29 C
Phnom Penh

សន្និសីទ​នៅ​អាមេរិក​វាយតម្លៃ​លោក កឹម សុខា ជា​វីរជន​ប្រកាន់​ជំហរ​សន្តិភាព​នៅ​កម្ពុជា

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​គណបក្ស​សង្គ្រោះ​ជាតិ អះអាង​ថា អង្គ​សន្និសីទ​អន្តរជាតិ​មួយ​នៅ​សហរដ្ឋ​អាមេរិក បាន​ចាត់ទុក​ប្រធាន​គណបក្ស​សង្គ្រោះ​ជាតិ លោក កឹម សុខា ថា​ជា​វីរជន​ប្រកាន់​ជំហរ​សន្តិភាព តស៊ូ​ដើម្បី​សេរីភាព និង​យុត្តិធម៌​សង្គម ដែល​ជា​កត្តា​ជំរុញ​ឲ្យ​រដ្ឋាភិបាល​កម្ពុជា​គ្មាន​ជម្រើស​អ្វី​ក្រៅពី​បើក​ឱ្យ​លោក កឹម សុខា ទទួល​បាន​នូវ​សិទ្ធិ​ធ្វើ​នយោបាយ​ឡើងវិញ​នោះ​ទេ។

មន្ត្រី​ជាន់ខ្ពស់​បក្ស​ប្រឆាំង លោក មាជ សុវណ្ណារ៉ា បាន​សរសេរ​លើ​គណនី​ហ្វេសប៊ុក​របស់​លោក​នៅ​ថ្ងៃ​ទី​៧ មេសា ថា ការ​លើកឡើង​របស់​សន្និសីទ​អន្តរជាតិ​នេះ បង្ហាញ​ឱ្យ​ឃើញ​ថា មេដឹកនាំ​បក្ស​ប្រឆាំង លោក កឹម សុខា មិន​ឯកោ​ឡើយ ព្រោះ​ថា​ប្រទេស​លោក​សេរី​នឹង​មិន​មើល​រំលង​ការ​តស៊ូ​របស់​លោក​នោះ​ទេ ត្បិត​ការ​លះបង់​គ្រប់​បែប​យ៉ាង​ដើម្បី​លទ្ធិប្រជាធិបតេយ្យ និង​សិទ្ធិមនុស្ស​របស់​មេដឹកនាំ​បក្ស​ប្រឆាំង​រូប​នេះ ជា​ទង្វើ​ដែល​គួរតែ​ទទួល​បាន​នូវ​ការ​គោរព និង​ការ​ផ្តល់​នូវ​មេដាយ​សេរីភាព និង​សន្តិភាព​សម្រាប់​ការ​តស៊ូ​របស់​លោក។

លោក មាជ សុវណ្ណារ៉ា លើកឡើង​ថា ការ​ចាប់​ខ្លួន​មេដឹកនាំ​គណបក្ស​សង្គ្រោះ​ជាតិ លោក កឹម សុខា និង​ការ​រំលាយ​បក្ស​ប្រឆាំង​ដ៏​ធំ​បំផុត​នៅ​ឆ្នាំ​២០១៧ គឺជា​ការ​ជាន់ឈ្លី​លទ្ធិប្រជាធិបតេយ្យ​យ៉ាង​ធ្ងន់ធ្ងរ​ដែល​បង្ក​ជា​វិបត្តិ​នយោបាយ​យ៉ាង​ធំធេង​សម្រាប់​កម្ពុជា​សព្វថ្ងៃ​នេះ ដូច្នេះ​គន្លឹះ​ក្នុង​ការ​ដោះស្រាយ​វិបត្តិ​នេះ រដ្ឋាភិបាល​កម្ពុជា​គ្មាន​ជម្រើស​ផ្សេង​ក្រៅពី​បើក​ឱ្យ​លោក កឹម សុខា ទទួល​បាន​សិទ្ធិ​នយោបាយ​ដោយ​ពេញលេញ​របស់​លោក​វិញ​នោះ​ទេ។

មន្ត្រី​ជាន់ខ្ពស់​បក្ស​ប្រឆាំង​រូប​នេះ​អះអាង​ថា មេដឹកនាំ​សន្តិភាព​និយម​តែងតែ​ធ្វើ​អ្វីៗ​គ្រប់​បែប​យ៉ាង​ដើម្បី​សេរីភាព ប្រជាធិបតេយ្យ និង​សិទ្ធិមនុស្ស ដើម្បី​សេចក្តី​សុខ​ដល់​មនុស្ស​ជាតិ​នៅ​លើ​ពិភពលោក តាម​មាគ៌ា​អហិង្សា។ ដោយឡែក​ជន​ផ្ដាច់ការ ឬ​មេដឹកនាំ​ឧក្រិដ្ឋកម្ម​មនុស្ស​ជាតិ គឺជា​ជន​ហិង្សា​និយម ជាន់ឈ្លី​សេរីភាព សិទ្ធិមនុស្ស ប្រជាធិបតេយ្យ យក​ពលរដ្ឋ​ជា​ទាសករ​កំដរ​អំណាច​ផ្ដាច់ការ​របស់​ខ្លួន និង​ធ្វើ​ឱ្យ​ពិភពលោក​ខូច​សណ្ដាប់ធ្នាប់​ថែមទៀត។

ការ​អះអាង​នេះ ធ្វើឡើង​បន្ទាប់ពី​សន្និសីទ​អន្តរជាតិ​ក្នុង​សហរដ្ឋ​អាមេរិក បាន​លើកឡើង​ពី​ការ​តស៊ូ​ដើម្បី​សេរី និង​លទ្ធិប្រជាធិបតេយ្យ​របស់​មេដឹកនាំ​បក្ស​ប្រឆាំង ដែល​ត្រូវ​រដ្ឋាភិបាល​កម្ពុជា​ធ្វើ​ទុក្ខបុកម្នេញ​សព្វថ្ងៃ​នេះ។

កាលពី​ថ្ងៃ​ទី​៥ ខែ​មេសា ឆ្នាំ​២០២២ សន្និសីទ​អន្តរជាតិ​មួយ​ត្រូវ​បាន​ធ្វើឡើង​ក្នុង​រដ្ឋ California សហរដ្ឋ​អាមេរិក ស្ដីពី​បញ្ហា​ប្រឈម​ថ្មី​សម្រាប់​គោលនយោបាយ​ការបរទេស​អាមេរិក ដែល​គេ​មើល​ឃើញ​អំពី​ឥទ្ធិពល​នយោបាយ​ការបរទេស និង​យោធា​របស់​មហាអំណាច​កុម្មុយនីស្ត​ចិន ដែល​កំពុង​បោះ​ជំហាន​ទៅ​ក្តោប​ក្តាប់​តំបន់​អាស៊ី​ប៉ាស៊ីហ្វិក​នៅ​ពេលនេះ។

ជាក់ស្តែង កម្ពុជា​ត្រូវ​គេ​មើល​ឃើញ​ថា ត្រូវ​បាន​មហាអំណាច​កុម្មុយនីស្ត​ចិន​លូក​ដៃ​ចូល​យ៉ាង​ជ្រៅ​ក្នុង​ការ​បំផ្លាញ​លទ្ធិប្រជាធិបតេយ្យ និង​សិទ្ធិមនុស្ស​យ៉ាង​ធ្ងន់ធ្ងរ ជាពិសេស​ការ​ចាប់​ខ្លួន​មេដឹកនាំ​គណបក្ស​សង្គ្រោះ​ជាតិ លោក កឹម សុខា និង​ការ​រំលាយ​បក្ស​ប្រឆាំង​ដ៏​ធំ​បំផុត​នៅ​កម្ពុជា កាលពី​ឆ្នាំ​២០១៧ កន្លងទៅ។

