29 C
Phnom Penh

បទវិភាគ​ព័ត៌មាន៖ តំបន់​ដុនបាស​នៅ​ភាគ​ខាងកើត​អ៊ុយក្រែន​នៅតែ​ជា​ថ្នូរ​នៃ​ការ​បញ្ចប់​សង្គ្រាម

ដោយ ឌឹ ខេមបូឌា ដេលី

បទវិភាគ

នៅ​សល់​តែ ៤​ថ្ងៃ​ទៀត​ប៉ុណ្ណោះ សង្គ្រាម​រុស្ស៊ី​ឈ្លានពាន​បាន​ឈាន​ដល់ ១០០​ថ្ងៃ​ហើយ។ អំឡុង​នៃ​សង្គ្រាម​ជិត ១០០​ថ្ងៃ​មក​នេះ កងទ័ព​នៃ​មហាអំណាច​រុស្ស៊ី​ដែល​បាន​លើក​ទ័ព​ដល់​ទៅ ២០​ម៉ឺន​នាក់ វាយ​លុកលុយ​ប្រទេស​អ៊ុយក្រែន គឺ​បាន​វាយ​កាន់កាប់​តែ​សមរភូមិ​ចំនួន ២ ប៉ុណ្ណោះ គឺ​សមរភូមិ​មួយ​នៅ​ក្រុង Kherson ដែល​ជា​ទីក្រុង​តូច​មួយ​នៅ​ភាគ​និរតី​នៃ​រដ្ឋធានី​គៀវ។ ចំណែក​ឯ​សមរភូមិ​មួយ​ទៀត គឺ​ទីក្រុង​កំពង់ផែ Mariupol ដែល​ស្ថិតនៅ​ភាគ​អាគ្នេយ៍​ប្រទេស​អ៊ុយក្រែន។

ក្នុង​អំឡុង​នៃ​សង្គ្រាម​នេះ កងទ័ព​រុស្ស៊ី​ត្រូវ​បាន​រាយការណ៍​មក​ថា​បាន​បាត់បង់​អាយុជីវិត​កងទ័ព​ដល់​ទៅ ៣០៥០០​នាក់ ធ្លាក់​យន្តហោះ​ចម្បាំង និង​ឧទ្ធម្ភាគចក្រ​ដល់​ជិត ៤០០​គ្រឿង រថក្រោះ​ត្រូវ​បាន​កងទ័ព​អ៊ុយក្រែន​បាញ់​កម្ទេច និង​រឹបអូស​បាន​ចំនួន ១៣៥៨​គ្រឿង និង​រថពាសដែក​ជាង ៣៣០០​គ្រឿង ហើយ​ប្រព័ន្ធ​កាំភ្លើង​ធំ ៦៤៩​គ្រឿង។ នេះ​បើ​តាម​ការ​ចុះផ្សាយ​ដោយ​បណ្ដាញ​ផ្សាយ​ព័ត៌មាន The New Voice of Ukraine។

បើ​ប្រៀបធៀប​អំពី​ស្ថានភាព​សហភាព​សូវៀត លើក​ទ័ព​ឈ្លានពាន​ប្រទេស​អាហ្វហ្គានីស្ថាន វិញ រហូត​សហភាព​សូវៀត​ដក​ទ័ព​ត្រឡប់​ទៅ​ប្រទេស​ខ្លួន​វិញ គឺ​សង្គ្រាម​មាន​រយៈពេល​ជិត ១០​ឆ្នាំ។ សង្គ្រាម​នៅ​ពេល​នោះ​បាន​ផ្ទុះ​ឡើង​នៅ​ឆ្នាំ​១៩៧៩ ដល់​ឆ្នាំ​១៩៨៩។ សង្គ្រាម​បិទ​បញ្ចប់​នៅ​អាហ្វហ្គានីស្ថាន បន្ទាប់ពី​រុស្ស៊ី​បាន​ដក​ទ័ព​ត្រឡប់​ទៅវិញ​ចំ​ពេល​សហភាព​សូវៀត​កំពុង​ធ្វើ​ដំណើរ​ទៅ​រក​ការ​ដួល​រលំ។ សង្គ្រាម​រុស្ស៊ី និង​កងទ័ព​ព្រៃ​អាហ្វហ្គានីស្ថាន Mujahideen នៅ​ពេល​នោះ បើ​និយាយ​អំពី​ភាគី​រុស្ស៊ី វិញ គឺ​រុស្ស៊ី​ស្លាប់​កងទ័ព ១៤៤៥៣​នាក់ របួស​ជាង ៥​ម៉ឺន ៣​ពាន់​នាក់ និង​បាត់​ខ្លួន ២៦៤​នាក់ ធ្លាក់​យន្តហោះ​ចម្បាំង ៤៥១​គ្រឿង និង​ឧទ្ធម្ភាគចក្រ ៣៣៣​គ្រឿង រថក្រោះ ទ័ព​ព្រៃ​បាញ់​ឆេះ និង​រឹបអូស ១៤៧​គ្រឿង និង​រថពាសដែក ១៣១៤​គ្រឿង ចំណែកឯ​ប្រព័ន្ធ​កាំភ្លើង​ធំ​ត្រូវ​បាន​ទ័ព Mujahideen រឹបអូស និង​បាញ់​កម្ទេច​អស់ ៤៣៣​គ្រឿង។

សង្គ្រាម​នៅ​ពេល​នោះ សហភាព​សូវៀត​លើក​ទ័ព​ឈ្លានពាន​អាហ្វហ្គានីស្ថាន គឺ​មាន ២៥​ម៉ឺន​នាក់។ ផ្ទុយទៅវិញ សង្គ្រាម​នៅ​លើ​ទឹកដី​អ៊ុយក្រែន​វិញ​តែ​ជាង ៤​ខែ​បន្តិច​នេះ គឺ​ចំនួន​កងទ័ព​រុស្ស៊ី​ស្លាប់​ច្រើន​ជាង​សង្គ្រាម​នៅ​អាហ្វហ្គានីស្ថាន​ដល់​ទៅ​ជិត ៣​ដង ហើយ​ចំនួន​ខូចខាត​សព្វាវុធ គឺ​ច្រើន​លើសលប់។

តែ​ទោះជា​បែប​នេះ​ក្ដី រដ្ឋមន្ត្រី​ការបរទេស​រុស្ស៊ី ហ្សេហ្គេ ឡារ៉ូវ បាន​ថ្លែង​ជំនួស​លោក​ប្រធានាធិបតី វ៉្លាឌីមៀរ ពូទីន ថា នឹង​មិន​មាន​តម្លៃ​ការ​ចរចា​នោះ​ទេ បើ​តំបន់​ដុនបាស​ត្រូវ​វាយ​រំដោះ​បាន​ដោយ​កងទ័ព​រុស្ស៊ី។ នេះ​បើ​យោង​តាម​ការ​ធ្វើ​សេចក្ដី​រាយការណ៍​ពី​ទីភ្នាក់ងារ​សារព័ត៌មាន Reuters ដែល​បាន​ចុះផ្សាយ​កាលពី​ថ្ងៃ​ទី​៣០ ឧសភា។

បើ​តាម​ប្រមុខ​ការទូត​រុស្ស៊ី​រូប​នេះ ការ​ចរចា​នឹង​មិន​អាច​និយាយ​យោង​ដល់​តំបន់​ដុនបាស​នោះ​ទេ ព្រោះ​សភា និង​ប្រធានាធិបតី ពូទីន បាន​ចុះ​ក្រឹត្យ​ទទួលស្គាល់​ជា​តំបន់​ផ្ដាច់ខ្លួន​ពី​អ៊ុយក្រែន​ទៅ​ហើយ។

ដុនបាស់ មាន​ខេត្ត​ធំ​២ គឺ​ខេត្ត Donetsk និង Luhansk។ តំបន់​នេះ​ស្ថិតនៅ​ភាគ​ខាងកើត​ប្រទេស និង​មាន​ផ្ទៃដី​ជាង ២​ម៉ឺន ៦​ពាន់​គីឡូម៉ែត្រ​ក្រឡា ហើយ​មាន​ប្រជាជន​រស់នៅ​មុន​សង្គ្រាម​ជាង ៤​លាន​នាក់ ក្នុង​នោះ​មាន​ប្រជាជន​រុស្ស៊ី ផង​ដែរ។ ដុនបាស​ជា​តំបន់​ជាប់​ផ្ទាល់​នឹង​ព្រំដែន​រុស្ស៊ី តែ​តំបន់​នេះ​សម្បូរ​ដោយ​រ៉ែ​ធ្យូងថ្ម និង​ឧស្ម័ន។

លោក ហ្សេហ្គេ ឡារ៉ូវ បាន​ឱ្យ​ដឹង​ថា ក្រៅពី​តំបន់​នេះ ភាគី​អ៊ុយក្រែន​អាច​លើក​មក​ចរចា​បាន បើ​ភាគី​អ៊ុយក្រែន​ចង់​ត​ថ្លៃ​ជាមួយ​តម្លៃ​ការ​សុំ​សន្តិភាព​ពី​រុស្ស៊ី។ តាម​ដំណឹង​ចុងក្រោយ​ ពី​សារព័ត៌មាន The New Voice of Ukraine ក្នុង​ផ្ទៃដី​ដ៏​ធំ​នៅ​តំបន់​ដុនបាស គឺ​កងទ័ព​រុស្ស៊ី មិន​ទាន់​គ្រប់គ្រង​បាន​ទាំងស្រុង​នោះ​ទេ។ ការ​វាយ​ប្រយុទ្ធ​គ្នា​កំពុង​ពុះ​កញ្ជ្រោល​យ៉ាង​ខ្លាំង ទោះជា​កងទ័ព​រុស្ស៊ី​មាន​ប្រៀប​ជាង​កងទ័ព​អ៊ុយក្រែន​ក៏ដោយ។ មក​ដល់​ពេលនេះ ដុនបាស​ទាំងមូល គឺ​មាន​តំបន់​មួយ​ប៉ុណ្ណោះ​ដែល​ធ្លាក់​នៅ​ក្រោម​កងទ័ព​រុស្ស៊ី គឺ​ទីក្រុង Lyman ជា​ចំណត​ស្ថានីយ​រថភ្លើង​ក្នុង​ខេត្ត Donetsk។ ការ​វាយ​ប្រយុទ្ធ​គ្នា​នៅ​តំបន់​នេះ រុស្ស៊ី​បង្កើន​កងទ័ព​រហូត​ដល់​ជាង ១០​ម៉ឺន​នាក់ ដោយ​ប្រតិបត្តិការ​សឹក​ធ្វើឡើង​ដោយ​កង​អង្គភាព​រថក្រោះ កង​អង្គភាព​កាំភ្លើង​ធំ កង​អង្គភាព​កាំជ្រួច និង​កម្លាំង​ទ័ព​អាកាស។

ប្រមុខ​ការទូត​រុស្ស៊ី បាន​បញ្ជាក់​ទៀត​ថា ខេត្ត Donetsk និង Luhansk គឺជា​សាធារណរដ្ឋ​ផ្ដាច់ខ្លួន​ពី​អ៊ុយក្រែន ហើយ​ការ​លើក​ទ័ព​រុស្ស៊ី វាយ​យក​តំបន់​នេះ គឺជា​ការ​វាយ​ដើម្បី​រំដោះ​ប្រជាជន​រុស្ស៊ី និង​ប្រជាជន​ដែល​និយាយ​ភាសា​រុស្ស៊ី ដោយ​លោក​ចាត់ទុក​ថា ពួកគេ​ក្លាយ​ជា​ជនរងគ្រោះ​ដោយ​អំពើ​ប្រល័យ​ពូជសាសន៍​ពី​សំណាក់​កងទ័ព​អ៊ុយក្រែន។

ចុះ​ហេតុ​អ្វី​បាន​ជា​លោក ហ្សេហ្គេ ឡារ៉ូវ អះអាង​ថា បើ​ដុនបាស​ធ្លាក់​ក្រោម​ការ​កាន់កាប់​ដោយ​កងទ័ព​រុស្ស៊ី គឺ​អ៊ុយក្រែន​ពុំ​មាន​សិទ្ធិ​លើក​មក​ចរចា​ជាមួយ​នឹង​រុស្ស៊ី?

ការពិត ខេត្ត​ទាំង​ពីរ​នៅ​តំបន់​ដុនបាស​នេះ ត្រូវ​បាន​លោក ពូទីន ចុះ​ក្រឹត្យ​ទទួលស្គាល់​ជា​ដែនដី​របស់​រុស្ស៊ី​ទៅ​ហើយ គឺ​នៅ​មុន​ដែល​មេដឹកនាំ​ផ្ដាច់ការ​ម្នាក់​នេះ​បញ្ជា​ឱ្យ​លើក​ទ័ព​លុកលុយ​ប្រទេស​អ៊ុយក្រែន នៅ​ថ្ងៃទី​២៤ កុម្ភៈ។

ទោះជា​យ៉ាង​ណា​ក្តី ប្រធានាធិបតី​អ៊ុយក្រែន លោក វ៉ូឡូឌីមៀ ហ្សេឡេនស្គី បាន​សច្ចា​ហើយ​ថា ទោះ​តម្លៃ​ណា​ក៏ដោយ​ក៏​លោក​មិន​សម្រេច​ចុះហត្ថលេខា​កាត់​ទឹកដី​មួយ​ចម្រៀក​ណា​មួយ​ជា​ការ​បញ្ចប់​សង្គ្រាម ឬ​ជា​ថ្នូរ​នឹង​សន្តិភាព​ឡើយ។

