30 C
Phnom Penh

អ្នក​ឃ្លាំមើល៖ ចិន​ប្រើប្រាស់​ទំនាក់​ទំនង​កម្ពុជា​ដើម្បី​យក​សមុទ្រ​រាម​ពង្រីក​ឥទ្ធិពល​ក្នុង​តំបន់

ដោយ ឌឹ ខេមបូឌា ដេលី

បទវិភាគ

អ្នក​តាមដាន​ស្ថានការណ៍​កម្ពុជា អះអាង​ថា ក្រុម​ចារកិច្ច​សម្ងាត់​បាន​វាយតម្លៃ​ថា ចិន​កំពុង​ប្រើប្រាស់​ទំនាក់ទំនង​ជាមួយ​កម្ពុជា​ឆ្ពោះ​ទៅ​រក​គោលដៅ​ប្រើប្រាស់​តំបន់​រាម និង​ប្រទេស​កម្ពុជា​ទាំងមូល ដើម្បី​បម្រើ​ភូមិសាស្ត្រ​នយោបាយ​របស់​ខ្លួន​ក្នុង​ការ​ពង្រីក​ឥទ្ធិពល​ក្នុង​តំបន់។

អ្នក​តាមដាន​ស្ថានការណ៍​កម្ពុជា លោក សុខ សុគន្ធ បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​រាត្រី​ថ្ងៃទី​៨ ខែ​មិថុនា ថា ចំណោទ​អំពី​មូលដ្ឋាន​ជើងទឹក​រាម គ្រាន់តែ​ជា​ចំណុច​តូច​មួយ​ប៉ុណ្ណោះ ប៉ុន្តែ​ចំណុច​សំខាន់​នោះ​គឺ​នៅ​ត្រង់​ថា ផ្ទៃដី​កម្ពុជា​ទាំងមូល​ទើប​ជា​ចំណុច​ធំ​ដែល​ត្រូវ​បាន​គេ​វាយតម្លៃ​ថា ចិន​កំពុង​ត្រូវការ​ដើម្បី​ប្រើប្រាស់​ជា​ភូមិសាស្ត្រ​នយោបាយ​ក្នុង​ការ​ពង្រីក​ឥទ្ធិពល​ក្នុង​តំបន់​របស់​ពួកគេ។

លោក សុខ សុគន្ធ អះអាង​ថា តាម​ការ​លើកឡើង​របស់​លោក ទៀ បាញ់ ក្នុង​ពិធី​បើក​ការដ្ឋាន​ជួសជុល​មូលដ្ឋាន​សមុទ្រ​រាម កាលពី​ថ្ងៃ​ពុធ ទី​៨ មិថុនា កន្លងទៅ​នេះ បាន​បញ្ជាក់​ពី​ការ​ចូល​ខ្លួន​របស់​ក្រុមហ៊ុន​ចិន ដើម្បី​ជួសជុល​មូលដ្ឋាន​ជើងទឹក​រាម និង​លក្ខខណ្ឌ​ដែល​មិន​អនុញ្ញាត​ឱ្យ​ចូល​មើល​មូលដ្ឋាន​ជើងទឹក​នេះ ក្រោយ​ពេល​ជួសជុល​រួច។ លោក សុខ សុគន្ធ ចាត់ទុក​ថា​ចំណុច​ទាំងនេះ​គឺជា​ចំណុច​ដែល​គួរ​ឱ្យ​មាន​ការ​សង្ស័យ​ពី​ការ​លាក់​កំបាំង​នូវ​ការ​បញ្ជូន​កងទ័ព​ចិន ចូល​ទៅ​កាន់​តំបន់​រាម​តាមរយៈ​ក្រុមហ៊ុន​ចិន​ម៉ៅការ​សាងសង់​នេះ​យ៉ាង​ខ្លាំង។