អង្គ​សន្និសីទ​អន្តរជាតិ​នោះ​បាន​បញ្ជាក់​ថា ការ​តស៊ូ​របស់​ប្រធាន​គណបក្ស​សង្គ្រោះ​ជាតិ លោក កឹម សុខា គឺជា​ការ​បង្ហាញ​នូវ​ជា​វីរភាព​នៃ​ជន​ប្រកាន់​ជំហរ​សន្តិភាព តស៊ូ​ដើម្បី​សេរីភាព និង​យុត្តិធម៌​សង្គម​នៅ​កម្ពុជា​ពិតៗ។

ទាក់ទិន​នឹង​បញ្ហា​នេះ កាលពី​ថ្ងៃ​ទី​៣១ ខែ​មីនា ឆ្នាំ​២០២២ តំណាង​សហភាព​អឺរ៉ុប បាន​ថ្លែង​ក្នុង​សម័យ​ប្រជុំ​ពេញ​អង្គ​លើក​ទី​៤៩ នៃ​ក្រុមប្រឹក្សា​សិទ្ធិមនុស្ស​អង្គការ​សហប្រជាជាតិ​នៃ​កិច្ចប្រជុំ​អន្តរ​សកម្ម​លើក​ទី​៥០ ស្ដីពី​ស្ថានការណ៍​សិទ្ធិមនុស្ស​នៅ​កម្ពុជា ថា​កម្ពុជា​គួរតែ​ត្រូវ​បាន​បើក​លំហ​ឱ្យ​មេដឹកនាំ​បក្ស​ប្រឆាំង លោក កឹម សុខា អាច​ចូលរួម​ការ​បោះឆ្នោត​ឆ្នាំ​២០២២ និង​ឆ្នាំ​២០២៣ ដើម្បី​ធានា​បាន​នូវ​ការ​បោះឆ្នោត​មួយ​ដែល​ប្រកប​ទៅ​ដោយ​សេរី ត្រឹមត្រូវ និង​យុត្តិធម៌។

ដោយឡែក​ឯកអគ្គរដ្ឋទូត​សហរដ្ឋ​អាមេរិក​ប្រចាំ​ក្រុមប្រឹក្សា​សិទ្ធិមនុស្ស​របស់​អង្គការ​សហប្រជាជាតិ អ្នកស្រី Michele Taylor កាលពី​ថ្ងៃ​ទី​២៩ ខែ​មីនា ឆ្នាំ​២០២២ បាន​អំពាវនាវ​ឱ្យ​រដ្ឋាភិបាល​កម្ពុជា​បញ្ឈប់​ការ​ចោទប្រកាន់​ដែល​មាន​ចរិត​នយោបាយ​លើ​ប្រធាន​គណបក្ស​សង្គ្រោះ​ជាតិ លោក កឹម សុខា និង​សមាជិក​បក្ស​ប្រឆាំង​ដទៃ​ទៀត។

មេដឹកនាំ​បក្ស​ប្រឆាំង លោក កឹម សុខា ត្រូវ​បាន​អាជ្ញាធរ​ក្រុង​ភ្នំពេញ​ចាប់​ខ្លួន​កាលពី​ថ្ងៃ​ទី​៣ ខែ​កញ្ញា ឆ្នាំ​២០១៧ ពី​បទ​ឃុបឃិត​ជាមួយ​រដ្ឋ​បរទេស។ ទោះជា​យ៉ាងណា​ក៏ដោយ រហូត​មក​ទល់​នឹង​ពេលនេះ​មាន​រយៈពេល​ជិត ៥​ឆ្នាំ​ហើយ ប៉ុន្តែ​តុលាការ​មិនទាន់​កាត់ទោស​លោក​ពី​បទល្មើស​ណា​មួយ​នៅឡើយ​ទេ ខណៈ​សវនាការ​ចេះ​តែ​ដំណើរការ​បន្ត​ដោយ​ពុំ​មាន​ការ​កំណត់​ជាក់លាក់៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស