ភ្លាមៗបន្ទាប់ពីមហាសន្និបាតអង្គការសហប្រជាជាតិបានបោះឆ្នោតព្យួរសមាជិកភាពរុស្ស៊ី ពីក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីថ្ងៃពុធ ទី៧ ខែមេសា ស្រាប់តែមេដឹកនាំសហភាពអឺរ៉ុប និងនាយករដ្ឋមន្ត្រីអង់គ្លេស បានទៅជួបប្រធានាធិបតីអ៊ុយក្រែន លោក Volodymyr Zelenskiy នៅរដ្ឋធានីគៀវ ខណៈអ៊ុយក្រែនបន្តហែកហួរដោយគ្រាប់កាំភ្លើងរបស់រុស្ស៊ីដ៏ធ្ងន់ធ្ងរនៅឡើយ។
កាលពីថ្ងៃទី៨ មេសា ប្រធានគណៈកម្មការអឺរ៉ុប អ្នកស្រី Ursula von der Leyen ដែលអមដំណើរដោយរដ្ឋមន្ត្រីកិច្ចការបរទេសអឺរ៉ុប និងនាយករដ្ឋមន្ត្រីស្លូវ៉ាគី បានធ្វើដំណើរតាមរថភ្លើងទៅជួបផ្ទាល់ប្រធានាធិបតីអ៊ុយក្រែន លោក Volodymyr Zelenskiy នៅទីក្រុងគៀវ។
កាលពីថ្ងៃទី២៣ មីនា កន្លងទៅ នាយករដ្ឋមន្ត្រីរបស់ប្រទេសសមាជិកសហភាពអឺរ៉ុបចំនួន ៣ផ្សេងទៀត គឺប្រទេសប៉ូឡូញ សាធារណរដ្ឋឆែក និងស្លូវ៉េនី បានធ្វើដំណើរទៅទីក្រុងគៀវ ដោយផ្សងនឹងគ្រោះថ្នាក់ ព្រោះតែរដ្ឋធានីមួយនេះកំពុងរងការវាយប្រហារយ៉ាងខ្លាំងពីសំណាក់កងទ័ពរុស្ស៊ី។
អ្នកស្រីប្រធានគណៈកម្មការអឺរ៉ុប បានសន្យាថា សហភាពអឺរ៉ុបសូមគាំទ្រ និងជួយភាគីអ៊ុយក្រែនកាន់តែច្រើនថែមទៀតចាប់ពីពេលនេះតទៅ។
ថ្លែងនៅក្នុងសន្និសីទកាសែតជាមួយប្រធានាធិបតីអ៊ុយក្រែន លោក Volodymyr Zelenskiy ប្រធានគណៈកម្មការអឺរ៉ុបរូបនេះនិយាយថា អ្នកស្រីជឿជាក់ថាអ៊ុយក្រែននឹងឈ្នះសង្គ្រាម។ អ្នកស្រីសន្យាថា អ៊ុយក្រែននឹងក្លាយជាសមាជិកសហភាពនៅអឺរ៉ុប។
ក្នុងដំណើរទស្សនកិច្ចនេះ ក្រុមប្រតិភូសហភាពអឺរ៉ុបបានប្រកាសផ្តល់ថវិកាបន្ថែម ៥០០លានអឺរ៉ូសម្រាប់ឲ្យអ៊ុយក្រែនអាចទិញអាវុធ។ ជាមួយគ្នានេះ នាយករដ្ឋមន្ត្រីស្លូវ៉ាគី ដែលធ្វើដំណើរជាមួយមេដឹកនាំអឺរ៉ុប ក៏បានប្រាប់ប្រធានាធិបតីអ៊ុយក្រែន ថា ស្លូវ៉ាគីសម្រេចផ្តល់ប្រព័ន្ធខែលមីស៊ីល S-300 ដែលផលិតដោយរុស្ស៊ីទៅឲ្យអ៊ុយក្រែន ដើម្បីបាញ់ទម្លាក់យន្តហោះចម្បាំងរុស្ស៊ីវិញ។
