ប្រធានអាស៊ានប្តូរវេនឆ្នាំ២០២២ លោក ហ៊ុន សែន ប្រកាសជាផ្លូវការថាកិច្ចប្រជុំកំពូលអាស៊ាន-អាមេរិក នឹងចាប់ផ្តើមធ្វើឡើងនៅថ្ងៃទី១២-១៣ ខែឧសភា ឆ្នាំ២០២២ ខាងមុខនេះ បន្ទាប់ពីកិច្ចប្រជុំនេះត្រូវបានលើកពេលពីរដងរួចមកហើយនោះ។
ប្រធានអាស៊ានប្តូរវេនឆ្នាំ២០២២ ដែលគេប្រសិទ្ធិនាមថាបុរសខ្លាំងដើរបញ្ច្រាសទិស លោក ហ៊ុន សែន បានចេញសេចក្តីប្រកាសព័ត៌មានកាលពីថ្ងៃទី១៦ ខែមេសា ឆ្នាំ២០២២ ថា កិច្ចប្រជុំកំពូលអាស៊ាន-អាមេរិកនេះនឹងបញ្ជាក់ឡើងវិញនូវការប្ដេជ្ញាចិត្តរួមគ្នា ដើម្បីរក្សាអព្យាក្រឹតភាព និងការឯកភាពរបស់អាស៊ានតាមរយៈយន្តការនានាដែលដឹកនាំដោយអាស៊ាន។
សេចក្តីប្រកាសព័ត៌មានដដែលអះអាងថា ក្រៅពីការរក្សាអព្យាក្រឹតភាព និងការឯកភាពរបស់អាស៊ាន ក៏ដើម្បីបង្កើនជំនឿទំនុកចិត្តគ្នាទៅវិញទៅមកផងដែរក្នុងការថែរក្សាសន្តិភាព ស្ថិរភាព និងវិបុលភាពក្នុងតំបន់។ ជាងនេះទៀត កិច្ចប្រជុំនេះនឹងដាក់ចេញនូវទិសដៅអនាគតក្នុងការទំនាក់ទំនងអាស៊ាន-អាមេរិក ដើម្បីលើកកម្ពស់ភាពជាដៃគូយុទ្ធសាស្ត្រសម្រាប់ផលប្រយោជន៍រួមនៃប្រជាជនអាស៊ាន និងប្រជាជនអាមេរិកថែមទៀត។
មេដឹកនាំខ្មែរដែលប្ដេជ្ញាកាន់អំណាចអស់មួយជីវិត លោក ហ៊ុន សែន បញ្ជាក់ថា ថ្នាក់ដឹកនាំអាស៊ាន និងប្រធានាធិបតីសហរដ្ឋអាមេរិក លោក ចូ បៃដិន នឹងពិភាក្សាគ្នាអំពីមធ្យោបាយដើម្បីបង្កើនសហប្រតិបត្តិការក្នុងវិស័យនានា ដូចជាការអភិវឌ្ឍប្រកបដោយចីរភាព កិច្ចសហប្រតិបត្តិការសមុទ្រ និងបញ្ហាតំបន់ និងអន្តរជាតិ ដែលជាផលប្រយោជន៍ និងកង្វល់រួមរបស់អាស៊ាន និងអាមេរិកផងដែរ។
ការអះអាងនេះ ធ្វើឡើងស្របពេលដែលកិច្ចប្រជុំកំពូលអាស៊ាន-អាមេរិកដែលនឹងត្រូវកំណត់យកសប្តាហ៍ទី២ នៃខែឧសភា ឆ្នាំ២០២២ នេះ បន្ទាប់ពីកិច្ចប្រជុំកំពូលនេះត្រូវខកខានចាប់តាំងពីខែកុម្ភៈ ឆ្នាំ២០២២ មក។