លោក សុខ សុគន្ធ ឆ្ងល់​ថា ក្រុមហ៊ុន​ចិន​ដែល​ចូល​ទៅ​សាងសង់ និង​ជួសជុល​នៅ​មូលដ្ឋាន​ជើងទឹក​រាម គ្រាន់តែ​ជា​ជាង​ធម្មតា ឬ​ជា​កងទ័ព​ដែល​ប្រើ​ឯកសណ្ឋាន​ក្រុមហ៊ុន ដើម្បី​បន្លំ​ចូល​ទៅ​ឈរ​ជើង​នៅ​ទីនោះ? ជាង​នេះ​ទៀត តើ​កម្ពុជា​មាន​នាវា​ធុន​ធ្ងន់​ច្រើន​ប៉ុន្មាន​គ្រឿង​សម្រាប់​ជួសជុល ស្រប​ពេល​ដែល​កម្ពុជា​ពេលនេះ​មាន​តែ​នាវា​ធុន​មធ្យម​ដែល​មិន​ដំណើរការ​ប្រមាណ​ជា ៣ ទៅ ៤​គ្រឿង​ប៉ុណ្ណោះ។ ចំណែក​នាវា​ល្បាត​ដែល​កម្ពុជា​កំពុង​ដំណើរការ​សព្វថ្ងៃ​នេះ គឺជា​នាវា​ធុន​ស្រាល​ប៉ុណ្ណោះ។

អ្នក​តាមដាន​ស្ថានការណ៍​កម្ពុជា​រូប​នេះ​លើកឡើង​ថា បើក​ការដ្ឋាន​សាងសង់​រោង​ជាង​ដើម្បី​ជួសជុល​ផែ​សំចត​នៅ​មូលដ្ឋាន​សមុទ្រ​រាម ទំនង​ជា​ធ្វើឡើង​ដើម្បី​រង់ចាំ​ទទួល​នាវា​នេសាទ​ដែល​ប្រើប្រាស់​ដោយ​កងទ័ព​ជើងទឹក​ប្រជាជន​ចិន ដែល​មាន​ប្រមាណ​ជាង ៤០០​គ្រឿង ដែល​មាន​គោលដៅ​ឆ្លងកាត់​តាម​ដែន​សមុទ្រ​ថៃ ចូល​មក​កម្ពុជា ដោយ​យក​លេស​ថា​មក​ជួសជុល​ក្នុង​រោង​ជាង​របស់​ពួកគេ​នៅ​មូលដ្ឋាន​សមុទ្រ​រាម​នេះ។

លោក សុខ សុគន្ធ បញ្ជាក់​ថា នៅ​ពេល​ដែល​ចិន​ចាប់ផ្តើម​បញ្ជូន​នាវា​កងទ័ព​ជើងទឹក​ប្រជាជន​ចិន​ចេញ​ចូល និង​រាតត្បាត​នៅ​ដែនសមុទ្រ​ថៃ និង​កម្ពុជា កាន់តែ​ទូលំទូលាយ​ហើយ​នោះ សមិទ្ធផល​នានា​របស់​រដ្ឋាភិបាល​ចិន នឹង​កើត​ឡើង​ជា​បន្តបន្ទាប់ ដូចជា​ស្ថានីយ​ផ្កាយរណប ជាដើម ដែល​នឹង​ត្រូវ​សាងសង់​លើ​ទឹកដី​ប្រទេស​មួយ​ចំនួន​ដែល​ចិន​កាន់កាប់ ដូចជា​កម្ពុជា ជាដើម ដើម្បី​ត្រួតពិនិត្យ និង​គ្រប់គ្រង​ដែនសមុទ្រ​ចិន​ខាងត្បូង។

ការ​អះអាង​នេះ ធ្វើឡើង​បន្ទាប់ពី​រដ្ឋមន្ត្រី​ក្រសួង​ការពារ​ជាតិ និង​រដ្ឋមន្ត្រី​ការបរទេស​កម្ពុជា បាន​បដិសេធ​ចោល​ទាំងស្រុង​នូវ​ការ​ចោទប្រកាន់​អំពី​មាន​វត្តមាន​កងទ័ព​ជើងទឹក​ចិន​នៅ​មូលដ្ឋាន​ជើងទឹក​រាម​របស់​កម្ពុជា​នៅ​ពេលនេះ។