ដំណើរទស្សនកិច្ចក្នុងទឹកដីមួយដែលធ្លាក់ក្នុងសង្គ្រាមដ៏ខ្លោចផ្សា ប្រធានគណៈកម្មការអឺរ៉ុបបញ្ជាក់ថា សហភាពអឺរ៉ុបបានគាំទ្រតុលាការព្រហ្មទណ្ឌអន្តរជាតិក្នុងជំនួយផ្នែកច្បាប់ និងបច្ចេកទេសនៅក្នុងការងារស៊ើបអង្កេតទៅលើការសម្លាប់រង្គាលជនស៊ីវិលនៅទីក្រុង Bucha ក្បែរទីក្រុងគៀវ។
នៅមុនចាកចេញពីទឹកដីអ៊ុយក្រែន គណៈប្រតិភូសហភាពអឺរ៉ុបដឹកនាំដោយប្រធានគណៈកម្មការអឺរ៉ុប អ្នកស្រី Ursula von der Leyen បានធ្វើដំណើរទៅដល់កន្លែងប្រមូលសាកសពនៅទីក្រុង Bucha ដែលមានសាកសពជាង ៤០០នាក់ស្លាប់ដោយសារគ្រាប់កាំភ្លើងរបស់កងទ័ពរុស្ស៊ី។ សាកសពខ្លះស្លាប់ដោយការចងដៃមកក្រោយថែមទៀត។
ប្រធានគណៈកម្មការអឺរ៉ុប ថ្លែងថា ការស៊ើបអង្កេតស្វែងរកភស្តុតាង ត្រូវតែធ្វើឡើងដោយត្រឹមត្រូវតាមអន្តរជាតិស្ដីពីឧក្រិដ្ឋកម្មសង្គ្រាម។
មួយថ្ងៃក្រោយមក រដ្ឋអាជ្ញាតុលាការព្រហ្មទណ្ឌអន្តរជាតិ លោក Karim Khan បានជួបលោក Josep Borrell នៅប្រទេសលុចហ្សំបួរ។ ក្នុងជំនួបនេះ លោក Josep Borrell បានស្នើឲ្យលោក Karim Khan បង្កើនការកសាងសំណុំរឿងឧក្រិដ្ឋកម្មសង្គ្រាមប្រឆាំងរបបក្រុងមូស្គូ។
លោក ពូទីន ត្រូវបានលោក ចូ បៃដិន ប្រធានាធិបតីអាមេរិក ចោទជាសាធារណៈថាជាឧក្រិដ្ឋជនសង្គ្រាម ដែលលោកថាពិភពលោកចាំបាច់ត្រូវចាត់វិធានការតាមផ្លូវច្បាប់អន្តរជាតិប្រឆាំងនឹងបុរសខ្លាំងរូបនេះ។
នៅចំពោះមុខលោក Volodymyr Zelenskiy ប្រធានគណៈកម្មការអឺរ៉ុប អ្នកស្រី Ursula von der Leyen បានសន្យាថា អឺរ៉ុបនឹងបន្ថែមការដាក់ទណ្ឌកម្មថ្មីៗថែមទៀតទៅលើរបបលោក ពូទីន។ ក្រោយពីគណៈប្រតិភូសហភាពអឺរ៉ុបវិលត្រឡប់មកវិញ គឺនៅថ្ងៃទី៩ មេសា នាយករដ្ឋមន្ត្រីអង់គ្លេស លោក Boris Johnson បានធ្វើទស្សនកិច្ចដោយមិនបានប្រកាសឱ្យដឹងជាមុនទៅកាន់ទីក្រុងគៀវ ចំពេលដែលអង់គ្លេសសន្យាផ្តល់រថពាសដែកចំនួន ១២០គ្រឿង និងប្រព័ន្ធមីស៊ីលប្រឆាំងនាវាដល់រដ្ឋាភិបាលរបស់លោក Volodymyr Zelenskiy។