លោក​បាន​អះអាង​ថា អ៊ុយក្រែន​នឹង​ទទួល​បាន​ជ័យជម្នះ​លើ​សមរភូមិ ប៉ុន្តែ​លោក​ថា​មាន​តែ​ការ​ចរចា​ដោយ​ស្មើភាព​ទើប​អាច​បិទ​បញ្ចប់​សង្គ្រាម​បាន ហើយ​ការ​ចរចា​នេះ​មាន​តែ​រូបលោក និង​លោក ពូទីន ជួប​គ្នា​ប៉ុណ្ណោះ។

ប៉ុន្តែ​សំណួរ​នៅ​ត្រង់​ថា តើ​ថា​សង្គ្រាម​នឹង​បញ្ចប់​នៅ​ពេល​ណា ហើយ​នៅ​ក្រោម​លក្ខខណ្ឌ​អ្វី​ខ្លះ?

ការ​ចរចា​ដើម្បី​បញ្ចប់​សង្គ្រាម​នៅ​អ៊ុយក្រែន បាន​អូស​បន្លាយ​ពេល​ច្រើន​ជាង ៣​ខែ​មក​ហើយ ត្រូវ​បាន​គេ​ឃើញ​ថា បញ្ហា​ទឹកដី​ដែល​ក្រុង​មូស្គូ​ប៉ុនប៉ង​វាយ​យក​ពី​អ៊ុយក្រែន គឺជា​កត្តា​ចាំបាច់​បំផុត ហើយ​បន្ទាប់មក គឺ​រុស្ស៊ី​ដាក់​លក្ខខណ្ឌ​ឱ្យ​អ៊ុយក្រែន​ប្រកាន់​យក​របប​យោធា​អព្យាក្រឹត គឺ​មិន​ត្រូវ​ចូល​បក្ស​សម្ព័ន្ធ​យោធា​ជាមួយ​នឹង​ក្រុម​ណា​មួយ​ដាច់ខាត ដោយ​រាប់​ទាំង​អង្គការ​យោធា​ណាតូ​ផង​ដែរ។

បើ​និយាយ​យោង​ដល់​ទឹកដី ថា​តើ​គេ​គួរតែ​ឱ្យ​រុស្ស៊ី​កាន់កាប់​ទឹកដី​ដែល​កងទ័ព​របស់​ខ្លួន​វាយ​យក​បាន​នៅ​ក្នុង​សង្គ្រាម ឬ​ដូចម្ដេច ឬ​ក៏​អ៊ុយក្រែន​ត្រូវ​វាយ​បណ្ដេញ​ទ័ព​រុស្ស៊ី ឱ្យ​ចេញពី​ទឹកដី​របស់​ខ្លួន ឬ​ដូចម្ដេច ព្រោះ​ថា​បញ្ហា​ទឹកដី​នេះ​កំពុង​ក្លាយ​ជា​ហេតុផល​មួយ​នៃ​ការ​អូស​បន្លាយ​សង្គ្រាម។

ប្រសិនបើ​ប្រធានាធិបតី​អ៊ុយក្រែន លោក វ៉ូឡូឌីមៀ ហ្សេឡេនស្គី ជា​មេដឹកនាំ​ក្បត់​ជាតិ គឺ​ម្ល៉េះ​សម​នឹង​គ្មាន​សង្គ្រាម​កើតឡើង​ទេ។ មិន​តែ​ប៉ុណ្ណោះ លោក ហ្សេឡេនស្គី ក៏​មិន​ត្រូវ​បារម្ភ​អំពី​ការ​បាត់បង់​អំណាច​របស់​លោក​ទៀត​ផង។ បើ​ទឹកដី​បាន​ទៅ​គេ សន្តិភាព​បាន​មក​យើង ហើយ​អំណាច​នៅ​ក្នុង​ដៃ​យើង ក៏​កាន់តែ​រឹងមាំ​ថែម​ទៀត។ លោក​ប្ដេជ្ញា​មិន​ព្រម​រស់​ក្រោម​អាណាព្យាបាល​ក្រោម​នឹម​គេ ជា​រដ្ឋ​ចំណុះ​គេ ដើម្បី​តែ​អំណាច​សម្រាប់​លោក គ្រួសារ និង​បក្សពួក​នោះ​ទេ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស