គណបក្សប្រជាជនកម្ពុជា គ្រោងនឹងធ្វើសន្និបាតវិសាមញ្ញរបស់គណៈកម្មាធិការកណ្តាលបក្សនៅពាក់កណ្ដាលខែកក្កដា ឆ្នាំ២០២២ ក្រោយពីលទ្ធផលការបោះឆ្នោតជ្រើសរើសក្រុមប្រឹក្សាឃុំ-សង្កាត់ថ្មីៗទទួលបានអាសនៈច្រើនលើសលប់នៅទូទាំងប្រទេស ដើម្បីទៅដណ្ដើមយកជ័យជម្នះក្នុងការបោះឆ្នោតថ្នាក់ជាតិនៅឆ្នាំ២០២៣ ខាងមុខនេះ។
សេចក្តីជូនដំណឹងរបស់គណបក្សប្រជាជនកម្ពុជា ចុះថ្ងៃទី៨ ខែមិថុនា ឆ្នាំ២០២២ បានឱ្យដឹងថា សន្និបាតវិសាមញ្ញរបស់គណៈកម្មាធិការកណ្តាលរបស់គណបក្សប្រជាជនកម្ពុជា គ្រោងនឹងធ្វើឡើងនៅថ្ងៃទី១៦-១៧ ខែកក្កដា ឆ្នាំ២០២២។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានឲ្យដឹងថា ការធ្វើសន្និបាតវិសាមញ្ញនៅខែកក្កដា ខាងមុខ អាចលើកយកប្រធានបទពាក់ព័ន្ធការបោះឆ្នោតនាពេលថ្មីៗនេះ ក្រោយពីឆ្លងកាត់បទពិសោធន៍នៃការបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់ដែលនាំឱ្យគណបក្សប្រជាជនកម្ពុជាទទួលអាសនៈច្រើនលើសលប់។
លោក សុខ ឥសាន បន្ថែមថា នឹងលើកចំណុចខ្លាំងចំណុចខ្សោយដែលទទួលបានជោគជ័យដ៏ត្រចះត្រចង់ និងដាក់ទិសដៅ ដើម្បីទៅដណ្ដើមយកជ័យជម្នះក្នុងការបោះឆ្នោតថ្នាក់ជាតិទៀត។
យ៉ាងណាក៏ដោយ ការរៀបចំធ្វើសន្និបាតវិសាមញ្ញរបស់គណបក្សប្រជាជនកម្ពុជា ធ្វើឡើងបន្ទាប់ពីកម្ពុជាបញ្ចប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ កាលពីថ្ងៃទី៥ ខែមិថុនា ឆ្នាំ២០២២ ដែលមានគណបក្សចំនួន ១៧ ចូលរួមប្រកួត ប៉ុន្តែគណបក្សនយោបាយដែលទទួលបានតំណែងមេឃុំមានតែគណបក្សភ្លើងទៀន និងគណបក្សប្រជាជនកម្ពុជាតែប៉ុណ្ណោះ។ ក្នុងនោះ គណបក្សភ្លើងទៀនទួលបានតំណែងមេឃុំចំនួន៤ នៅទូទាំងប្រទេស ខណៈគណបក្សប្រជាជនកម្ពុជា ទទួលបានឈ្នះលើសលប់ ពោលគឺជាង ១៦០០ឃុំ-សង្កាត់ក្នុងចំណោម ១៦៥២ឃុំ-សង្កាត់នៅទូទាំងប្រទេស។
ប៉ុន្តែការបោះឆ្នោតនេះ ត្រូវបានគណបក្សភ្លើងទៀន ចាត់ទុកថាប្រព្រឹត្តទៅមិនសេរី មិនត្រឹមត្រូវ និងមិនយុត្តិធម៌ ដោយមិនឆ្លុះបញ្ចាំងពីឆន្ទៈពលរដ្ឋឡើយ ដោយសារបេក្ខជនបក្សនេះបានទទួលការគាបសង្កត់ បំភិតបំភ័យចាប់តាំងពីការរៀបចំបញ្ជីបេក្ខជនរហូតដល់ការដាក់បញ្ជីអ្នកសង្កេតការណ៍ ហើយរាល់សកម្មភាពកៀរគរពលរដ្ឋតាមរយៈការទិញសន្លឹកឆ្នោត តាមដាន សម្លុត គំរាមមានជាហូរហែដោយមិនមានការអង្កេត និងហាមប្រាមពី គ.ជ.ប នោះទេ។
ក្រោយពីការបោះឆ្នោត និងដឹងលទ្ធផលនោះ រដ្ឋមន្ត្រីក្រសួងមហាផ្ទៃ និងជាអនុប្រធានគណបក្សប្រជាជនកម្ពុជា លោក ស ខេង បានផ្ដល់ស្រាបៀចំនួន ១ម៉ឺនកេសសម្រាប់ឃុំ-សង្កាត់នៅក្នុងខេត្តព្រៃវែង និងខេត្តបាត់ដំបង ខណៈខេត្តទាំងពីរនេះបានឈ្នះការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិនេះ។
ពាក់ព័ន្ធនឹងរឿងបោះឆ្នោតនេះ កាលពីថ្ងៃទី៧ ខែមិថុនា ឆ្នាំ២០២២ ក្រុមអង្គការសង្គមស៊ីវិលចំនួន ៥ស្ថាប័ន ស្នើទៅភាគីពាក់ព័ន្ធត្រូវពង្រឹងការអនុវត្តឱ្យត្រឹមត្រូវតាមច្បាប់ បទបញ្ជា និងនីតិវិធីសម្រាប់ការបោះឆ្នោត រួមទាំងត្រូវពង្រឹងពីអព្យាក្រឹតភាពរបស់មន្ត្រីរាជការ និងកងកម្លាំងប្រដាប់អាវុធផងដែរ។
ការស្នើទៅស្ថាប័នគណៈកម្មាធិការជាតិរៀបចំការបោះឆ្នោត និងភាគីពាក់ព័ន្ធ បានធ្វើឡើងបន្ទាប់ពីពួកគេបានរកឃើញនូវភាពមិនប្រក្រតីមួយចំនួនអំឡុងពេលបោះឆ្នោត និងរាប់សន្លឹកឆ្នោតកាលពីថ្ងៃទី៥ ខែមិថុនា ឆ្នាំ២០២២៕