ប៉ូលិសថៃ បានជួយសង្គ្រោះមនុស្សជាង ៦០នាក់បន្ថែមទៀតចេញពីក្រុមប្រតិបត្តិការឆបោកតាមប្រព័ន្ធអនឡាញនៅកម្ពុជា ខណៈការឆ្មក់ចូលជួយសង្គ្រោះខ្លះត្រូវបានថៅកែដឹងមុន។
យោងតាមការចុះផ្សាយរបស់វេបសាយប៉ូលិសថៃ ចេញផ្សាយកាលពីថ្ងៃទី១២ ខែមេសា ឆ្នាំ២០២២ ឱ្យដឹងថា ការឆ្មក់ចូលជួយសង្គ្រោះជនរងគ្រោះចំនួន ៦៦នាក់ ធ្វើឡើងក្នុងរយៈពេលពីរថ្ងៃនៅក្នុងខេត្តព្រះសីហនុ និងរាជធានីភ្នំពេញ ដោយការចុះប្រតិបត្តិការមួយចំនួនត្រូវបានរំខាន បន្ទាប់ពីថៅកែបានដឹងពីការឆ្មក់ចូលជួយសង្គ្រោះជនជាតិថៃទាំងនោះ។
មុនពេលជួយសង្គ្រោះ ប៉ូលិសថៃ បានទៅអគារមួយដែលមានកម្ពស់ ១០ជាន់ ក្នុងសង្កាត់មួយក្នុងក្រុងព្រះសីហនុ អំឡុងពេលនោះ ស្ត្រីខ្មែរម្នាក់ដែលនៅយាមច្រកទ្វារនៃអគារកម្ពស់ ១០ជាន់ មិនបានអនុញ្ញាតឱ្យមន្ត្រីថៃចូលនោះទេ ប៉ុន្តែក្រោយពីប៉ូលិសបានចរចារយៈពេល ៨ម៉ោងដោយមានការឈ្លោះប្រកែកជាមួយជនជាតិចិន ដែលចោទប្រកាន់ថាបានធ្វើសកម្មភាពក្នុងទីតាំងនោះ។
បើតាមបណ្ដាញផ្សព្វផ្សាយរបស់ប៉ូលិសថៃ បានប៉ាន់ប្រមាណថា មានជនជាតិថៃ ប្រហែល ១៥០០នាក់ទៀតកំពុងនៅក្នុងប្រតិបត្តិការឆបោក ដែលធ្វើឡើងនៅក្នុងសណ្ឋាគារ និងអគារដែលត្រូវបានគេបោះបង់ចោល ខណៈជនជាតិថៃ ៧នាក់ទៀតនៅខេត្តព្រះសីហនុ ត្រូវបានដោះលែងនៅលើចិញ្ចើមផ្លូវ។
របាយការណ៍របស់ប៉ូលិសថៃ បានឱ្យដឹងថា មន្ត្រីរបស់ខ្លួនបានបង់ប្រាក់ចំនួន ១៥០០ដុល្លារ និងបានជួយសង្គ្រោះជនជាតិថៃចំនួន ២៤នាក់ចេញពីក្រុមឆបោក។
បើតាមការចុះផ្សាយរបស់សារព័ត៌មាន Bangkok Post កាលពីថ្ងៃទី២៧ ខែមីនា ឱ្យដឹងថា អគ្គស្នងការនគរបាលជាតិថៃ លោក សុរាជិត ហាក់ផន នឹងដឹកនាំនគរបាលជាន់ខ្ពស់មួយក្រុមទៅកាន់ទីក្រុងភ្នំពេញ និងទីប្រជុំជនផ្សេងទៀត ខណៈកងទ័ពជើងទឹកថៃ នឹងរៀបចំនាវាមួយគ្រឿងដើម្បីប្រមូលជនជាតិថៃដែលបម្រើការនៅក្រុមប្រតិបត្តិការឆបោកតាមប្រព័ន្ធអនឡាញនានានៅកម្ពុជា ឱ្យត្រឡប់ទៅប្រទេសថៃវិញ។
សារព័ត៌មានថៃបាងកកប៉ុស្តិ៍ (Bangkok Post) ចុះផ្សាយកាលពីថ្ងៃទី២៤ ខែមីនា ឆ្នាំ២០២២ ថា សមត្ថកិច្ចខ្មែរ និងថៃ បានសហការគ្នាឃាត់ខ្លួនមនុស្សចំនួន ៦១នាក់ទាក់ទងនឹងបទល្មើសបោកប្រាស់ប្រាក់តាមទូរស័ព្ទនៅក្នុងខេត្តព្រះសីហនុ។
បើតាមប៉ូលិសថៃ ឱ្យដឹងថា ចាប់តាំងពីខែមីនា ដល់ខែមេសា ឆ្នាំ២០២២ អាជ្ញាធរថៃ និងកម្ពុជា បានជួយសង្គ្រោះ និងបញ្ជូនជនជាតិថៃ ចន្លោះពី ២៨០០នាក់ទៅ ៣ពាន់នាក់ ចេញពីទីតាំងប្រតិបត្តិការឆបោកខុសច្បាប់នៅកម្ពុជា។
ក្រៅពីជនជាតិថៃ នាពេលថ្មីៗនេះ ជនជាតិម៉ាឡេស៊ី ចំនួន ១៦នាក់ ដែលត្រូវបានគេបង្ខំឱ្យធ្វើជាក្រុមប្រតិបត្តិការឆបោកនៅខេត្តព្រះសីហនុ ក៏ត្រូវបានអាជ្ញាធរម៉ាឡេស៊ី សហការជាមួយអាជ្ញាធរកម្ពុជា ជួយសង្គ្រោះ និងត្រៀមបញ្ជូនពួកគេត្រឡប់ទៅប្រទេសកំណើតវិញដែរ៕