តាមបណ្ដាញផ្សាយព័ត៌មាន BBC ក្នុងជំនួបមួយទល់មួយជាមួយលោក Volodymyr Zelenskiy លោក Boris Johnson សន្យាថានឹងផ្តល់សព្វាវុធបន្ថែមទៀតដល់អ៊ុយក្រែន។ លោក Johnson បានសរសេរនៅលើ Twitter ដោយចាត់ទុកថា លោកបានជួបមិត្តរបស់លោក គឺលោកប្រធានាធិបតី Zelenskiy ក្នុងទីក្រុងគៀវ ដើម្បីជាការបង្ហាញពីការគាំទ្រឥតងាករេរបស់អង់គ្លេសចំពោះប្រជាជនអ៊ុយក្រែន។
លោកបានបញ្ជាក់ថា អង់គ្លេសកំពុងរៀបចំកញ្ចប់ថ្មីនៃជំនួយហិរញ្ញវត្ថុ និងយោធា ដែលជាសក្ខីភាពនៃការប្ដេជ្ញាចិត្តរបស់អង់គ្លេសចំពោះការតស៊ូរបស់ពលរដ្ឋអ៊ុយក្រែន ប្រឆាំងនឹងសង្គ្រាមដ៏ព្រៃផ្សៃពីសំណាក់រុស្ស៊ី។
តើជំនួបមេដឹកនាំអឺរ៉ុប និងនាយករដ្ឋមន្ត្រីអង់គ្លេស ជួបផ្ទាល់ជាមួយមេដឹកនាំអ៊ុយក្រែន បង្ហាញអ្វីខ្លះទៅលោក វ៉្លាឌីមៀរ ពូទីន ?
ការពិត ទស្សនកិច្ចរបស់ប្រធានគណៈកម្មការអឺរ៉ុប ដែលជួបផ្ទាល់ប្រធានាធិបតីអ៊ុយក្រែន នៅរដ្ឋធានីគៀវ គឺជាផ្នែកមួយនៃការស្វែងរកការពិតនៃការស្នើសុំរបស់លោក Zelenskiy ដែលសុំចូលជាសមាជិកនៃសហភាពអឺរ៉ុប។ នៅក្នុងជំនួបនោះ អ្នកស្រី Ursula von der Leyen បានសម្រេចថានឹងស្នើឲ្យសភាអឺរ៉ុបធ្វើការអនុម័ត។ បើដូចនេះមែន អ៊ុយក្រែននឹងក្លាយជាសមាជិកទី២៨ នៃសហភាពអឺរ៉ុប។
ចំណែកទស្សនកិច្ចរបស់នាយករដ្ឋមន្ត្រីអង់គ្លេស លោក Boris Johnson ដែលមិនបានប្រកាសជាមុន គឺជាចំណុចប្រវត្តិសាស្ត្រដែលមេដឹកនាំមហាអំណាចមួយកំពុងជួយសព្វាវុធក្នុងតម្លៃរាប់រយលានដុល្លារទៅឱ្យអ៊ុយក្រែន គឺមិនត្រឹមតែដូចនេះទេ មេដឹកនាំប្រទេសនេះក៏បានសម្រេចផ្សងគ្រោះថ្នាក់នៅក្រោមស្ថានការណ៍សឹកដ៏ផុយស្រួយបំផុតពីសំណាក់គ្រាប់កាំជ្រួចរបស់រុស្ស៊ី។
តែយ៉ាងនេះក្ដី ជំនួបផ្ទាល់រវាងមេដឹកនាំសហភាពអឺរ៉ុប និងនាយករដ្ឋមន្ត្រីអង់គ្លេស គឺជាសារដ៏ធ្ងន់មួយទៀតសំពងទៅលើរបបលោក វ៉្លាឌីមៀរ ពូទីន បន្ទាប់ពីរុស្ស៊ីបាត់បង់បុព្វសិទ្ធិក្នុងការតស៊ូមតិដោយសារការព្យួរអាសនៈរបស់ខ្លួនជាសមាជិកនៃក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីថ្ងៃទី៧ ខែមេសា។ នេះជាកំណត់ត្រាប្រវត្តិសាស្ត្រពិភពលោកដែលរុស្ស៊ីជាប្រទេសមហាអំណាចមួយ ត្រូវបានវាយបំបាក់លើសមរភូមិការទូតដ៏អាម៉ាស់បំផុត៕