រដ្ឋាភិបាលកម្ពុជាបញ្ជាឱ្យដកបម្រាមកាតព្វកិច្ចពាក់ម៉ាស់នៅក្នុងក្របខ័ណ្ឌទូទាំងប្រទេសនៅតាមទីសាធារណៈ ក្រោយករណីឆ្លងកូវីដ-១៩ បានធូរស្បើយ លើកលែងតែនៅទីកន្លែងបិទជិត។
ការសម្រេចនេះ ធ្វើឡើងនាកិច្ចប្រជុំរបស់គណៈកម្មការប្រឆាំងកូវីដ-១៩ និងអ្នកពាក់ព័ន្ធនាល្ងាចថ្ងៃទី២៥ មេសា។
មេដឹកនាំខ្មែរក្រាញអំណាចតត្រកូល លោក ហ៊ុន សែន បានចេញសេចក្តីណែនាំជាខ្សែអាត់សំឡេងជិត ១៧នាទី នៅថ្ងៃទី២៦ ខែមេសា ឆ្នាំ២០២២ នេះដោយបានបញ្ជាឱ្យលើកលែងកាតព្វកិច្ចពាក់ម៉ាស់នៅក្នុងក្របខ័ណ្ឌទូទាំងប្រទេសចំពោះទីកន្លែងសាធារណៈ និងទីកន្លែងបើកចំហនានាក្រៅតែពីទីកន្លែងបិទជិត។
ដ្បិតតែរដ្ឋាភិបាលទុកលទ្ធភាពឱ្យពលរដ្ឋសម្រេចចិត្តក្នុងការពាក់ម៉ាស់ ឬមិនពាក់ដោយខ្លួនឯងនៅទីសាធារណៈ ប៉ុន្តែនៅក្នុងសារសំឡេងដដែលបានលើកទឹកចិត្តឱ្យពលរដ្ឋពាក់ម៉ាស់នៅកន្លែងដែលមានមនុស្សកកកុញ និងកន្លែងដែលមានករណីសង្ស័យថាមានកូវីដ-១៩ ដែរ។
បុរសខ្លាំងដើរបញ្ច្រាសទិសកម្ពុជា លោក ហ៊ុន សែន ក៏នៅតែបន្តអំពាវនាវយ៉ាងទទូចឱ្យពលរដ្ឋទៅចាក់វ៉ាក់សាំងដូសទី៣ ដើម្បីបង្កើនភាពស៊ាំក្នុងសហគមន៍ ខណៈនៅមានពលរដ្ឋជាង ៦លាននាក់ទៀតដែលមិនទាន់បានទទួលវ៉ាក់សាំងដូសជំរុញនេះ។ ការចាក់ដូសទី៣ នេះ បើទោះបីជាលោកធ្លាប់កំណត់ថាជាវ៉ាក់សាំងកាតព្វកិច្ចក៏ដោយ ក៏មិនតម្រូវឱ្យអនុវត្តវិធានការច្បាប់ ឬរដ្ឋបាលណាមួយនោះទេ គឺត្រូវឈរលើគោលការណ៍ស្ម័គ្រចិត្តដដែល។
កាលពីថ្ងៃទី២៥ ខែមេសា ឆ្នាំ២០២២ អភិបាលក្រុងភ្នំពេញ លោក ឃួង ស្រេង បានចេញសេចក្តីប្រកាសព័ត៌មានស្ដីពីការក្រើនរំឭកដល់ប្រជាពលរដ្ឋឱ្យទៅទទួលការចាក់វ៉ាក់សាំងការពារជំងឺកូវីដ-១៩ ដូសទី៣ ឬដូសជំរុញដែលជាវ៉ាក់សាំងកាតព្វកិច្ចនៅក្នុងទីក្រុងភ្នំពេញឱ្យបានគ្រប់ៗគ្នា។
អភិបាលរាជធានីភ្នំពេញរូបនេះបញ្ជាក់ថា ក្នុងករណីចាំបាច់ រដ្ឋបាលរាជធានីភ្នំពេញនឹងធ្វើការរឹតបន្តឹងការត្រួតពិនិត្យសុពលភាពប័ណ្ណវ៉ាក់សាំងកូវីដ-១៩ ដោយមិនអនុញ្ញាតឱ្យបុគ្គលណាមួយដែលគ្មានប័ណ្ណចាក់វ៉ាក់សាំងកូវីដ-១៩ ឬមានប័ណ្ណចាក់វ៉ាក់សាំងដែលគ្មានសុពលភាពសម្រាប់ដូសទី៣ ចូលបម្រើការនៅរោងចក្រ សហគ្រាស មណ្ឌលកម្សាន្ត ផ្សាររដ្ឋ និងគ្រឹះស្ថានសិក្សានោះឡើយ។
លោក ឃួង ស្រេង អះអាងថា ចំពោះបុគ្គលទាំងឡាយណាដែលនៅតែបន្តគេចវេសមិនអនុវត្តកាតព្វកិច្ចទាក់ទងនឹងការទទួលការចាក់វ៉ាក់សាំងការពារជំងឺកូវីដ-១៩ ដូសទី៣ ឬដូសជំរុញដែលជា «វ៉ាក់សាំងកាតព្វកិច្ច» ស្របតាមខ្លឹមសារនៃសេចក្តីជូនដំណឹងនេះ រដ្ឋបាលរាជធានីភ្នំពេញនឹងចាត់វិធានការរដ្ឋបាលស្របតាមច្បាប់ និងលិខិតបទដ្ឋានគតិយុត្តិពាក់ព័ន្ធជាធរមាន។
កាលពីថ្ងៃទី១០ ខែមេសា ប្រមុខរដ្ឋាភិបាលកម្ពុជាបានសាកល្បងដាក់ខេត្តចំនួន៤ រួមមានខេត្តរតនគិរី មណ្ឌលគិរី ស្ទឹងត្រែង និងខេត្តព្រះវិហារ ដែលជាខេត្តមិនតម្រូវឱ្យពលរដ្ឋពាក់ម៉ាស់ទៀតនោះឡើយ។
យោងតាមសេចក្តីប្រកាសព័ត៌មានរបស់ក្រសួងសុខាភិបាល នៅថ្ងៃទី២៦ ខែមេសា ឆ្នាំ២០២២ បានឱ្យដឹងថា នៅថ្ងៃទី២៥ មេសា មានអ្នកឆ្លងជំងឺកូវីដ-១៩ថ្មីដែលបានរកឃើញចំនួន ២នាក់ សុទ្ធតែជាអ្នកឆ្លងប្រភេទអូមីក្រុង និងជាករណីឆ្លងក្នុងសហគមន៍ទាំងអស់។ ចំណែកអ្នកជាសះស្បើយថ្មីវិញ ក្រសួងថាមានចំនួន ២៣នាក់។
បើតាមក្រសួងសុខាភិបាល គិតត្រឹមព្រឹកថ្ងៃអង្គារ ទី២៦ មេសា នេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួនជាង ១សែន ៣ម៉ឺននាក់ (១៣៦២៣០នាក់) ក្នុងនោះអ្នកជំងឺព្យាបាលជាសះស្បើយចំនួនជាង ១សែននាក់ (១៣២៩៦៨នាក់) និងអ្នកស្លាប់មានចំនួនជាង ៣ពាន់នាក់ (៣០៥៦នាក់)។ ចំណែកករណីឆ្លងអូមីក្រុងក្នុងសហគមន៍វិញ ក្រសួងថាគិតមកដល់ពេលនេះបានកើនដល់ ១ម៉ឺន ៤ពាន់នាក់ (១៤៤២៧នាក់)៕