កិច្ចប្រជុំកំពូលអាស៊ាន-អាមេរិក ត្រូវបានពន្យារពេលពីរលើករួចមកហើយ គឺលើកទី១ នៅដើមខែកុម្ភៈ និងលើកទី២ នៅចុងខែមីនា ឆ្នាំ២០២២ នេះ។ យ៉ាងណាក៏ដោយ ការកំណត់កាលបរិច្ឆេទនៃកិច្ចប្រជុំកំពូលអាស៊ាន-អាមេរិកលើកទី៣ នេះ គេមិនទាន់ដឹងច្បាស់ថាសហរដ្ឋអាមេរិកនឹងបន្តលើកពេលទៀត ឬយ៉ាងណានោះទេ ខណៈមេដឹកនាំកម្ពុជាបានត្រៀមខ្លួនជានិច្ចដើម្បីកិច្ចប្រជុំកំពូលមួយនេះ។
ក្នុងសេចក្តីប្រកាសព័ត៌មានមួយកាលពីចុងខែកុម្ភៈ មន្ត្រីទទួលបន្ទុកផ្នែកព័ត៌មានប្រចាំវិមានប្រធានាធិបតីអាមេរិក អ្នកស្រី Jen Psaki បានឱ្យដឹងថា ប្រធានាធិបតីអាមេរិកនឹងស្វាគមន៍មេដឹកនាំអាស៊ាននៅរដ្ឋធានីវ៉ាស៊ីនតោននៃសហរដ្ឋអាមេរិក ប៉ុន្តែលិខិតនោះបញ្ជាក់ថា អាមេរិកនឹងគោរពតាមការសម្រេចរបស់អាស៊ាន ដែលថាកិច្ចប្រជុំនេះនឹងមិនអញ្ជើញមេដឹកនាំរបបយោធាមីយ៉ាន់ម៉ា ឬភូមា លោក មីន អ៊ុងឡាំង ឱ្យចូលរួម និងការសម្រេចលើពេលវេលានៃកិច្ចប្រជុំនេះផងដែរ។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនាពលរដ្ឋដើម្បីប្រជាធិបតេយ្យ លោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី១៨ មេសា នេះថា កិច្ចប្រជុំអាស៊ាន-អាមេរិកនេះ គួរតែក្លាយជាវេទិកាអន្តរជាតិគំរូមួយក្នុងការលើកតម្កើងបរិយាកាសប្រជាធិបតេយ្យឲ្យកាន់តែទូលំទូលាយ ដោយការលុបបំបាត់គោលការណ៍មិនជ្រៀតជ្រែកផ្ទៃក្នុងចេញចំពោះបញ្ហារំលោភសិទ្ធិមនុស្ស និងបំផ្លាញប្រជាធិបតេយ្យ។
លោក គឹម សុខ អះអាងថា គោលការណ៍មិនជ្រៀតជ្រែកផ្ទៃក្នុងនេះ បានធ្វើឲ្យពួកមេដឹកនាំផ្ដាច់ការធ្វើអ្វីៗតាមទំនើងចិត្ត ក្នុងនោះពួកគេតែងប្រើជាលេសបិទទ្វារបង្ក្រាបពលរដ្ឋម្ចាស់ប្រទេស ក្រោមល្បិចកលការពារសន្តិភាពយ៉ាងចាស់ដៃ ដូចជាកម្ពុជានៅពេលនេះ ជាដើម។
អ្នកវិភាគរូបនេះលើកឡើងថា កិច្ចប្រជុំកំពូលអាមេរិក-អាស៊ាននេះ គួរដាក់លក្ខខណ្ឌកំណត់ឲ្យសមាជិកទាំងអស់នៃអង្គប្រជុំ លើកឡើងនូវបញ្ហាដែលកើតមានក្នុងប្រទេស អំពីបញ្ហារំលោភសិទ្ធិមនុស្សធ្ងន់ធ្ងរ ដូចជានៅប្រទេសភូមា កម្ពុជា ថៃ និងវៀតណាមដែលកំពុងធ្វើទុក្ខបុកម្នេញពលរដ្ឋខ្មែរកម្ពុជាក្រោមសព្វថ្ងៃនេះ៕