ម្ចាស់គណនីហ្វេសប៊ុក Angkor Jasmine ដែលមានឈ្មោះពិតថា កែវ ម៉ាលីនដា បានចេញមុខបដិសេធដោយទាត់ចោលជុំវិញការចោទប្រកាន់លោក វន់ ពៅ និងលោក ជា មុនី ថាបានរៀបចំកម្លាំងឱ្យលោក សម រង្ស៊ី ដើម្បីអុកឡុកការបោះឆ្នោតកាលពីពេលថ្មីៗនេះ ថាមិនមែនជាគណនីហ្វេសប៊ុករបស់ខ្លួននោះទេ។
ម្ចាស់គណនីហ្វេសប៊ុក Angkor Jasmine ដែលមានឈ្មោះពិតថា កែវ ម៉ាលីនដា បានចេញផ្សាយផ្ទាល់លើគណនីហ្វេសប៊ុករបស់ខ្លួនដែលមានឈ្មោះថា Angkor Jasmine កាលពីថ្ងៃទី៦ ខែមិថុនា ឲ្យដឹងថា អ្នកស្រីបានឃើញសារព័ត៌មានក្នុងស្រុកដែលស្និទ្ធនឹងរដ្ឋាភិបាលកម្ពុជា Fresh News និងសារព័ត៌មានក្នុងស្រុកមួយចំនួនទៀតបានចុះផ្សាយតាមការសរសេររបស់គណនីហ្វេសប៊ុកក្លែងក្លាយដែលមានឈ្មោះថា Jasmine Angkor នោះជាបន្តបន្ទាប់កាលពីដើមខែមិថុនា។
អ្នកស្រី កែវ ម៉ាលីនដា ដែលជាម្ចាស់គណនីហ្វេសប៊ុក Angkor Jasmine បានអះអាងថា អ្នកស្រីមិនដែលស្គាល់មនុស្សដែលស្និទ្ធនឹងលោក សម រង្ស៊ី លោក ប៊ុត ធារី ហៅ សុគន្ធ ធារី ឬដឹងពីសកម្មភាពផ្ទៃក្នុងរបស់គណបក្សភ្លើងទៀន ដែលគណនីហ្វេសប៊ុកក្លែងក្លាយនោះបានលើកយកមកសរសេរលើបណ្ដាញសង្គមហ្វេសប៊ុកនាពេលកន្លងមកនោះទេ។
ម្ចាស់គណនីហ្វេសប៊ុក Angkor Jasmine ពិតប្រាកដរូបនេះបានទាត់ចោលជុំវិញការចោទប្រកាន់លោក វន់ ពៅ និងលោក ជា មុនី ថាបានរៀបចំកម្លាំងឱ្យលោក សម រង្ស៊ី ទាំងស្រុង។ ជាងនេះទៀត អ្នកស្រី កែវ ម៉ាលីនដា បញ្ជាក់ថា អ្នកស្រីតែងតែគោរពវីរភាពរបស់លោក វន់ ពៅ និងលោក ជា មុនី ខ្លាំងណាស់ ដូច្នេះអ្នកស្រីគ្មានហេតុផលណាទៅចោទប្រកាន់លោកទាំងពីរនោះឡើយ។
អ្នកស្រី កែវ ម៉ាលីនដា បញ្ជាក់ថា ប្រសិនបើមានករណីណាមួយដែលអ្នកស្រីចង់ផ្សព្វផ្សាយ អ្នកស្រីមិនដែលសរសេរលើបណ្ដាញសង្គមហ្វេសប៊ុកនោះទេ គឺអ្នកស្រីនឹងធ្វើការផ្សាយផ្ទាល់តែម្តង។ ជាងនេះទៀត ឈ្មោះគណនីហ្វេសប៊ុករបស់អ្នកស្រី គឺប្រើពាក្យ Angkor នៅពីមុខ ព្រោះអង្គរ ជាអច្ឆរិយវត្ថុរបស់ពិភពលោក ដូច្នេះអ្នកស្រីមិនយកទៅដាក់នៅក្រោយពាក្យផ្សេងនោះឡើយ។
ការអះអាងនេះ ធ្វើឡើងបន្ទាប់ពីគណនីហ្វេសប៊ុកក្លែងក្លាយមួយដែលមានឈ្មោះថា Jasmine Angkor បានចេញមុខរៀបរាប់លើបណ្ដាញសង្គមហ្វេសប៊ុកពីផែនការរបស់លោក សម រង្ស៊ី ដែលជាហេតុធ្វើឱ្យមហាជនយល់ច្រឡំថា ជាការអះអាងរបស់អ្នកស្រី កែវ ម៉ាលីនដា ដែលជាម្ចាស់គណនីហ្វេសប៊ុក Angkor Jasmine។
កាលពីថ្ងៃទី២៥ ខែឧសភា និងថ្ងៃទី១ ខែមិថុនា ឆ្នាំ២០២២ នេះ ម្ចាស់គណនីហ្វេសប៊ុកក្លែងក្លាយឈ្មោះ Jasmine Angkor ដែលបានដាក់តាំងរូបអ្នកស្រី កែវ ម៉ាលីនដា បានសរសេរលើគណនីហ្វេសប៊ុករបស់ខ្លួនអំពីផែនការរបស់អតីតមេដឹកនាំប្រឆាំង លោក សម រង្ស៊ី ថាបានបញ្ជាឱ្យលោក ប៊ុត ធារី ហៅ សុគន្ធ ធារី ទៅប្រទេសកម្ពុជា ដើម្បីបំផ្លាញការបោះឆ្នោតក្រុមប្រឹក្សាឃុំ-សង្កាត់កាលពីពេលថ្មីៗនេះ ប៉ុន្តែត្រូវបរាជ័យ។
ជាងនេះទៀត ម្ចាស់គណនីហ្វេសប៊ុកក្លែងក្លាយដដែលនេះ បានអះអាងថា តាមព័ត៌មានផ្ទៃក្នុងរបស់គណបក្សភ្លើងទៀន គឺបានទទួលផែនការពីលោក សម រង្ស៊ី ឱ្យប្រមូលកម្លាំងតាមបណ្តាខេត្តឡើងមកទីក្រុងភ្នំពេញឱ្យបានយ៉ាងតិច ៣ម៉ឺននាក់តាមរយៈលោក ជា មុនី ប្រមូលកម្មករ និងលោក វន់ ពៅ ប្រមូល PassApp ឱ្យបានជាងមួយពាន់គ្រឿង ដើម្បីអុកឡុកបំផ្លាញការបោះឆ្នោតនៅកម្ពុជា។
ជុំវិញបញ្ហានេះ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ និងអតីតប្រធានសហព័ន្ធសហជីពសេរីកម្មករកម្ពុជា លោក ជា មុនី កាលពីថ្ងៃទី១ ខែមិថុនា ឆ្នាំ២០២២ បានបដិសេធដាច់អហង្ការចំពោះការចោទប្រកាន់ថាពួកលោកពាក់ព័ន្ធនឹងលោក សម រង្ស៊ី ក្នុងការរៀបចំផែនការនេះ៕