31 C
Phnom Penh

លោក កឹម សុខា ថា​ទូត​ប្រទេស​ស្វីស​យកចិត្ត​ទុកដាក់​ពី​ស្ថានភាព​ប្រជាធិបតេយ្យ​នៅ​កម្ពុជា

ដោយ ឌឹ ខេមបូឌា ដេលី

បទវិភាគ

មេដឹកនាំ​បក្ស​ប្រឆាំង​ដែល​កំពុង​រង​ការ​រឹតត្បិត​សេរីភាព លោក កឹម សុខា អះអាង​ថា ឯកអគ្គរដ្ឋទូត​ប្រទេស​ស្វីស បាន​តាមដាន​យ៉ាង​យកចិត្ត​ទុកដាក់​ពី​ស្ថានភាព​ប្រជាធិបតេយ្យ និង​សិទ្ធិមនុស្ស​នៅ​កម្ពុជា និង​សិទ្ធិ​សេរីភាព​របស់​លោក និង​ក្រុម​គ្រួសារ​ដែល​ទទួល​រង​នូវ​សម្ពាធ​អស់​រយៈពេល​ជិត ៥​ឆ្នាំ​កន្លងមក​នេះ។

ប្រធាន​គណបក្ស​សង្គ្រោះ​ជាតិ ដែល​មិន​មាន​សេរីភាព​ពេញលេញ​ឡើងវិញ បាន​សរសេរ​លើ​គណនី​ហ្វេសប៊ុក​របស់​លោក​នៅ​ថ្ងៃទី​២៦ ខែ​ឧសភា ឆ្នាំ​២០២២ ថា ឯកអគ្គរដ្ឋទូត និង​សហការី​នៃ​ប្រទេស​ស្វីស ប្រចាំ​នៅ​កម្ពុជា ថៃ និង​ប្រទេស​ឡាវ បាន​មក​ជួប​ពិភាក្សា​ការងារ​ជាមួយ​លោក​ដល់​គេហដ្ឋាន អំពី​ស្ថានភាព​ប្រជាធិបតេយ្យ និង​សិទ្ធិមនុស្ស​នៅ​កម្ពុជា និង​សិទ្ធិ​សេរីភាព​របស់​លោក​ដែល​កំពុង​ជាប់​បម្រាម​សព្វថ្ងៃ​នេះ។

លោក​ក៏​បាន​ថ្លែង​អំណរគុណ​ដល់​រដ្ឋាភិបាល​ស្វីស ដែល​បាន​យកចិត្ត​ទុកដាក់​លើ​សុខភាព​របស់​លោក ដែល​បាន​បញ្ជូន​វេជ្ជបណ្ឌិត​ជំនាញ​ពី​ទីក្រុង​ហ្សឺណែវ ប្រទេស​ស្វីស មក​ពិនិត្យ​សុខភាព​លោក​ដល់​គេហដ្ឋាន​រហូត​មក។

លោក កឹម សុខា បញ្ជាក់​ថា ប្រទេស​ស្វីស គឺជា​ប្រទេស​មួយ​ដែល​មនុស្ស​ជាច្រើន​ក្នុង​ពិភពលោក​ប្រាថ្នា​ចង់​យក​មក​ធ្វើ​ជា​គំរូ ចង់​រស់នៅ​ក្នុង​សង្គម​មួយ​ដែល​រដ្ឋាភិបាល​ស្វីស កំពុង​ដឹកនាំ​សព្វថ្ងៃ​នេះ។ លោក​ថា ប្រទេស​ស្វីស បច្ចុប្បន្ន​នេះ​គឺជា​ប្រទេស​ដែល​មាន​សន្តិភាព​ពិតប្រាកដ មាន​អព្យាក្រឹតភាព ប្រជាធិបតេយ្យ សិទ្ធិ​សេរីភាព​ពេញលេញ ខណៈ​ប្រជាជន​ស្វីស​ពោរពេញ​ដោយ​សុខមាលភាព និង​មាន​ជីវភាព​ខ្ពង់ខ្ពស់​ថែម​ទៀត។

ការ​អះអាង​របស់​មេដឹកនាំ​បក្ស​ប្រឆាំង​បែបនេះ ធ្វើឡើង​ស្រប​ពេល​ដែល​សេរីភាព​របស់​លោក​កំពុង​ត្រូវ​បាន​រឹតត្បិត​ក្រោម​ការ​ចោទប្រកាន់​ដែល​គេ​មើល​ឃើញ​ថា​មាន​ភាព​អយុត្តិធម៌ ក្នុង​ហេតុផល​នយោបាយ។

លោក កឹម សុខា ត្រូវ​បាន​ចាប់​ខ្លួន​កាលពី​ថ្ងៃ​ទី​៣ ខែ​កញ្ញា ឆ្នាំ​២០១៧ ពី​បទ​ឃុបឃិត​ជាមួយ​រដ្ឋ​បរទេស ដើម្បី​ផ្តួល​រំលំ​រដ្ឋាភិបាល​កម្ពុជា ប៉ុន្តែ​រហូត​មក​ទល់​នឹង​ពេលនេះ តុលាការ​កម្ពុជា​មិន​បាន​ធ្វើ​កំណត់​ទូត​ណា​មួយ​ទៅកាន់​ក្រសួង​យុត្តិធម៌​រដ្ឋ​បរទេស​ដែល​ខ្លួន​បាន​ចោទប្រកាន់​ថា បាន​ឃុបឃិត​ជាមួយ​លោក កឹម សុខា ចូល​ទៅ​បំភ្លឺ​ក្នុង​សវនាការ​នៅឡើយ​ទេ ខណៈ​សំណុំរឿង​របស់​លោក កឹម សុខា ចេះ​តែ​បន្ត​អូស​បន្លាយ​គ្មាន​ពេល​កំណត់។

ទាក់ទិន​នឹង​បញ្ហា​នេះ កាលពី​ថ្ងៃទី​១៣ ខែ​ឧសភា ឆ្នាំ​២០២២ កន្លងទៅ រដ្ឋមន្ត្រី​ការបរទេស​សហរដ្ឋ​អាមេរិក លោក អេនតូនី ប្លីងខេន (Antony Blinken) បាន​ចេញ​សេចក្តី​ប្រកាស​ព័ត៌មាន​របស់​ខ្លួន​ឲ្យ​កម្ពុជា​ទម្លាក់​ចោល​បទ​ចោទប្រកាន់​លើ​ប្រធាន​គណបក្ស​សង្គ្រោះ​ជាតិ លោក កឹម សុខា និង​អនុញ្ញាត​ឱ្យ​មេដឹកនាំ​បក្ស​ប្រឆាំង​រូប​នេះ​មាន​សិទ្ធិ​ពេញលេញ​ក្នុង​ការ​ចូលរួម​កិច្ចការ​នយោបាយ​ដោយ​សេរី ជាពិសេស​គឺ​អាច​ចូលរួម​ការ​បោះឆ្នោត​នា​ពេល​ខាងមុខ​នេះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស