27 C
Phnom Penh

គ្រួសារ​សកម្មជន​បក្ស​សង្គ្រោះ​ជាតិ​ថា​តុលាការ​កំពូល​កាត់ទោស​ប្ដី​ដោយ​អយុត្តិធម៌

ដោយ ឌឹ ខេមបូឌា ដេលី

បទវិភាគ

ភរិយា​សមាជិក​គណបក្ស​សង្គ្រោះ​ជាតិ ថា​ការ​សម្រេច​របស់​តុលាការ​កំពូល​ឱ្យ​ប្ដី​របស់​គាត់​ជាប់​ពន្ធនាគារ ៧​ឆ្នាំ​ទាក់ទង​ទៅ​នឹង​ការ​បង្ហោះ​សារ​គាំទ្រ​ដំណើរ​មាតុភូមិ​និវត្តន៍​របស់​លោក សម រង្ស៊ី ក្នុង​ព្រឹត្តិការណ៍ ៩ វិច្ឆិកា លើ​បណ្ដាញ​សង្គម​ហ្វេសប៊ុក គឺជា​រឿង​អយុត្តិធម៌​បំផុត។

នៅ​ថ្ងៃ​ពុធ ទី​៤ ខែ​ឧសភា នេះ ប្រធាន​ក្រុមប្រឹក្សា​ជំនុំជម្រះ​តុលាការ​កំពូល បាន​សម្រេច​បដិសេធ​បណ្ដឹង​សារទុក្ខ​របស់​សមាជិក​គណបក្ស​សង្គ្រោះ​ជាតិ លោក គង់ សំអាន ដោយ​ចាត់ទុក​ការ​សម្រេច​របស់​តុលាការ​ថ្នាក់​ក្រោម​ថា​ជា​រឿង​ត្រឹមត្រូវ។

សាលា​ឧទ្ធរណ៍​ខេត្ត​ត្បូងឃ្មុំ កាលពី​ឆ្នាំ​២០២០ បាន​ប្រកាស​សាលដីកា​ដោយ​សម្រេច​ឱ្យ​លោក គង់ សំអាន ជាប់​ពន្ធនាគារ ៧​ឆ្នាំ ក្រោម​បទ​ចោទប្រកាន់ «រួម​គំនិត​ក្បត់» ជុំវិញ​ការ​បង្ហាញ​សារ​គាំទ្រ​លោក សម រង្ស៊ី លើ​ហ្វេសប៊ុក។ ដោយ​មិន​សុខ​ចិត្ត​នឹង​ការ​សម្រេច​នេះ លោក គង់ សំអាន បាន​ប្ដឹង​សារទុក្ខ​មក​តុលាការ​កំពូល​ឱ្យ​ជួយ​ផ្ដល់​យុត្តិធម៌​ដល់​ខ្លួន ក្រោយពី​តុលាការ​ថ្នាក់​ក្រោម​កាត់ទោស​ឱ្យ​លោក​ជាប់​ពន្ធនាគារ ៧​ឆ្នាំ។

លោកស្រី អៀប សួគ៌ ដែល​ជា​ភរិយា​របស់​លោក គង់ សំអាន បង្ហាញ​ការ​ខកចិត្ត​ដែល​តុលាការ​ជាន់ខ្ពស់​មួយ​នេះ​នៅតែ​កាត់​ឱ្យ​ប្ដី​របស់​គាត់​ជាប់​ពន្ធនាគារ ៧​ឆ្នាំ ទាំង​ប្ដី​របស់​លោកស្រី​មិន​បាន​ធ្វើ​ខុស​អ្វី។ អ្នកស្រី​បន្ត​ថា ប្ដី​របស់​គាត់​ធ្វើ​គ្រូបង្រៀន​បម្រើ​ជាតិ​រហូត​ដល់​អាយុ ៧០​ឆ្នាំ បែរជា​មក​ត្រូវ​ជាប់​គុក​ទៅវិញ។

អ្នកស្រី​ចាត់ទុក​ការ​សម្រេច​របស់​តុលាការ​កំពូល​ជា​រឿង​អយុត្តិធម៌ ព្រោះ​ប្ដី​របស់​គាត់​មិន​បាន​ធ្វើ​ខុស​ទេ។ លោកស្រី​ថា លោកស្រី​ខំ​ឡើង​មក​សុំ​ឱ្យ​តុលាការ​កំពូល​ជួយ បែរជា​តុលាការ​កំពូល​យក​ក្រដាស​មក​សូត្រ​ដដែល​វិញ។ តើ​យុត្តិធម៌​នៅ​ទីណា?

ប្រាប់​អ្នក​សារព័ត៌មាន​ក្រោយ​ចេញពី​បន្ទប់​សវនាការ លោក គង់ សំអាន បាន​ចាត់ទុក​ការ​សម្រេច​របស់​តុលាការ​កំពូល​ពេល​នេះ ថា​ជា​រឿង​អយុត្តិធម៌​សម្រាប់​រូប​គាត់ និង​គ្រួសារ។ លោក​ថា វា​ជា​រឿង​អយុត្តិធម៌​ដែល​លោក​មិន​អាច​ទទួល​យក​បាន​នោះ​ទេ​ចំពោះ​ការ​សម្រេច​នេះ។

នាយក​ទទួល​បន្ទុក​កិច្ចការ​ទូទៅ​នៃ​អង្គការ​លីកាដូ លោក អំ សំអាត ថា​ការ​សម្រេច​របស់​តុលាការ​កំពូល គឺជា​រឿង​អយុត្តិធម៌​សម្រាប់​លោក គង់ សំអាន និង​គ្រួសារ​របស់​គាត់។ លោក​ថា នៅ​ក្នុង​ដំណើរការ​នៃ​សវនាការ​ចាប់ពី​ថ្នាក់​សាលាដំបូង​ដល់​សាលា​ឧទ្ធរណ៍ វា​ហាក់ដូចជា​មិន​មាន​ភស្តុតាង​ក្នុង​ការ​ចោទប្រកាន់ និង​ផ្ដន្ទាទោស​លើ​គាត់។ លោក​យល់​ថា រឿង​នេះ​វា​ជា​សំណុំរឿង​ពាក់ព័ន្ធ​នឹង​នយោបាយ។

កាលពី​ខែ​កុម្ភៈ ឆ្នាំ​២០២០ សាលាដំបូង​ខេត្ត​ត្បូងឃ្មុំ បាន​កាត់ទោស​ឱ្យ​សកម្មជន​បក្ស​សង្គ្រោះ​ជាតិ​ដែល​ត្រូវ​តុលាការ​រំលាយ​ចំនួន ៧​នាក់​ក្នុង​សំណុំរឿង «រួម​គំនិត​ក្បត់» ក្នុង​នោះ​មាន​ជន​ជាប់ចោទ ២​នាក់​ជាប់​ពន្ធនាគារ ៥​ឆ្នាំ ខណៈ​ជន​ជាប់ចោទ ៥​នាក់​ទៀត​ជាប់​ពន្ធនាគារ​ចំនួន ៧​ឆ្នាំ ប៉ុន្តែ​ក្នុង​ចំណោម​ជន​ជាប់ចោទ​ទាំង ៧​នាក់ អ្នក​ដែល​ជាប់​ពន្ធនាគារ គឺ​មាន​តែ​លោក គង់ សំអាន នោះ​ទេ។

កាល​ថ្ងៃ​ទី​១៤ ខែ​វិច្ឆិកា ឆ្នាំ​ដដែល លោក​នាយករដ្ឋមន្ត្រី ហ៊ុន សែន មាន​ប្រសាសន៍​ពី​ខេត្ត​កំពត ដោយ​អំពាវនាវ​ឱ្យ​ពលរដ្ឋ​ដែល​ចាញ់បោក​ក្រុម​លោក សម រង្ស៊ី ហើយ​រត់​ទៅ​ប្រទេស​ថៃ វិល​ត្រឡប់​ចូល​មក​ប្រទេស​កម្ពុជា​វិញ ដោយ​សន្យា​មិន​យក​ទោសពៃរ៍​អ្វី​នោះ​ឡើយ។ លើស​ពី​នេះ លោក​ថែម​ទាំង​បញ្ជា​ទៅ​សមត្ថកិច្ច​មិន​ឱ្យ​មាន​ការ​ចាប់​ខ្លួន​អ្នក​ពាក់ព័ន្ធ​ព្រឹត្តិការណ៍ ៩ វិច្ឆិកា ថែម​ទៀត​ផង។

ជាមួយ​គ្នា​នោះ លោក​ក៏​បាន​ស្នើ​ទៅ​រដ្ឋមន្ត្រី​ក្រសួង​យុត្តិធម៌ ត្រូវ​ធ្វើការ​ជាមួយ​មន្ត្រី​តុលាការ ដើម្បី​ដក​ដីកា​ដែល​បាន​ចេញ​ចាប់​ខ្លួន​ជន​មួយ​ចំនួន ព្រមទាំង​ដោះលែង​អ្នក​ដែល​បាន​ចាប់​ខ្លួន​ពាក់ព័ន្ធ​សំណុំរឿង ៩ វិច្ឆិកា ដោយ​លោក​ថា ពួក​សកម្មជន​ទាំងនោះ​ចាញ់បោក​ការ​ឃោសនា​របស់​ក្រុម​លោក សម រង្ស៊ី តែប៉ុណ្ណោះ។

សកម្មជន​គណបក្ស​សង្គ្រោះ​ជាតិ​ដែល​កំពុង​ជាប់ចោទ​ក្នុង​សំណុំរឿង «ញុះញង់​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម ញុះញង់​ឱ្យ​យោធិន​មិន​ស្ដាប់​បញ្ជា និង​រួម​គំនិត​ក្បត់» ពាក់ព័ន្ធ​នឹង​ដំណើរការ​មាតុភូមិ​និវត្តន៍​របស់​លោក សម រង្ស៊ី និង​មន្ត្រី​ជាន់ខ្ពស់​គណបក្ស​ប្រឆាំង​កាលពី​ថ្ងៃ​ទី​៩ ខែ​វិច្ឆិកា ឆ្នាំ​២០១៩៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស