រដ្ឋាភិបាលចិន បានរាយការណ៍ថា មានករណីកូវីដថ្មីនៅក្រុង Shanghai ដោយរកឃើញជំងឺកូវីដថ្មីជាង ១ម៉ឺន ៣ពាន់ករណីកាលពីថ្ងៃទី៣ ខែមេសា។ ការផ្ទុះរីករាលដាលដ៏រហ័សនេះ ទើបកើតមានបន្ទាប់ពីចិនយកឈ្នះកូវីដ-១៩ ដែលផ្ទុះចេញពីក្រុងអ៊ូហាន ប្រទេសចិន កាលពីខែធ្នូ ឆ្នាំ២០១៩។
វីរុសកូរ៉ូណាឆ្នាំ២០១៩ ឬកូវីដ-១៩ គឺជាជំងឺឆ្លងដែលបង្កឡើងដោយវីរុសកូរ៉ូណា ជាជំងឺផ្លូវដង្ហើមស្រួចស្រាល់ធ្ងន់ធ្ងរ។ ជំងឺកូវីដ-១៩ ត្រូវបានគេរកឃើញដំបូងនៅក្នុងខែធ្នូ ឆ្នាំ២០១៩ នៅក្នុងទីក្រុងអ៊ូហាន នៃខេត្តហ៊ូប៉ី ប្រទេសចិន ហើយចាប់តាំងពីពេលនោះមក វាបានរីករាលដាលទៅជុំវិញពិភពលោក ហើយបន្តក្លាយជាជំងឺរាតត្បាតសកលបណ្ដាលឲ្យមនុស្សរាប់លានឆ្លង និងស្លាប់ជុំវិញពិភពលោក។
ឥឡូវនេះ ប្រទេសដែលជាប្រភពនៃការសាយភាយមេរោគជំងឺផ្លូវដង្ហើមដ៏ធ្ងន់ធ្ងរសម្លាប់មនុស្សពាសពេញពិភពលោកច្រើនលាននាក់ បានកំពុងផ្ទុះមេរោគថ្មីមួយទៀតដែលតាមទីភ្នាក់ងារសារព័ត៌មាន AFP រាយការណ៍ថា វាជាមេរោគបំប្លែងពីមេរោគ Omicron។
ក្នុងស្ថានភាពនេះ អាជ្ញាធរចិនបានសម្រេចចេញវិធានការបិទខ្ទប់ទាំងស្រុងនៅក្រុង Shanghai ដែលមានប្រជាជនប្រមាណ ២៥លាននាក់។ ក្នុងការបិទខ្ទប់នេះ អាជ្ញាធរចិន បានធ្វើតេស្ដមនុស្សដល់ទៅជាង ៧០% ក្នុងចំណោមមនុស្សចំនួន ២៥លាននាក់នៅក្រុង Shanghai។ តែយ៉ាងណា គណៈកម្មការជាតិសុខាភិបាលរបស់ប្រទេសចិន បានអះអាងថា ពុំមានអ្នកស្លាប់នោះទេក្នុងចំណោមអ្នកឆ្លងជាង ១ម៉ឺន ៣ពាន់នាក់នេះ។
កាលពីខែមីនា អ្នកស្រុកនៅក្រុង Shanghai សម្ដែងការព្រួយបារម្ភអំពីការផ្ទុះ និងការឆ្លងមេរោគផ្លូវដង្ហើមនេះ ដែលនាំឲ្យទីក្រុងមួយនេះបិទខ្ទប់ជាលើកដំបូងតាំងពីជាង ២ឆ្នាំមកនេះ។ ប៉ុន្តែជាការកត់សម្គាល់ អាជ្ញាធរក្រុងប៉េកាំង បានដាក់នូវវិធានការក្ដៅមួយដោយបិទការផ្សាយនូវដំណឹងអំពីការរីករាលដាលមេរោគនេះនៅលើបណ្ដាញសង្គម Weibo ប៉ុន្តែដំណឹងនេះមានការបង្ហោះរួចហើយដែលថាក្រុង Shanghai ផ្ទុះជំងឺឆ្លងមេរោគ Omicron។
ចិនជាប្រទេសកុម្មុយនីស្ត ដែលតែងតែលាក់ព័ត៌មាន ហើយតែងតែបញ្ចេញព័ត៌មានក្លែងក្លាយភូតកុហក ដូចករណីការផ្ទុះមេរោគកូវីដ-១៩ គឺចិនត្រូវបានគេចោទថាបានលាក់ព័ត៌មាន និងទិន្នន័យនៃចំនួនអ្នកឆ្លង និងអ្នកស្លាប់ ជាពិសេសនៅក្រុងអ៊ូហាន ដែលជាប្រភពទី១ នៃការផ្ទុះមេរោគកូរ៉ូណា ឬកូវីដ-១៩។
នៅក្រុង Shanghai អាជ្ញាធរក្រុងដែលទទួលបញ្ជាពីបក្សកុម្មុយនីស្តនៅក្រុងប៉េកាំង បានដាក់កំហិត និងចាត់វិធានការពិន័យទៅលើពលរដ្ឋណាដែលហ៊ានបង្ហោះសារ ហើយសរសេរថាក្រុង Shanghai កំពុងឆ្លងធ្ងន់ធ្ងរនូវការផ្ទុះជំងឺឆ្លងមេរោគ Omicron។
តែនៅទីបំផុត ព័ត៌មានទាំងនេះមិនអាចលាក់បានយូរនោះទេពីបណ្ដាញសង្គម និងអ្នកសារព័ត៌មាន។ អាជ្ញាធរនៅក្រុងប៉េកាំង បានប្រាប់ទៅអាជ្ញាធរក្រុង Shanghai បញ្ចេញព័ត៌មានអំពីការបិទខ្ទប់ទីក្រុងមួយនេះ ប៉ុន្តែការផ្សាយមានកម្រិត។ មកដល់ពេលនេះ ក្រុង Shanghai នៅបន្តបិទខ្ទប់នៅឡើយ។
កាលពីមិនទាន់ផ្ទុះជំងឺឆ្លងមេរោគ Omicron លោកប្រធានាធិបតី ស៊ី ជីនពីង បានអួតអាងប្រាប់ពិភពលោកថា ចិនបានយកឈ្នះនូវការឆ្លងមេរោគជំងឺផ្លូវដង្ហើមដ៏ស្រួចស្រាល់មួយនេះហើយ ខណៈប្រទេសផ្សេងៗទៀតកំពុងឆ្លងជាខ្លាំង។ ក្រោយពីទទួលដំណឹងថា ក្រុង Shanghai កំពុងផ្ទុះជំងឺនេះ លោក ស៊ី បានបង្គាប់ឱ្យប្រើជាបន្ទាន់នូវវិធានការសូន្យកូវីដ។
ការផ្ទុះជំងឺឆ្លងមេរោគ Omicron នៅក្រុង Shanghai ត្រូវបានរាយការណ៍មកថា វាបានឆ្លងពីអ្នកដំណើរមកពីក្រុងហុងកុង ដែលជាដែនដីរដ្ឋបាលស្វយ័តរបស់ក្រុងប៉េកាំង។
រលកឆ្លងរាលដាលកូវីដលើកទី៥ នៅហុងកុង គេបានរកឃើញអ្នកវិជ្ជមានប្រមាណ ៥ម៉ឺន ៤ពាន់នាក់។ ចំនួនដ៏ច្រើននេះ គឺច្រើនជាងកាលពី ២ឆ្នាំមុន ដែលមានតែ ១ម៉ឺន ២ពាន់នាក់នៅក្នុងដែនដីនេះ។
ជាមួយនឹងវិធានការបិទខ្ទប់ដ៏តឹងតែង បានធ្វើឱ្យដែនដីហុងកុង ត្រូវផ្ដាច់ខ្លួនពីគេឯង និងបានរងផលវិបាកផ្នែកសេដ្ឋកិច្ចយ៉ាងខ្លាំង។
ខណៈពិភពលោកកំពុងឆ្លងកូវីដ-១៩ ចិនជាអ្នកបញ្ចេញវ៉ាក់សាំងបង្ការជំងឺឆ្លងនេះមុនគេ។ វ៉ាក់សាំងរបស់ចិន មានពីរប្រភេទ គឺស៊ីណូហ្វាម និង ស៊ីណូវ៉ាក់។
ចិនបានសម្រុកបញ្ជូនវ៉ាក់សាំងពីរប្រភេទនេះទៅឲ្យប្រទេសក្រីក្រនៅក្នុងទ្វីបអាស៊ី និងអាហ្វ្រិក ជាពិសេសប្រទេសណាដែលជាកូនបំណុលចិនពាន់លានដុល្លារ។ តែនៅពេលសហរដ្ឋអាមេរិក និងអង់គ្លេស អាល្លឺម៉ង់ ផលិតបានវ៉ាក់សាំងរបស់ខ្លួនបានយ៉ាងលឿន គឺសម្រាប់សហរដ្ឋអាមេរិកក៏បានប្រញាប់បញ្ជូនទៅជួយប្រទេសក្រីក្រដោយជំហានដំបូង គឺស្ថិតក្នុងគម្រោងជំនួយមនុស្សធម៌ គេសង្កេតឃើញប្រជាជននៅក្នុងប្រទេសនៅអាស៊ី និងអាហ្វ្រិក បានសម្រុកចាក់វ៉ាក់សាំងរបស់អាមេរិក និងអង់គ្លេស ខណៈពួកគេមិនទុកចិត្តទៅលើប្រសិទ្ធភាពរបស់វ៉ាក់សាំងចិន។
វ៉ាក់សាំងរបស់អាមេរិកមានបីប្រភេទ គឺ BioNTech Pfizer, Johnson & Johnson និង Moderna។ ចំណែកវ៉ាក់សាំងរបស់អង់គ្លេស គឺ AstraZeneca ហើយរីឯវ៉ាក់សាំងរបស់រុស្ស៊ី គឺ Sputnik V។ យ៉ាងណាក៏ដោយ ប្រទេសជាច្រើនក៏បានផលិតវ៉ាក់សាំងរបស់ពួកគេដែរ ដូចជាប្រទេសឥណ្ឌា ជាដើម។
មកដល់ពេលនេះ វ៉ាក់សាំងរបស់ចិនពីរប្រភេទនេះ គឺប្រទេសខ្លះទាំងនៅអាស៊ី និងអាហ្វ្រិក ពួកគេបានប្រកាសលែងទទួលយកវ៉ាក់សាំងចិនមកចាក់ឲ្យប្រជាជនគេទៀតហើយ។
ក្នុងស្ថានភាពដែលជំងឺនេះនៅតែបន្តឆ្លង និងបំប្លែងថ្មី វ៉ាក់សាំងរបស់សហរដ្ឋអាមេរិកទាំង ៣ប្រភេទនេះ រួមនឹងវ៉ាក់សាំងរបស់ប្រទេសអង់គ្លេស គឺជាប្រភពចែកចាយនៅពាសពេញពិភពលោក ដោយប្រទេសជាច្រើនបានស្នើទិញវ៉ាក់សាំងរបស់អាមេរិក និងអង់គ្លេសមកប្រើនៅក្នុងប្រទេសរបស់ពួកគេទៀតផង៕