ការ​ពុះ​ទឹកដី​អ៊ុយក្រែន​ជា​ពីរ​ឲ្យ​ដូច​កូរ៉េខាងជើង និង​ខាងត្បូង​សព្វថ្ងៃ​នេះ។ តែ​សម្រាប់​លោក Zelenskiy បាន​សច្ចា​មិន​ឱ្យ​ទឹកដី​អ៊ុយក្រែន បាត់​ទៅ​លើ​រុស្ស៊ី​ឡើយ។

លោក​ប្រធានាធិបតី​អ៊ុយក្រែន Zelenskiy សង្កត់​ធ្ងន់​ថា បើ​រូបលោក​នៅ​តែ​មាន​ជីវិត ដែនដី​អ៊ុយក្រែន​មិន​អាច​ជា​ថ្នូរ​ដើម្បី​សន្តិភាព​ពី​អ្នក​ឈ្លានពាន​ឡើយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស