បក្សកុម្មុយនីស្តវៀតណាម ប្ដេជ្ញាចិត្តពង្រីក និងពង្រឹងកិច្ចសហប្រតិបត្តិការ រួមទាំងកិច្ចព្រមព្រៀងទាំងឡាយរបស់ថ្នាក់ដឹកនាំកម្ពុជា និងវៀតណាម ដែលបានព្រមព្រៀងគ្នាកន្លងមកឱ្យកាន់តែប្រសើរឡើង។
តាមរយៈសារលើបណ្ដាញសង្គមហ្វេសប៊ុករបស់លោក ហ៊ុន សែន បានសរសេរនៅថ្ងៃទី២៧ មេសា នេះថា ក្នុងជំនួបពិភាក្សាជាមួយសមាជិកការិយាល័យនយោបាយបក្សកុម្មុយនីស្តវៀតណាម និងជាលេខាបក្សរដ្ឋធានីហាណូយ លោក ឌិញ ទៀនហ្ស៊ុង បានប្ដេជ្ញាពង្រឹងកិច្ចសហប្រតិបត្តិការរវាងរដ្ឋធានីហាណូយ និងរាជធានីភ្នំពេញ។
បើតាមលោក ហ៊ុន សែន ក្នុងជំនួបពិភាក្សាការងារនោះ វៀតណាមថានឹងពង្រីកពង្រឹងមិត្តភាព និងការអនុវត្តឲ្យទទួលបាននូវភាពជោគជ័យនូវរាល់សេចក្តីថ្លែងការណ៍ ក៏ដូចជាកិច្ចព្រមព្រៀងទាំងឡាយរបស់ថ្នាក់ដឹកនាំនៃប្រទេសទាំងពីរដែលបានព្រមព្រៀងគ្នាកន្លងមក។
លោកនាយករដ្ឋមន្ត្រី ហ៊ុន សែន ក៏បានបង្ហាញពីភាពរីកចម្រើននៃទំនាក់ទំនងរវាងប្រទេសទាំងពីរ ស្របពេលទំហំពាណិជ្ជកម្មរវាងកម្ពុជា-វៀតណាមបានកើនឡើងលើសផែនការ ៥ពាន់លានដុល្លារ។
ទោះជាយ៉ាងនេះក្តី លោក ហ៊ុន សែន ថាកម្ពុជា-វៀតណាមនឹងយកចិត្តទុកដាក់បន្ថែមទៀតក្នុងការជំរុញកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម ការកែប្រែតំបន់ដែលធ្លាប់ជាតំបន់ប្រយុទ្ធគ្នាឱ្យទៅជាតំបន់អភិវឌ្ឍន៍ តំបន់សេដ្ឋកិច្ចពិសេស និងពាណិជ្ជកម្មបន្ថែមទៀត រួមជាមួយនឹងការពិនិត្យមើលអ្វីដែលរដ្ឋធានីហាណូយ និងរាជធានីភ្នំពេញ អាចធ្វើការរួមគ្នាបន្តទៀតបាននៅពេលខាងមុខ។
យោងតាមសៀវភៅ ១៣ទសវត្សរ៍នៃដំណើរកម្ពុជា ដែលសរសេរដោយបុរសខ្លាំងកម្ពុជា លោក ហ៊ុន សែន បានសរសេរថា៖ «កម្ពុជា-វៀតណាម ជាធាតុពីរដែលមិនអាចខ្វះមួយណាបានឡើយ»។
កាលពីថ្ងៃទី៨ ខែមករា ឆ្នាំ១៩៧៩ មួយថ្ងៃក្រោយពីរបបកម្ពុជាប្រជាធិបតេយ្យត្រូវដួលរលំ ក្រុមប្រឹក្សាប្រជាជនបដិវត្តន៍កម្ពុជាត្រូវបានបង្កើតឡើង ដើម្បីដឹកនាំប្រទេសកម្ពុជាក្រោមអាណាព្យាបាលរបស់វៀតណាម។ សាធារណរដ្ឋប្រជាមានិតកម្ពុជាត្រូវបានបង្កើតឡើងជាផ្លូវការនៅថ្ងៃទី១២ មករា ដោយមានលោក ហេង សំរិន ជាប្រធានក្រុមប្រឹក្សារដ្ឋ (មានឋានៈស្មើនឹងប្រមុខរដ្ឋ) និងលោក ប៉ែន សុវណ្ណ ជាប្រធានក្រុមប្រឹក្សាគណៈរដ្ឋមន្ត្រី (មានឋានៈស្មើនឹងនាយករដ្ឋមន្ត្រី)។
កាលពីថ្ងៃទី១៧ ខែមករា ឆ្នាំ១៩៧៩ រដ្ឋាភិបាលសាធារណរដ្ឋប្រជាមានិតកម្ពុជា និងរដ្ឋាភិបាលសាធារណរដ្ឋសង្គមនិយមវៀតណាម បានចុះហត្ថលេខាលើសន្ធិសញ្ញាមិត្តភាពសម្រាប់រយៈពេល ២៥ឆ្នាំ។ តាមរយៈសន្ធិសញ្ញានេះ បក្សប្រជាជនបដិវត្តន៍កម្ពុជាបានសុខចិត្តទទួលយកអាណាព្យាបាលវៀតណាមនៅកម្ពុជា ដោយអនុញ្ញាតឲ្យកងទ័ពវៀតណាម ប្រមាណ ១៥ម៉ឺននាក់ឈរជើងនៅលើទឹកដីកម្ពុជា។ នៅក្នុងផ្នែកស៊ីវិលវិញ វៀតណាមបានដាក់អ្នកជំនាញការនៅតាមគ្រប់មន្ទីរ ក្រសួងនៃរដ្ឋាភិបាលសាធារណរដ្ឋប្រជាមានិតកម្ពុជា៕