ប្រជាសហគមន៍អះអាងថា កុដិលោកនៅអាស្រមព្រៃមេត្តាធម្មជាតិ ស្ថិតក្នុងស្រុកឱរ៉ាល់ ខេត្តកំពង់ស្ពឺ ត្រូវបានក្រុមទាហានដុតបំផ្លាញរាបដល់ដី ខណៈព្រៃសហគមន៍ «ឧត្ដមស្រែពស់ និងព្រៃមេត្តាធម្មជាតិ» កំពុងរងការឈូសឆាយ និងកាប់បំផ្លាញពីសំណាក់ក្រុមទាហាន និងពលរដ្ឋមួយចំនួន។
កាលពីខែឧសភា ឆ្នាំ២០២២ ប្រជាសហគមន៍បាននាំគ្នាស្វែងរកកិច្ចអន្តរាគមន៍ពីកូនប្រុសលោក ហ៊ុន សែន គឺលោក ហ៊ុន ម៉ានី ដែលជាតំណាងរាស្ត្រមណ្ឌលខេត្តកំពង់ស្ពឺ ឱ្យជួយទប់ស្កាត់ការកាប់បំផ្លាញព្រៃឈើ «ឧត្ដមស្រែពស់ និងព្រៃមេត្តាធម្មជាតិ» ពីសំណាក់ក្រុមទាហានកងទ័ពជើងគោក និងពលរដ្ឋមួយចំនួនស្ថិតនៅឃុំត្រពាំងជោរ ស្រុកឱរ៉ាល់។ ការនាំគ្នាស្វែងរកកិច្ចអន្តរាគមន៍ពីកូនប្រុសលោក ហ៊ុន សែន នេះ បានធ្វើឡើងក្រោយពីមិនទទួលបានដំណោះស្រាយពីក្រសួងដែនដី និងអាជ្ញាធរពាក់ព័ន្ធ ខណៈព្រៃតំបន់នោះកំពុងរងការឈូសឆាយ។
សមាជិកសហគមន៍ លោកស្រី ឃន ខន រៀបរាប់ប្រាប់សារព័ត៌មាន The Cambodia Daily ថា អ្នកដែលដុតបំផ្លាញកុដិលោកជាក្រុមទាហានដែលកំពុងមានជម្លោះជាមួយប្រជាសហគមន៍។ លោកស្រីបន្តថា មូលហេតុដែលក្រុមទាហានដុត ដោយសារពួកគេមិនចង់ឱ្យមានអាស្រមរបស់ព្រះភិក្ខុសង្ឃស្ថិតនៅក្នុងព្រៃដែលកំពុងមានជម្លោះ ដើម្បីពួកគេងាយស្រួលក្នុងការទន្ទ្រានយកធ្វើកម្មសិទ្ធិ ខណៈបច្ចុប្បន្ន តំបន់ព្រៃសហគមន៍ដែលព្រះសង្ឃ និងពលរដ្ឋបានការពារចំនួន ២២ឆ្នាំមកនេះ កំពុងរងការឈូសឆាយដោយគ្មានការទប់ស្កាត់ពីអាជ្ញាធរឡើយ។
លោកស្រី ឃន ខន ដែលធ្លាប់ត្រូវបានក្រុមទាហានប្រើប្រាស់អំពើហិង្សាបណ្តាលឲ្យបាក់ដៃអំឡុងតវ៉ាប្រឆាំងនឹងការឈូសឆាយ បានបង្ហាញការខកចិត្តចំពោះរដ្ឋាភិបាល និងអាជ្ញាធរពាក់ព័ន្ធដែលមិនអើពើដោះស្រាយបញ្ហាជូនពលរដ្ឋ ហើយបណ្ដោយឱ្យក្រុមទាហានចូលឈូសឆាយរំលោភយក សូម្បីតែដីព្រៃឈើក្នុងវត្តអារាមដែលព្រះសង្ឃ និងប្រជាពលរដ្ឋខំការពារដើម្បីទុកឱ្យក្មេងជំនាន់ក្រោយបានឃើញ និងទុកជាជម្រកសត្វ ជាដើម។
យ៉ាងណាក៏ដោយ ក្រុមទាហានដែលបានដាក់គ្រឿងចក្រឈូសឆាយ និងប្រើកម្លាំងកម្មករឱ្យចូលទៅកាប់រុករានព្រៃឈើនៅតំបន់នោះ បានធ្វើឡើងបន្ទាប់ពីពួកគេទទួលបានដីសម្បទានសង្គមកិច្ចពីលោក ហ៊ុន សែន។
ប៉ុន្តែការផ្ដល់ដីសម្បទានសង្គមកិច្ចនៅតំបន់ព្រៃឈើ «ឧត្ដមស្រែពស់ និងព្រៃមេត្តាធម្មជាតិ» ត្រូវបានសហគមន៍តវ៉ាចំពោះសកម្មភាពឈូសឆាយដីព្រៃឈើតំបន់នោះ ដោយថាដីព្រៃសហគមន៍ទាំងពីរនេះជាប្រភេទតំបន់ព្រៃស្រោង ជាជម្រកសត្វព្រៃជាច្រើនប្រភេទកំពុងរស់នៅ ជាពិសេសប្រភេទសត្វព្រៃជិតផុតពូជដែលពលរដ្ឋ និងព្រះសង្ឃបានការពារជាង ២០ឆ្នាំទៅហើយ។
កាលពីថ្ងៃទី២០ ខែសីហា ឆ្នាំ២០២១ រដ្ឋាភិបាលបានចេញអនុក្រឹត្យមួយកាត់ដីទំហំជាង ២៦០ហិកតារ (២៦២,២៤ហិកតារ) ពីដែនជម្រកសត្វព្រៃភ្នំឱរ៉ាល់ ស្ថិតនៅភូមិសាស្ត្រភូមិពោធិ៍មាស ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ដើម្បីបែងចែកទៅឱ្យគ្រួសារកងទ័ពនៃបញ្ជាការដ្ឋានរថក្រោះកងទ័ពជើងគោក និងពលរដ្ឋចំនួន ៤១គ្រួសារសម្រាប់ធ្វើលំនៅឋាន និងបង្កបង្កើនផល។
បើតាមញត្តិដែលពលរដ្ឋដាក់ទៅទីស្នាក់ការរដ្ឋសភា មណ្ឌលខេត្តកំពង់ស្ពឺ កាលពីថ្ងៃទី២៧ ខែឧសភា នេះ លើកឡើងថា កាលពីឆ្នាំ២០០៣ ផ្ទៃដីព្រៃសហគមន៍ឧត្ដមស្រែពស់មានទំហំ ២៤៣៣ហិកតារ ដោយមានពលរដ្ឋអាស្រ័យផលចំនួន ២៥៣គ្រួសារ ហើយនៅចន្លោះឆ្នាំ២០០៨ និងឆ្នាំ២០១៧ អាជ្ញាធរបានកាត់ឆ្វៀលដីព្រៃសហគមន៍នេះទៅឱ្យក្រុមហ៊ុនឯកជន និងក្រុមគ្រួសារទាហាន «ង៧០» អស់ជាច្រើនហិកតារ ប៉ុន្តែបច្ចុប្បន្ននេះ ដីព្រៃសហគមន៍នេះនៅសល់ប្រហែល ៩០០ហិកតារប៉ុណ្ណោះ និងកំពុងទទួលរងការកាប់ទន្ទ្រាន និងដុតបំផ្លាញយ៉ាងធ្ងន់ធ្ងរ៕