ប្រធានគណបក្សសង្គ្រោះជាតិ លោក កឹម សុខា អះអាងថា ទំនាក់ទំនងការទូត និងកិច្ចសហប្រតិបត្តិការរបស់លោកជាមួយរដ្ឋបរទេស គឺដើម្បីឧត្តមប្រយោជន៍រួមរបស់ជាតិ និងពលរដ្ឋខ្មែរ ខណៈមន្ត្រីជាន់ខ្ពស់នៃព្រឹទ្ធសភាសហរដ្ឋអាមេរិក សម្ដែងនូវកង្វល់អំពីស្ថានភាពសិទ្ធិមនុស្ស និងប្រជាធិបតេយ្យបច្ចុប្បន្ននៅកម្ពុជា។
មេដឹកនាំបក្សប្រឆាំងដែលកំពុងរងការធ្វើទុក្ខបុកម្នេញពីគណបក្សកាន់អំណាច លោក កឹម សុខា បានសរសេរលើទំព័រហ្វេសប៊ុករបស់លោកកាលពីថ្ងៃទី២៣ មេសា ថា មន្ត្រីជាន់ខ្ពស់នៃព្រឹទ្ធសភាសហរដ្ឋអាមេរិក លោក Paul Grove បានមកជួបសម្ដែងការគួរសម និងពិភាក្សាការងារជាមួយលោកដល់គេហដ្ឋានរបស់លោកដោយផ្ទាល់ក្នុងទីក្រុងភ្នំពេញ ស្របពេលដែលមន្ត្រីជាន់ខ្ពស់អាមេរិករូបនោះមកបំពេញបេសកកម្មនៅកម្ពុជានាពេលនេះ។
លោក កឹម សុខា អះអាងថា ក្នុងជំនួបនេះ លោក Paul Grove បានពិភាក្សាជាមួយលោកលើបញ្ហាជាច្រើន ដូចជាបញ្ហាទំនាក់ទំនងរវាងកម្ពុជា និងសហរដ្ឋអាមេរិកទាំងពេលកន្លងមក បច្ចុប្បន្ន និងទៅអនាគត ក៏ដូចជាបញ្ហាក្នុងតំបន់ និងក្នុងពិភពលោកផងដែរ។
លោក កឹម សុខា បញ្ជាក់ថា មន្ត្រីជាន់ខ្ពស់នៃព្រឹទ្ធសភាសហរដ្ឋអាមេរិករូបនេះបានសម្ដែងនូវកង្វល់អំពីស្ថានភាពសិទ្ធិមនុស្ស ប្រជាធិបតេយ្យនៅកម្ពុជាក្នុងពេលបច្ចុប្បន្ននេះយ៉ាងខ្លាំង ក្នុងនោះលោក Paul Grove បានលើកឡើងអំពីដំណើរការនៃសវនាការរបស់តុលាការកម្ពុជា ដែលបានចោទប្រកាន់លើរូបលោកពីបទឃុបឃិតជាមួយអង្គការនានា និងរដ្ឋបរទេស ដែលក្នុងនោះក៏មានសហរដ្ឋអាមេរិកផងដែរដែលត្រូវបានរាប់បញ្ចូលក្នុងការចោទប្រកាន់នេះ។
កាលពីថ្ងៃទី២៣ ខែមេសា ឆ្នាំ២០២២ មេដឹកនាំបក្សប្រឆាំង លោក កឹម សុខា បានជួបពិភាក្សាជាមួយមន្ត្រីជាន់ខ្ពស់នៃព្រឹទ្ធសភាសហរដ្ឋអាមេរិក លោក Paul Grove ដែលជាមន្ត្រីជំនាញរបស់គណៈកម្មាធិការត្រួតពិនិត្យ (Appropriation Committee) នៃព្រឹទ្ធសភាសហរដ្ឋអាមេរិកដ៏មានឥទ្ធិពលក្នុងកិច្ចការគ្រប់គ្រងធនធានថវិកា ក៏ដូចជាជំនួយរបស់សហរដ្ឋអាមេរិកដែលបានចាប់អារម្មណ៍ខ្លាំងអំពីដំណើរការប្រជាធិបតេយ្យនៅកម្ពុជាសព្វថ្ងៃនេះ។
ប្រធានគណបក្សសង្គ្រោះជាតិ លោក កឹម សុខា ត្រូវបានអាជ្ញាធរក្រុងភ្នំពេញចាប់ខ្លួនកាលពីដើមខែកញ្ញា ឆ្នាំ២០១៧ ពីបទឃុបឃិតជាមួយរដ្ឋបរទេស ដើម្បីផ្តួលរំលំរដ្ឋាភិបាលកម្ពុជាតាមបញ្ជារបស់មេដឹកនាំបក្សកាន់អំណាច លោក ហ៊ុន សែន ក្នុងនោះសហរដ្ឋអាមេរិកក៏ជាឈ្មោះជាប្រទេសដែលបានឃុបឃិតជាមួយមេដឹកនាំបក្សប្រឆាំង លោក កឹម សុខា ផងដែរ។
ទោះបីជាប្រធានគណបក្សសង្គ្រោះជាតិ លោក កឹម សុខា ត្រូវបានរដ្ឋាភិបាលកម្ពុជារឹតត្បិតសេរីភាពក្រោមបទចោទធ្ងន់ធ្ងរយ៉ាងណាក៏ដោយ ក៏បណ្តាប្រទេសជាមិត្តរបស់កម្ពុជាបានបណ្ដាក់គ្នាមកជួបលោកជាហូរហែ។ ជាក់ស្តែង សកម្មភាពការទូតរបស់មេដឹកនាំបក្សប្រឆាំង លោក កឹម សុខា នៅដើមឆ្នាំ២០២២ នេះ បានធ្វើឡើងជាង ១០លើកមកហើយ ក្នុងនោះក៏មានទាំងការអញ្ជើញឲ្យលោកទៅធ្វើជាវាគ្មិនក្នុងវេទិកាគោលនយោបាយពិភពលោកនៅប្រទេសអាល្លឺម៉ង់ ថែមទៀតផង។
ទោះជាយ៉ាងណាក៏ដោយ រហូតមកទល់នឹងពេលនេះ តុលាការកម្ពុជាបានអូសបន្លាយសវនាការរបស់លោកចំនួន ៣៧លើកហើយ ប៉ុន្តែតុលាការនៅតែមិនអាចកាត់ទោសមេដឹកនាំប្រឆាំងរូបនេះពីបទល្មើសណាមួយនៅឡើយទេ ខណៈលោក ហ៊ុន សែន អះអាងថា ករណីរបស់លោក កឹម សុខា អាចនឹងត្រូវពន្យារពេលរហូតដល់ឆ្នាំ២០២៤ បន្ទាប់ពីបោះឆ្នោតជ្រើសតាំងតំណាងរាស្ត្រឆ្នាំ២០២៣ រួច៕