ជនជាតិម៉ាឡេស៊ីចំនួន ១៦នាក់ ដែលត្រូវបានគេបង្ខំឱ្យធ្វើជាក្រុមប្រតិបត្តិករឆបោកនៅខេត្តព្រះសីហនុ ត្រូវបានអាជ្ញាធរម៉ាឡេស៊ី សហការជាមួយអាជ្ញាធរកម្ពុជា ជួយសង្គ្រោះ និងត្រៀមបញ្ជូនពួកគេត្រឡប់ទៅប្រទេសកំណើតវិញ។
កាសែត New Straits Times ដែលបានដកស្រង់សម្ដីរដ្ឋមន្ត្រីការបរទេស Saifuddin Abdulla កាលពីថ្ងៃទី៩ ខែមេសា ឆ្នាំ២០២២ ថាជនជាតិម៉ាឡេស៊ីទាំង ១៦នាក់ ត្រូវបានជួយសង្គ្រោះចេញពីក្រុមឆបោកនៅខេត្តព្រះសីហនុ ហើយបច្ចុប្បន្ន ពួកគេកំពុងស្នាក់នៅក្នុងទីក្រុងភ្នំពេញ មុនពេលបញ្ជូនទៅប្រទេសកំណើតរបស់ខ្លួនវិញ។
ក្នុងសេចក្តីថ្លែងការណ៍ដែលចេញដោយប្រធាននាយកដ្ឋានស៊ើបអង្កេតឧក្រិដ្ឋកម្ម Bukit Aman លោក Abd Jalil Hassan បានបន្ថែមថា ជនរងគ្រោះទាំង ១៦នាក់ ក្នុងនោះមានបុរស ១៥នាក់ និងស្ត្រីម្នាក់ដែលមានអាយុចន្លោះពី ១៩ឆ្នាំដល់ ៤៣ឆ្នាំ ដោយពួកគេត្រូវបានជាប់នៅក្នុងខេត្តព្រះសីហនុ។
ជនជាតិម៉ាឡេស៊ីទាំង ១៦នាក់បានអះអាងថា ពួកគេត្រូវបានបោកបញ្ឆោតដោយការផ្សាយពាណិជ្ជកម្មដែលផ្តល់ការងារជាមន្ត្រីសេវាអតិថិជននៅក្នុងសារព័ត៌មាន Free Malaysia Today ក្នុងនោះថ្លៃចំណាយ និងការធ្វើដំណើរមកធ្វើការនៅកម្ពុជាត្រូវបានក្រុមហ៊ុនជាអ្នកចេញ។ ប៉ុន្តែនៅពេលដែលមកដល់ប្រទេសកម្ពុជាភ្លាម ឯកសារធ្វើដំណើររបស់ពួកគេត្រូវបានរឹបអូសយកទុក ខណៈពួកគេត្រូវបានគេដាក់ឱ្យស្ថិតក្រោមការយាមកាមពីសន្តិសុខដ៏តឹងរ៉ឹង មុននឹងត្រូវបង្ខំឱ្យធ្វើការជាអ្នកបោកប្រាស់តាមប្រព័ន្ធអនឡាញ។ នេះបើតាមលោក Abd Jalil Hassan ដែលបាននិយាយក្នុងសេចក្ដីថ្លែងការណ៍។
មន្ត្រីគណបក្សនយោបាយមួយនៅប្រទេសម៉ាឡេស៊ី បានលើកឡើងក្នុងសន្និសីទសារព័ត៌មានមួយកាលពីថ្ងៃទី៧ ខែមេសា ឆ្នាំ២០២២ បន្ទាប់ពីបានហៅទូរស័ព្ទទៅកាន់មនុស្សពីរនាក់ដែលត្រូវបានចោទប្រកាន់ថា ពួកគេត្រូវបានឃុំខ្លួននៅកម្ពុជា។ នៅក្នុងកិច្ចសន្ទនានោះ ជនរងគ្រោះម្នាក់បាននិយាយថា ខ្លួនត្រូវបានគេប្រាប់ឱ្យបោកប្រាស់អតិថិជន ហើយប្រសិនបើខ្លួនមិនអាចធ្វើដូច្នេះបានទេ នោះរូបគេនឹងត្រូវបានបង្ខាំងនៅក្នុងបន្ទប់ដែលគ្មានអាហាររយៈពេលពីរ ឬបីថ្ងៃ។
បើតាមជនរងគ្រោះដដែលឲ្យដឹងថា មានជនជាតិម៉ាឡេស៊ីចំនួន ១៣នាក់ផ្សេងទៀត ក្នុងនោះស្ត្រី ៥នាក់មានអាយុចន្លោះពី ១៧ ទៅ ៣៦ឆ្នាំ នៅក្នុងតំបន់ដូចគ្នា ដោយពួកគាត់ត្រូវបានបង្ខំឱ្យធ្វើការជាប្រតិបត្តិករបោកប្រាស់។
ចំណែកជនរងគ្រោះម្នាក់ទៀតបាននិយាយថា រូបគេនៅជាមួយក្រុមផ្សេងទៀតដែលមានជនជាតិម៉ាឡេស៊ីប្រហែល ៥០នាក់នៅកម្ពុជា ដោយពួកគេត្រូវបានបង្ខំឲ្យធ្វើការលើសពី ១៥ម៉ោងជារៀងរាល់ថ្ងៃ ដើម្បីបោកប្រាស់អតិថិជនជុំវិញពិភពលោក។
កាសែតក្នុងស្រុកខ្មែរថាមស៍ បានដកស្រង់លិខិតរបស់ស្ថានទូតម៉ាឡេស៊ី នៅថ្ងៃទី៩ ខែមេសា ថា ឯកអគ្គរាជទូតម៉ាឡេស៊ីប្រចាំកម្ពុជា លោក Eldeen Husaini Mohd Hashim បានសរសេរលិខិតមួយច្បាប់ស្នើទៅអគ្គស្នងការនគរបាលជាតិ លោក នេត សាវឿន កាលពីដើមខែមេសា ឲ្យជួយអន្តរាគមន៍ដោះលែងជនជាតិម៉ាឡេស៊ី ៥០នាក់ដែលត្រូវបានចោទប្រកាន់ថា ពួកគេរងការបង្ខិតបង្ខំឱ្យធ្វើសកម្មភាពខុសច្បាប់នៅខេត្តព្រះសីហនុ។
កាសែតដដែលបានដកស្រង់លិខិតរបស់ស្ថានទូតថា ជនជាតិម៉ាឡេស៊ីរងគ្រោះដោយសារការជួញដូរមនុស្សចំនួន ២០នាក់ ក្នុងនោះប្រុស ១៦នាក់ ស្រី ៤នាក់ ត្រូវបានគេឃុំឃាំង និងបង្ខំឱ្យធ្វើការអស់រយៈពេល ១៤ម៉ោងក្នុងមួយថ្ងៃ ទទួលរងការគំរាមកំហែង និងវាយដំ ប្រសិនបើពួកគេមិនគោរពតាមបញ្ជា និងមានចេតនាចង់រត់ចេញ។
កាលពីដើមសប្តាហ៍នេះ សមត្ថកិច្ចបានជួយសង្គ្រោះយុវជនម៉ាឡេស៊ីចំនួន ១៥នាក់។ ក្រោយពីបានសួរចម្លើយហើយ សមត្ថកិច្ចឲ្យដឹងថា ពួកគេមិនត្រូវបានចាញ់បោកដូចការលើកឡើងនោះឡើយ ប៉ុន្តែត្រូវបានគេជួលឲ្យធ្វើការស្របច្បាប់នៅក្នុងកាស៊ីណូមួយក្នុងក្រុងព្រះសីហនុ។ ពួកគេខ្លះចង់នៅធ្វើការ និងខ្លះទៀតចង់វិលត្រឡប់ទៅប្រទេសម៉ាឡេស៊ីវិញ។
ស្នងការនគរបាលខេត្តព្រះសីហនុ លោក ជួន ណារិន្ទ បានប្រាប់កាសែតដដែលថា យុវជនម៉ាឡេស៊ីចំនួន ១៥នាក់ត្រូវបានបញ្ជូនទៅកាន់នគរបាលរាជធានីភ្នំពេញរួចហើយ ដើម្បីសួរចម្លើយ និងសម្រេចចិត្តចុងក្រោយ ថាតើនឹងត្រូវនិរទេសពួកគេ ឬក៏អត់។ លោកបន្តថា ជនរងគ្រោះត្រូវបានបោកបញ្ឆោតជាមួយនឹងការផ្តល់ការងារជាអ្នកលក់តាមប្រព័ន្ធទូរគមនាគមន៍ ដោយបានប្រាក់ខែពី ៣ពាន់ដុល្លារដល់ ៤ពាន់ដុល្លារក្នុងមួយខែ។
កាលពីដើមខែកក្កដា ឆ្នាំ២០២១ ក្រសួងការបរទេសសហរដ្ឋអាមេរិក បានចេញផ្សាយរបាយការណ៍អង្កេត និងវាយតម្លៃប្រចាំឆ្នាំរបស់ខ្លួនមួយស្ដីពី «ការជួញដូរមនុស្សលើសកលលោកឆ្នាំ២០២១» ដោយបានចាត់ថ្នាក់ប្រទេសកម្ពុជាស្ថិតនៅក្នុងបញ្ជីឃ្លាំមើលទី២ (Tier 2 Watch List)។
របាយការណ៍នោះបានចោទប្រកាន់រដ្ឋាភិបាលកម្ពុជាថាមិនបានគោរពឱ្យបានពេញលេញតាមបទដ្ឋានអប្បបរមាក្នុងការលុបបំបាត់ការជួញដូរមនុស្សនោះទេ ហើយថាអំពើពុករលួយនៅតែបន្តរារាំងដល់ការអនុវត្តច្បាប់ នីតិវិធីព្រហ្មទណ្ឌ និងការផ្ដល់សេវាដល់ជនរងគ្រោះ៕