បុរសខ្លាំងកម្ពុជា លោក ហ៊ុន សែន បញ្ជាឲ្យជ្រើសរើសកងទ័ពជាង ៣០០នាក់សម្រាប់ការពារដែនអាកាសកម្ពុជា ដោយមិនចាំបាច់ប្រើយន្តហោះចម្បាំងនោះទេ ហើយកម្ពុជាមិនមានការចាំបាច់ត្រូវបាញ់នរណាម្នាក់នោះដែរ។
លោក ហ៊ុន សែន ថ្លែងនៅក្នុងពិធីជួបសំណេះសំណាលផ្ដល់រង្វាន់លើកទឹកចិត្តដល់សិស្សប្រឡងជាប់និទ្ទេសអេ (A) ក្នុងការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ឆ្នាំសិក្សា២០២០-២០២១ សរុប ១៧៥៣នាក់ នៅថ្ងៃទី៣ ខែឧសភា ឆ្នាំ២០២២ ថា កន្លងទៅមានការអត្ថាធិប្បាយខ្លះលើកឡើងថា កម្ពុជាខ្វះយន្តហោះចម្បាំង ខ្វះនាវាមុជទឹក។ លោក ហ៊ុន សែន ថាកម្ពុជាមិនចាំបាច់ប្រើយន្តហោះចម្បាំងនោះទេ ព្រោះមិនមានការចាំបាច់ត្រូវបាញ់នរណា ប៉ុន្តែលោកថាអ្វីដែលគួរមាន គឺសំណាញ់មេឃ ឬកម្លាំងការពារអាកាសកម្ពុជា។
លោកនាយករដ្ឋមន្ត្រីដែលកាន់អំណាចយូរជាងគេនៅអាស៊ី បានលើកឡើងថា លោកនិយាយឱ្យច្បាស់ លោកទើបនឹងចុះហត្ថលេខាលើអនុក្រឹត្យបង្កើតឱ្យរើសកងទ័ពចំនួនជាង ៣០០នាក់សម្រាប់តែផ្នែកបំពេញបន្ថែមឱ្យការពារដែនអាកាស។
លោកនាយករដ្ឋមន្ត្រីអះអាងថា កម្ពុជាមិនមានការចាំបាច់ក្នុងការប្រើប្រាស់យន្តហោះចម្បាំងនេះទេ ហើយលោកចង់ប្រើប្រាស់ «សំណាញ់មេឃ» វិញ។ ពាក្យថាសំណាញ់មេឃនេះ គឺលោកចង់មានន័យថា «កម្លាំងការពារដែនអាកាសពីខាងក្រោម»។ លោកអះអាងថា មានមនុស្សខ្លះនៅតែមិនយល់ ហើយមិនព្រមឈ្វេងយល់ពីអ្វីដែលលោកចង់និយាយនោះឡើយ។
លោក ហ៊ុន សែន បន្ថែមថា លោកធ្លាប់ដឹងហើយពីប្រសិទ្ធភាពរបស់យន្តហោះចម្បាំង ខណៈនៅសម័យរដ្ឋកម្ពុជាក៏មានដែរ តែមិនដែលប្រើឡើយ។ លោកថាយន្តហោះមិច កម្ពុជាមិនប្រើទេ ពីព្រោះនៅក្នុងអតីតរដ្ឋកម្ពុជាមានយន្តហោះមិចនេះរាប់សិបគ្រឿង។
ការអះអាងរបស់លោក ហ៊ុន សែន នៅពេលនេះ ហាក់ប្រតិកម្មទៅដល់ប្រធានរាជបណ្ឌិត្យសភាកម្ពុជា បណ្ឌិត សុខ ទូច ថ្លែងក្នុងបទបង្ហាញមួយនៅរាជបណ្ឌិត្យសភាក្នុងរាជធានីភ្នំពេញកន្លងមក ក្រោមប្រធានបទ «នយោបាយការបរទេសកម្ពុជានាពេលបច្ចុប្បន្ន»។ នៅក្នុងបទបង្ហាញនោះ បណ្ឌិត សុខ ទូច បានអះអាងថា បើកម្ពុជាគាំទ្រការឈ្លានពានរបស់រុស្ស៊ីទៅលើប្រទេសអ៊ុយក្រែននោះ តើនឹងមានប្រទេសណាជួយកម្ពុជា បើសិនមានអ្នកញុះញង់វៀតណាមឱ្យវាយលុកចូលកម្ពុជា។
លោកបន្តថា បើសិនមានការលុកលុយពីប្រទេសដទៃ គឺកម្ពុជាខ្វះលទ្ធភាពទប់ទល់ចំនួន ៤ចំណុច បើធៀបទៅនឹងប្រទេសជិតខាង គឺកម្ពុជាគ្មាននាវាមុជទឹក គ្មានយន្តហោះចម្បាំង គ្មានកាតព្វកិច្ចចូលបម្រើកងទ័ព ហើយរីឯកងទ័ពដែលកម្ពុជាមានវិញ គឺសម្បូរដោយឧត្តមសេនីយ៍ក្បាលពោះធំ។
លោកនាយករដ្ឋមន្ត្រី ហ៊ុន សែន ធ្លាប់បានប្រកាសទាត់ចោលចំពោះការអត្ថាធិប្បាយរបស់ប្រធានរាជបណ្ឌិត្យសភាកម្ពុជា បណ្ឌិត សុខ ទូច ដោយអះអាងថា ការអត្ថាធិប្បាយនេះមិនតំណាងឱ្យនយោបាយការបរទេសកម្ពុជានោះទេ។ លោក ហ៊ុន សែន អះអាងថា កម្ពុជាអនុវត្តនយោបាយការបរទេសផ្អែកលើធម្មនុញ្ញរបស់អង្គការសហប្រជាជាតិ ដោយមិនអនុវត្តនយោបាយការបរទេសផ្អែកលើកម្លាំងនោះឡើយ។
កាលពីថ្ងៃទី១០ ខែសីហា ឆ្នាំ២០២១ កន្លងមក រដ្ឋាភិបាលកម្ពុជាបានសម្រេចអនុញ្ញាតឱ្យក្រសួងការពារជាតិ ជ្រើសរើសពលទាហានចំនួន ៤៧នាក់ ដើម្បីបំពេញក្របខ័ណ្ឌឲ្យកងឯកភាពសម្រាប់ក្រុងបូកគោ ខេត្តកំពត ដែលទើបបង្កើតថ្មី ស្របពេលដែលរដ្ឋាភិបាលប្រកាសថានឹងគ្មានការជ្រើសរើសបុគ្គលិកមន្ត្រីរាជការក្របខ័ណ្ឌថ្មីនោះទេសម្រាប់ឆ្នាំ២០២១ កន្លងទៅ៕