ក្រុមចារកម្មរបស់សហរដ្ឋអាមេរិក ប្រាប់ទៅរដ្ឋាភិបាលអ៊ុយក្រែន ឱ្យបង្កើនការប្រុងប្រយ័ត្ន និងបង្កើនកងទ័ពនៅតំបន់ណាជាមុខសញ្ញាដែលរុស្ស៊ីកំណត់ជាគោលដៅចុងក្រោយ ដើម្បីវាយផ្ដាច់ព្រ័ត្រ។
បើតាមក្រុមចារកម្មអាមេរិក រយៈពេលប៉ុន្មានថ្ងៃទៀតប៉ុណ្ណោះ រុស្ស៊ីនឹងបើកប្រតិបត្តិការសឹកដំណាក់កាលចុងក្រោយ ហើយមើលទៅអាចនឹង ៣ ឬ ៤ថ្ងៃទៀតប៉ុណ្ណោះ។
មន្ត្រីចារកម្ម ២រូបនៃភ្នាក់ងារចារកម្ម CIA បានប្រាប់បណ្ដាញផ្សាយព័ត៌មាន NBC ថា នៅតំបន់ភាគខាងកើត និងខាងត្បូង ទោះជារុស្ស៊ីត្រូវកំណត់វាយកាន់កាប់ឱ្យបានក៏ដោយ តែនៅតំបន់សំខាន់ៗផ្សេងៗទៀត ដូចជារដ្ឋធានីគៀវ គឺកងទ័ពរុស្ស៊ីអាចនឹងលើកទ័ពទៅវាយម្ដងទៀតដោយបើកប្រតិបត្តិការចេញពីព្រំដែននៃប្រទេសបេឡារូស។
តាមមន្ត្រីចារកម្មអាមេរិក ឲ្យដឹងថា វិមានក្រឹមឡាំង នឹងវាយលុកគ្រប់ជ្រុងទាំងអស់ដើម្បីធ្វើឲ្យកងទ័ពអ៊ុយក្រែនមិនអាចចល័តទ័ពជួយអន្តរាគមន៍នៅតំបន់ណាដែលកងទ័ពរុស្ស៊ីវាយសន្ធប់។ ចំពោះតំបន់ដុនបាស់ គឺជាចំណុចក្ដៅមួយដែលកងទ័ពរុស្ស៊ីត្រូវវាយដើម្បីកាន់កាប់ ព្រោះប្រជាជនតំបន់នេះភាគច្រើនបានរត់ចេញទៅនៅប្រទេសរុស្ស៊ីអស់ហើយ។
កាលពីថ្ងៃអាទិត្យចុងសប្ដាហ៍នេះ ប្រធានចារកម្ម CIA របស់សហរដ្ឋអាមេរិក លោក William Burns បានប្រាប់លោកប្រធានាធិបតីអ៊ុយក្រែន Volodymyr Zelenskiy ថា ប្រធានាធិបតីរុស្ស៊ីដែលខូចចិត្តចំពោះការលើកទ័ពឈ្លានពានវាយកាន់កាប់រដ្ឋធានីគៀវមិនបានសម្រេចដូចផែនការរបស់លោក គឺលោក វ៉្លាឌីមៀរ ពូទីន អាចនឹងវាយប្រហារទៅលើរដ្ឋធានីនេះដោយអាវុធនុយក្លេអ៊ែរតាក់តិច។
បើតាមលោក William Burns ការដែលលោក ពូទីន ខូចចិត្តនេះហើយដែលគាត់អាចចង់ឈ្នះ ទោះជាដឹងថាអាវុធប្រភេទនេះបង្កគ្រោះថ្នាក់យ៉ាងធ្ងន់ធ្ងរដល់មនុស្សជាតិក៏ដោយ។ ដោយទទួលបានការព្រមានដូចនេះ លោក Zelenskiy បានទទួលស្គាល់ថា រដ្ឋធានីគៀវ អាចនឹងគ្រោះថ្នាក់ដោយអាវុធប្រភេទនេះ ព្រោះប៉ុន្មានថ្ងៃចុងក្រោយនេះ ទីក្រុងមួយនេះរងការវាយប្រហារយ៉ាងខ្លាំងដោយកាំជ្រួចរបស់កងទ័ពរុស្ស៊ី ដែលបាញ់ចេញពីព្រំដែននៃទឹកដីប្រទេសបេឡារូស។ ប៉ុន្តែលោកប្រាប់ទៅប្រធានចារកម្មអាមេរិកថា ទីក្រុង Mariupol សឹងតែរលាយអស់ហើយដោយគ្រាប់កាំភ្លើងត្បាល់របស់កងទ័ពរុស្ស៊ី។
តែយ៉ាងណា លោកថាកងទ័ពរបស់លោកបានប្ដេជ្ញាថា ពួកគេនឹងតស៊ូប្រយុទ្ធរហូតដល់ដង្ហើមចុងក្រោយ ដើម្បីការពារទីក្រុងកំពង់ផែដ៏សំខាន់មួយនេះ ទោះជារុស្ស៊ីដាក់ឱសានវាទឱ្យកងទ័ពអ៊ុយក្រែនដែលនៅលាក់ខ្លួនត្រូវចាកចេញពីទីក្រុងនេះឲ្យអស់ត្រឹមថ្ងៃទី២០ ខែមេសា ក៏ដោយ។
ក្រសួងការពារជាតិរុស្ស៊ី បានដាក់ឱសានវាទលើកទី១ម្ដងហើយ ដោយឱ្យកងទ័ពអ៊ុយក្រែនដែលនៅសេសសល់ក្នុងទីក្រុង Mariupol ទម្លាក់អាវុធ ហើយសុំចុះចាញ់ឱ្យបានត្រឹមពេលរសៀល កាលពីថ្ងៃអាទិត្យ ទី១៧ មេសា ហើយបានព្រមានថា ជនណាដែលរឹងទទឹង នឹងត្រូវបានកម្ទេច ឬបាញ់សម្លាប់។
កាលពីថ្ងៃទី១៦ មេសា ប្រព័ន្ធផ្សព្វផ្សាយរបស់រុស្ស៊ី បានឱ្យដឹងថា កងទ័ពអ៊ុយក្រែនប្រមាណ ១០០០នាក់បានទម្លាក់អាវុធ ហើយចុះចូលនឹងកងទ័ពរុស្ស៊ី។
របបក្រុងមូស្គូ មានផែនការធ្វើពិធីរំឭកខួបជ័យជម្នះដ៏ធំមួយរបស់ខ្លួនលើសង្គ្រាមលោកលើកទី២ ដែលកងទ័ពរុស្ស៊ីបានវាយឈ្នះកងទ័ពអាល្លឺម៉ង់ ដឹកនាំដោយ អាឌុល អ៊ីត្លែរ នៅថ្ងៃទី៩ ខែឧសភា ឆ្នាំ១៩៤៥ ដោយចាប់យកទីក្រុង Mariupol ធ្វើជាទីតាំងនៃការរំឭកព្រឹត្តិការណ៍នេះនៅថ្ងៃទី៩ ឧសភា។
បែបនេះក្ដី រដ្ឋមន្ត្រីការបរទេសអ៊ុយក្រែន លោក Dmytro Kuleba បាននិយាយថា គ្មានការជួបទាក់ទងណាមួយក្នុងកម្រិតនៃក្រសួងការបរទេសរវាងរុស្ស៊ី និងអ៊ុយក្រែន អាចធ្វើបានទៀតនោះទេ ខណៈស្ថានភាពធ្ងន់ធ្ងរក្នុងទីក្រុងកំពង់ផែ Mariupol ក្លាយជាបន្ទាត់ក្រហមនៃការចរចារវាងភាគីទាំងពីរទៅហើយនោះ។
នៅក្នុងបទសម្ភាសន៍ជាមួយទូរទស្សន៍អាមេរិក CBS កាលពីថ្ងៃអាទិត្យ លោក Kuleba បានលើកឡើងថា Mariupol កំពុងស្ថិតនៅលើបន្ទាត់ក្រហម។ លោក Kuleba បញ្ជាក់ថា កងទ័ពអ៊ុយក្រែនព្យាយាមទប់ទល់នឹងឱសានវាទរបស់រុស្ស៊ីគំរាមឱ្យទម្លាក់អាវុធ ដែលលោកថាគឺជាផែនការរបស់រុស្ស៊ីវាយកាន់កាប់ទីក្រុងមួយនេះឱ្យបានក្នុងសង្គ្រាមជាង ៥០ថ្ងៃមកនេះ។
តាមលោករដ្ឋមន្ត្រីការបរទេសអ៊ុយក្រែនរូបនេះ មានការប្រយុទ្ធគ្នាកាន់តែខ្លាំងនៅភាគខាងកើតអ៊ុយក្រែនក្នុងប៉ុន្មានថ្ងៃមកនេះ។
ថ្មីៗនេះ សហរដ្ឋអាមេរិកបានប្រកាសបន្ថែមអាវុធមួយប្រភេទទៀត គឺកាំភ្លើងត្បាល់ខ្នាតយក្សចំនួន ១៨គ្រឿង ដោយមានគ្រាប់ចំនួន ៤ម៉ឺនគ្រាប់ទៅឱ្យកងទ័ពអ៊ុយក្រែន។ បន្ថែមលើសពីនេះ អាមេរិកប្រកាសបញ្ជូនយន្តហោះដ្រូន AeroVironment Switchblade ចំនួន ៦០០គ្រឿងទៅជួយកងទ័ពអ៊ុយក្រែន។ តាមការអំពាវនាវរបស់ប្រធានាធិបតីអ៊ុយក្រែន ប្រទេសដែលជួយសព្វាវុធទៅឱ្យអ៊ុយក្រែនមានអង់គ្លេស អាល្លឺម៉ង់ កាណាដា និងអូស្ត្រាលី ស្លូវើនៀ និងសាធារណរដ្ឋឆេក៕