ស្ថានទូតរុស្ស៊ីប្រចាំនៅកម្ពុជា បដិសេធមិនទទួលយកញត្តិរបស់សមាគមសម្ព័ន្ធនិស្សិតបញ្ញវន្តខ្មែរ និងសកម្មជនបរិស្ថាន ដែលអំពាវនាវឱ្យប្រធានាធិបតីរុស្ស៊ី លោក វ្ល៉ាឌីមៀរ ពូទីន (Vladimir Putin) បញ្ឈប់ការឈ្លានពានលើប្រទេសអ៊ុយក្រែន។
អង្គការសមាគមដែលធ្វើការលើវិស័យសិទ្ធិមនុស្ស និងបរិស្ថាន ដូចជាសមាគមសម្ព័ន្ធនិស្សិតបញ្ញវន្តខ្មែរ និងក្រុមយុវជនខ្មែរថាវរៈ ជាដើម បានដាក់ញត្តិរបស់ខ្លួនទៅកាន់ស្ថានទូតរុស្ស៊ី ប្រចាំក្នុងទីក្រុងភ្នំពេញ កាលពីថ្ងៃទី៤ ខែមេសា ឆ្នាំ២០២២ ថា ពួកគេស្នើសុំឱ្យរុស្ស៊ីស្ដារឡើងវិញនូវសន្តិភាពសម្រាប់ប្រទេសអ៊ុយក្រែន ដើម្បីចៀសវាងទណ្ឌកម្មរបស់ពិភពលោក និងបញ្ចៀសនូវការរំលោភលើដែនអធិបតេយ្យរបស់អ៊ុយក្រែន។
ថ្លែងនៅមុខស្ថានទូតរុស្ស៊ីនៅរាជធានីភ្នំពេញ នៅព្រឹកថ្ងៃអង្គារ ទី៥ មេសា សកម្មជនបរិស្ថាន លោក ថុន រដ្ឋា បានសម្ដែងការខកចិត្តចំពោះស្ថានទូតរុស្ស៊ី ដែលមិនទទួលញត្តិពួកគេ។ លោកថា ប្រព័ន្ធផ្សព្វផ្សាយនឹងនាំសាររបស់ពួកគាត់ទៅដល់ប្រធានាធិបតីរុស្ស៊ី លោក ពូទីន ឱ្យបានដឹងថា យុវជនខ្មែរក៏មិននៅស្ងៀមដែរក្នុងការទាមទារឱ្យប្រទេសរុស្ស៊ី បញ្ឈប់ការឈ្លានពាន និងវិលមករកការចរចាជាមួយប្រទេសអ៊ុយក្រែនវិញ។
ប្រភពដដែលលើកឡើងថា សង្គ្រាមឈ្លានពានរបស់រុស្ស៊ីលើអ៊ុយក្រែន ដែលបានផ្ទុះឡើងអស់រយៈពេលប្រមាណជិត ៤០ថ្ងៃមកនេះ បានសម្លាប់ជនស៊ីវិលស្លូតត្រង់ និងកងទ័ពអស់រាប់ម៉ឺននាក់។ ចំណែកវិបត្តិមនុស្សធម៌ វិបត្តិសេដ្ឋកិច្ច ដូចជាការកើនឡើងនូវតម្លៃប្រេងឥន្ធនៈ ជាដើម បានជះឥទ្ធិពលអាក្រក់យ៉ាងខ្លាំងដល់សេដ្ឋកិច្ចពិភពលោក ដែលធ្វើឱ្យប្រទេសខ្លះមានវិបត្តិសេដ្ឋកិច្ចធ្ងន់ធ្ងរដោយសារតែសង្គ្រាមនេះ។
សកម្មជនបរិស្ថាន លោក លី ចាន់ដារ៉ាវុធ បានថ្លែងថា ការដាក់ញត្តិនេះដើម្បីបង្ហាញការសាមគ្គីភាពជាមួយប្រទេសអ៊ុយក្រែន ដែលកំពុងរងការបំផ្លិចបំផ្លាញ។ លោកថា រុស្ស៊ីដាក់ទ័ពទៅលើប្រទេសមួយនេះ គឺជារឿងមិនត្រឹមត្រូវ ខុសច្បាប់អន្តរជាតិ និងអាចបង្កឱ្យមានអស្ថិរភាពនៅលើពិភពលោកថែមទៀត។
