ចៅក្រមស៊ើបសួរសាលាដំបូងរាជធានីភ្នំពេញ បង្គាប់ឱ្យកម្លាំងសមត្ថកិច្ចនាំខ្លួនអតីតតំណាងស្ថាបនិកគណបក្សបេះដូងជាតិ ដែលកំពុងជ្រកកោនជីវភាពនយោបាយជាមួយគណបក្សភ្លើងទៀន យកមកសាកសួរឱ្យបានមុនថ្ងៃទី២៥ ខែមេសា ពីបទ «ក្លែងបន្លំ និងប្រើប្រាស់លិខិតក្លែង» អំឡុងពេលបង្កើតគណបក្ស។
នៅក្នុងដីកាបង្គាប់ចុះថ្ងៃទី៤ ខែមេសា ឆ្នាំ២០២២ ចេញដោយចៅក្រមស៊ើបសួរសាលាដំបូងរាជធានីភ្នំពេញ លោក លិ សុខា បានឱ្យដឹងថា ដើម្បីធានាដល់ការស៊ើបសួរឱ្យបានពេញលេញ តុលាការបង្គាប់ឱ្យកម្លាំងសមត្ថកិច្ចនាំខ្លួនតំណាងស្ថាបនិកគណបក្សបេះដូងជាតិ លោក សៀម ភ្លុក ចូលបំភ្លឺឱ្យបានមុនថ្ងៃទី២៥ ខែមេសា ឆ្នាំ២០២២ ជាកំហិត។
ដីកាបង្គាប់ដដែលថា ការសម្រេចបែបនេះដើម្បីចាត់ការតាមច្បាប់ពាក់ព័ន្ធនឹងសំណុំរឿង «ក្លែងបន្លំ និងប្រើប្រាស់លិខិតក្លែង» អំឡុងពេលដែលលោក សៀម ភ្លុក បង្កើតគណបក្សបេះដូងជាតិ។
ការចេញដីកាឱ្យសមត្ថកិច្ចនាំខ្លួនរបស់ចៅក្រមស៊ើបសួរ ធ្វើឡើងបន្ទាប់ពីលោក សៀម ភ្លុក មិនបានចូលបំភ្លឺនៅតុលាការនាថ្ងៃទី២២ ខែមីនា ឆ្នាំ២០២២ ពាក់ព័ន្ធនឹងរឿងក្លែងបន្លំស្នាមមេដៃសមាជិក។ ប៉ុន្តែបើតាមលោក សៀម ភ្លុក អះអាងថា មូលហេតុដែលលោកមិនអាចចូលបំភ្លឺនៅថ្ងៃទី២២ ខែមីនា នោះ ដោយសារលោកមិនទាន់ទទួលបានដីកាកោះពីតុលាការនៅឡើយ។
គណបក្សបេះដូងជាតិ ដែលទើបបង្កើតឡើងថ្មីថ្មោង ត្រូវបានគេសង្ស័យថា លោក សម រង្ស៊ី ជាអ្នកនៅពីក្រោយនៃការបង្កើតគណបក្សមួយនេះ ខណៈគណបក្សនេះត្រូវក្រសួងមហាផ្ទៃចោទប្រកាន់ថា «ក្លែងស្នាមមេដៃ និងមានចេតនាទុច្ចរិត»។
កាលពីថ្ងៃទី១៦ ខែវិច្ឆិកា ឆ្នាំ២០២១ ក្រសួងមហាផ្ទៃបានសម្រេចបដិសេធចំពោះការស្នើសុំចុះឈ្មោះក្នុងបញ្ជីបង្កើតគណបក្សនយោបាយរបស់ស្ថាបនិកគណបក្សបេះដូងជាតិ លោក សៀម ភ្លុក។
ដោយមិនសុខចិត្តនឹងការសម្រេចនេះ នៅថ្ងៃទី២៦ ខែវិច្ឆិកា ឆ្នាំ២០២១ លោក សៀម ភ្លុក ក៏បានដាក់ពាក្យបណ្ដឹងទៅតុលាការកំពូល ដើម្បីតវ៉ា ប៉ុន្តែតុលាការកំពូលបានសម្រេចច្រានចោលបណ្ដឹងប្រឆាំងនឹងសេចក្ដីសម្រេចក្រសួងមហាផ្ទៃកាលពីថ្ងៃទី២៤ ខែធ្នូ ឆ្នាំ២០២១។
ក្រោយពីក្រសួងមហាផ្ទៃ មិនចុះបញ្ជីឱ្យនោះ លោក សៀម ភ្លុក បានសម្រេចចូលរួមជីវភាពនយោបាយជាមួយគណបក្សភ្លើងទៀន ហើយក៏បានណែនាំឱ្យសមាជិករបស់ខ្លួនទៅគាំទ្រ ឬចូលរួមជីវភាពនយោបាយជាមួយគណបក្សភ្លើងទៀន ដែលជាគណបក្សចាស់របស់លោក សម រង្ស៊ី ផងដែរ៕