 បញ្ជាក់ជាថ្មីទៀតអំពីមូលហេតុដែលឈានទៅដល់ការលុបបញ្ជីបេក្ខជនឈរឈ្មោះជាមេឃុំចៅសង្កាត់ពីខាងគណបក្សភ្លើងទៀន នៅក្នុងសង្កាត់មួយចំនួនផ្អែកលើអង្គហេតុ និងអង្គច្បាប់រឹងមាំក្រោយពីមានការប្ដឹងតវ៉ា។){kind=link}
គណៈកម្មាធិការជាតិរៀបចំការបោះឆ្នោត (គ.ជ.ប) បញ្ជាក់ជាថ្មីទៀតអំពីមូលហេតុដែលឈានទៅដល់ការលុបបញ្ជីបេក្ខជនឈរឈ្មោះជាមេឃុំចៅសង្កាត់ពីខាងគណបក្សភ្លើងទៀន នៅក្នុងសង្កាត់មួយចំនួនផ្អែកលើអង្គហេតុ និងអង្គច្បាប់រឹងមាំក្រោយពីមានការប្ដឹងតវ៉ា។
ក្នុងសេចក្តីប្រកាសព័ត៌មានមួយចេញកាលពីថ្ងៃទី៤ ខែមេសា ឆ្នាំ២០២២ គណៈកម្មាធិការជាតិរៀបចំការបោះឆ្នោត បានបញ្ជាក់ថា ការលុបបញ្ជីឈ្មោះបេក្ខជនគណបក្សភ្លើងទៀន ដោយ គ.ជ.ប ផ្អែកលើអង្គហេតុ និងអង្គច្បាប់រឹងមាំ ហើយច្បាស់លាស់ ដោយមិនមែនចេះតែនឹកឃើញធ្វើទៅតាមអារម្មណ៍ ឬកាត់ក្តីដោយលម្អៀងផ្នែកនយោបាយនោះទេ។
បើតាមសេចក្តីប្រកាសព័ត៌មាន (គ.ជ.ប) ដដែល ស្ថាប័នជាតិរៀបចំការបោះឆ្នោតបានលើកយកមាត្រាមួយចំនួននៃច្បាប់ស្ដីពីការបោះឆ្នោតជ្រើសរើសក្រុមប្រឹក្សាឃុំ-សង្កាត់ និងអង្គហេតុ ព្រមទាំងរបាយការណ៍នៃការស្រាវជ្រាវ មកការពារពីការលុបបញ្ជីបេក្ខជននេះមកជាមួយផង។
ការបញ្ជាក់ជាថ្មីរបស់គណៈកម្មាធិការជាតិរៀបចំការបោះឆ្នោត ធ្វើឡើងឆ្លើយតបនឹងគណបក្សភ្លើងទៀន ដែលនៅតែបន្តប្រតិកម្មប្រឆាំងសេចក្តីសម្រេចរបស់ គ.ជ.ប ដែលបានលុបបញ្ជីបេក្ខជនឈរឈ្មោះជាមេឃុំចៅសង្កាត់ចេញ។
គិតមកដល់ពេលនេះ បេក្ខជនដែលឈរជាមេឃុំចៅសង្កាត់នៃគណបក្សភ្លើងទៀន ដែលត្រូវ គ.ជ.ប លុបចេញពីបញ្ជីបោះឆ្នោតនោះ មានចំនួន ២៩ឃុំ-សង្កាត់ ដែលនាំឱ្យគណបក្សក្រៅរដ្ឋាភិបាលមួយនេះនៅសល់បេក្ខជនមេឃុំចៅសង្កាត់ចំនួន ១៦២៣ឃុំ-សង្កាត់ ក្នុងចំណោមឃុំ-សង្កាត់សរុប ១៦៥២ឃុំ-សង្កាត់ ក្នុងក្របខ័ណ្ឌទូទាំងប្រទេស។
ទោះជាយ៉ាងណា បើតាម គ.ជ.ប បញ្ជាក់ថា ការសម្រេចលុបបញ្ជីបេក្ខជនគណបក្សភ្លើងទៀន បន្ទាប់ពីស្ថាប័នជាតិរៀបចំការបោះឆ្នោតរកឃើញថា គណបក្សនេះរើសបេក្ខជនមិនចេះទាំងអាន និងសរសេរអក្សរខ្មែរ ខណៈសាមីខ្លួនដែលត្រូវបក្សជ្រើសរើស គឺពុំបានដឹងខ្លួន ហើយក៏មិនមានឆន្ទៈឈរឈ្មោះជាបេក្ខជនមេឃុំចៅសង្កាត់ថែមទៀត។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ នេះ នឹងប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២ ដោយមានគណបក្សនយោបាយចំនួន ១៧ ចូលរួម ប៉ុន្តែក្នុងចំណោមគណបក្សទាំង ១៧ នោះ គឺមានតែគណបក្សប្រជាជនកម្ពុជាដែលដាក់បេក្ខភាពឈរឈ្មោះនៅទូទាំងប្រទេស ខណៈគណបក្សភ្លើងទៀន ដាក់បេក្ខភាពឈរឈ្មោះស្ទើរតែគ្រប់ទូទាំងប្រទេស៕