ថ្នាក់ដឹកនាំគណបក្សភ្លើងទៀន ប្រកាសទទួលយកលទ្ធផលបោះឆ្នោត ទោះបីជាការបោះឆ្នោតក្រុមប្រឹក្សាឃុំ-សង្កាត់អាណត្តិទី៥ នេះ ប្រព្រឹត្តទៅមិនសេរី ត្រឹមត្រូវ និងយុត្តិធម៌ ដើម្បីស្វែងរកការចរចាជាមួយបក្សកាន់អំណាច។
លោក សុន ឆ័យ អនុប្រធានគណបក្សភ្លើងទៀន បានលើកឡើងក្នុងសន្និសីទកាសែតនាថ្ងៃចន្ទ ទី៦ មិថុនា នេះថា គណបក្សភ្លើងទៀនគ្មានផែនការដើម្បីធ្វើបាតុកម្មប្រឆាំងនឹងលទ្ធផលបោះឆ្នោតឡើយ ទោះបីដឹងថាការបោះឆ្នោតនេះប្រព្រឹត្តទៅមិនសេរី យុត្តិធម៌ក៏ដោយ។
លោក សុន ឆ័យ បញ្ជាក់ថា មូលហេតុដែលគណបក្សភ្លើងទៀនព្រមទទួលលទ្ធផល មិនមែនមានន័យថាគណបក្សនេះយល់ស្របថាការបោះឆ្នោតក្រុមប្រឹក្សាឃុំ-សង្កាត់ធ្វើឡើងត្រឹមត្រូវ និងយុត្តិធម៌នោះទេ។ ផ្ទុយទៅវិញ មកពីគណបក្សភ្លើងទៀនចង់ជួបចរចាជាមួយគណបក្សកាន់អំណាច ដើម្បីជំរុញឱ្យមានដំណោះស្រាយបញ្ហាប្រទេសជាតិ និងកែទម្រង់ប្រព័ន្ធបោះឆ្នោតនៅកម្ពុជាឱ្យមានភាពឯករាជ្យតែប៉ុណ្ណោះ។
លោកបន្តថា គណៈកម្មាធិការជាតិរៀបចំការបោះឆ្នោតដែលហៅកាត់ថា គ.ជ.ប បច្ចុប្បន្នមិនឯករាជ្យ ហើយបានជួយដល់គណបក្សប្រជាជនកម្ពុជាច្រើនអំឡុងពេលបោះឆ្នោតអាណត្តិនេះ។
លោក សុន ឆ័យ បញ្ជាក់ថា គណបក្សភ្លើងទៀនបានរងគ្រោះ និងរងការចោទប្រកាន់ពីសំណាក់មនុស្សមួយចំនួនដែលថាការចូលរួមការបោះឆ្នោតជ្រើសរើសក្រុមប្រឹក្សាឃុំ-សង្កាត់របស់បក្សភ្លើងទៀននេះ ដើម្បីធ្វើឱ្យគណបក្សកាន់អំណាចហ៊ឺហា និងបំពេញភាពស្របច្បាប់គណបក្សកាន់អំណាច។
ដោយរងគ្រោះច្រើនបែបនេះ លោកបង្ហាញក្ដីសង្ឃឹមថា គណបក្សកាន់អំណាចអាចងាយមកចរចាជាមួយបក្សភ្លើងទៀន ដោយថាបើសិនជាបក្សកាន់អំណាចចរចា នឹងទទួលបានផលប្រយោជន៍ច្រើន ជាពិសេសការរក្សាប្រព័ន្ធអនុគ្រោះពន្ធ EBA ពីសហភាពអឺរ៉ុប។
ចំពោះការដាក់លិខិតសុំចរចាជាមួយបក្សប្រជាជនកម្ពុជាពេលណានោះ អនុប្រធានគណបក្សភ្លើងទៀន លោក សុន ឆ័យ ថានៅមិនទាន់បានកំណត់នៅឡើយ។
កាលពីថ្ងៃទី៥ ខែឧសភា ឆ្នាំ២០២២ សហភាពអឺរ៉ុប ប្រកាសដកប្រព័ន្ធអនុគ្រោះទាំងស្រុងចេញពីប្រទេសកម្ពុជា បើសិនជាខ្លួនរកឃើញថាការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅកម្ពុជាប្រព្រឹត្តទៅមិនសេរី ត្រឹមត្រូវ និងយុត្តិធម៌នោះទេ។
បណ្តាគណបក្សនានាដែលបានចូលរួមប្រកួតប្រជែងក្នុងការបោះឆ្នោតឃុំ-សង្កាត់អាណត្តិទី៥ ដែលទើបកន្លងផុតទៅកាលពីថ្ងៃទី៥ ខែមិថុនា ឆ្នាំ២០២២ បាននាំគ្នាចេញសេចក្តីថ្លែងការណ៍ថា ការបោះឆ្នោតឃុំ-សង្កាត់អាណត្តិទី៥ នេះ ប្រព្រឹត្តទៅដោយសេរី ត្រឹមត្រូវ យុត្តិធម៌ គ្មានការគំរាមកំហែង និងស្ថិតក្នុងភាពស្ងប់ស្ងាត់ ជាដើម៕