អង្គការសមាគមទាំងនោះត្អូញត្អែរថា ក្នុងនាមខ្លួនជាពលរដ្ឋដែលបានឆ្លងកាត់នូវសង្គ្រាមស៊ីវិលដ៏សែនជូរចត់ជិត ២ទសវត្ស បានស្គាល់យ៉ាងច្បាស់ពីទុក្ខវេទនារបស់ពលរដ្ឋអ៊ុយក្រែនដែលរងផលប៉ះពាល់ដោយសារសង្គ្រាម ជាពិសេសគឺការបាត់បង់សមាជិកគ្រួសារ បាត់បង់មនុស្សជាទីស្រឡាញ់ និងការរស់នៅក្រោមភាពភ័យខ្លាច ជាដើម។
កាលពីថ្ងៃទី២៤ ខែកុម្ភៈ ឆ្នាំ២០២២ ប្រធានាធិបតីរុស្ស៊ី លោក វ្ល៉ាឌីមៀរ ពូទីន (Vladimir Putin) បានប្រកាសបើកការវាយប្រហារលើប្រទេសអ៊ុយក្រែន ក្រោមហេតុផលថា ដើម្បីរំដោះអ៊ុយក្រែនពីរបបដឹកនាំបែបណាហ្ស៊ីសម័យថ្មី ដែលបានធ្វើបាបប្រជាជនអ៊ុយក្រែនសព្វថ្ងៃនេះ ហើយរុស្ស៊ីគ្មានបំណងឈ្លានពានអ៊ុយក្រែននោះទេ។
ក្រោយការប្រកាសឈ្លានពានរបស់រុស្ស៊ី មេដឹកនាំអ៊ុយក្រែន លោកប្រធានាធិបតី Volodymyr Zelenskiy បានដឹកនាំកម្លាំងយោធារបស់ខ្លួនប្រយុទ្ធតស៊ូជាមួយកងទ័ពរុស្ស៊ីយ៉ាងស្វិតស្វាញ ដែលធ្វើឱ្យរុស្ស៊ីមិនអាចដណ្តើមកាន់កាប់ក្រុងសំខាន់ៗរបស់អ៊ុយក្រែនបានសូម្បីតែមួយ។
យ៉ាងណាក៏ដោយ ក្នុងរយៈពេល ៤០ថ្ងៃមកនេះ ភាគីច្បាំងគ្នាទាំងពីរក៏បានសម្រេចទៅរកតុចរចាផងដែរ ដោយបានធ្វើឡើងចំនួន ៧លើករួចមកហើយ ប៉ុន្តែការចរចានេះត្រូវបរាជ័យទាំងអស់។
អ្នកនាំពាក្យគណបក្សកាន់អំណាច លោក សុខ ឥសាន បានលើកឡើងតាមបណ្ដាញសង្គមតេឡេក្រាមថា ទោះបីជាក្រុមនិស្សិតបញ្ញវន្តខ្មែរ សកម្មជនសិទ្ធិមនុស្សយកញត្តិដាក់ជូនទៅស្ថានទូតរុស្ស៊ី ដើម្បីស្នើបញ្ឈប់ការឈ្លានពានទៅលើប្រទេសអ៊ុយក្រែនក្តី ប៉ុន្តែលោកថាទំនងជារុស្ស៊ីមិនធ្វើតាមសំណើរបស់ពួកគេនោះទេ។ លោកបន្តថា កន្លងមកមានប្រទេសមហាអំណាចមួយចំនួនជួយអន្តរាគមន៍ដើម្បីបញ្ចប់សង្គ្រាមប្រទេសទាំងពីរ ប៉ុន្តែរុស្ស៊ីមិនធ្វើតាមឡើយ។
កាលពីចុងខែកុម្ភៈ ឆ្នាំ២០២២ រដ្ឋមន្ត្រីការបរទេសអាស៊ាន បានចេញសេចក្តីថ្លែងការណ៍របស់ខ្លួនស្ដីពីស្ថានភាពនៅប្រទេសអ៊ុយក្រែន ថា ខ្លួនមានការព្រួយបារម្ភយ៉ាងខ្លាំងចំពោះការវិវឌ្ឍនៃស្ថានការណ៍ និងការប៉ះទង្គិចអាវុធនៅប្រទេសអ៊ុយក្រែន ដូច្នេះដើម្បីរកដំណោះស្រាយដោយសន្តិវិធីទៅបាន មានតែអនុវត្តស្របតាមច្បាប់អន្តរជាតិ គោលការណ៍នៃធម្មនុញ្ញអង្គការសហប្រជាជាតិ និងសន្ធិសញ្ញាមិត្តភាពប៉ុណ្ណោះ៕