អតីត​អគ្គ​ទីប្រឹក្សា​ស្ថានទូត​ខ្មែរ​ប្រចាំ​ប្រទេស​ឥណ្ឌូនេស៊ី បណ្ឌិត សូ ណារ៉ូ បាន​លើកឡើង​ក្នុង​កិច្ចពិភាក្សា​នេះ​ដែរ​ថា មូលដ្ឋាន​សមុទ្រ​រាម​នេះ គឺជា​ចំណុច​គ្រោះថ្នាក់​សម្រាប់​កម្ពុជា និង​ប្រទេស​ក្នុង​តំបន់ ព្រមទាំង​មហាអំណាច​សហរដ្ឋ​អាមេរិក​ផង​ដែរ បើសិន​កម្ពុជា​លួច​ឃុបឃិត​ប្រគល់​មូលដ្ឋាន​ជើងទឹក​រាម​នេះ​ឱ្យ​ទៅ​ចិន​គ្រប់គ្រង​ក្នុង​លក្ខខណ្ឌ​ណា​មួយ​នោះ។

លោក​បញ្ជាក់​ថា សហរដ្ឋ​អាមេរិក​នៅតែ​មិន​ទុកចិត្ត​កម្ពុជា​នោះ​ទេ បើ​ទោះបីជា​រដ្ឋាភិបាល​លោក ហ៊ុន សែន បាន​ប្ដេជ្ញា​គ្រប់គ្រង​មូលដ្ឋាន​ជើងទឹក​រាម​របស់​ខ្លួន​ស្រប​តាម​រដ្ឋធម្មនុញ្ញ​របស់​កម្ពុជា​ក៏ដោយ។

ជុំវិញ​បញ្ហា​នេះ ស្ថានទូត​ចិន បាន​អះអាង​កាលពី​ថ្ងៃទី​៨ ខែ​មិថុនា ឆ្នាំ​២០២២ ថា មិត្តភាព​ចិន និង​កម្ពុជា មាន​ប្រវត្តិ​យូរ​អង្វែង និង​រឹងមាំ​មិន​អាច​បំបែក​បាន ហើយ​គម្រោង​ជួសជុល​នៅ​មូលដ្ឋាន​ជើងទឹក​រាម​ដែល​ជា​ជំនួយ​ឥត​សំណង​របស់​ភាគី​ចិន គឺជា​សមិទ្ធផល​ផ្លែផ្កា​នៃ​ការ​គោរព​គ្នា​ទៅវិញ​ទៅមក និង​សមស្រប​តាម​ច្បាប់​នៃ​ប្រទេស​ទាំង​ពីរ​ផង​ដែរ។

អ្នក​ជំនាញ​ខាង​វិទ្យាសាស្ត្រ​នយោបាយ លោក ឯម សុវណ្ណរ៉ា ប្រាប់​សារព័ត៌មាន​ក្នុង​ស្រុក​ថា កម្ពុជា​គួរ​តែ​បង្ហាញ​តម្លាភាព​ក្នុង​ការ​លាង​ជម្រះ​នូវ​មន្ទិល​សង្ស័យ​នៅ​ទីតាំង​ការដ្ឋាន​ធ្វើ​ទំនើបកម្ម​កំពង់ផែ​រាម ដែល​ចិន​ជា​អ្នក​ជួយ​ឧបត្ថម្ភ។ លោក​ថា បើ​កម្ពុជា​ស្ថិត​ក្នុង​បរិបទ​នៃ​ការ​មន្ទិល​សង្ស័យ​របស់​សហរដ្ឋ​អាមេរិក កម្ពុជា​នឹង​មិន​មាន​ភាព​ល្អ​ប្រសើរ​ឡើយ​លើ​វិស័យ​នយោបាយ​ការទូត នយោបាយ​សន្តិសុខ​ជាតិ និង​សន្តិសុខ​សណ្ដាប់ធ្នាប់​ក្នុង​តំបន់ និង​នៅ​លើ​សកលលោក។

យ៉ាងណា​ក៏ដោយ កាលពី​ថ្ងៃទី​១២ ខែ​ឧសភា ឆ្នាំ​២០២២ ឧបការី​ការបរទេស​សហរដ្ឋ​អាមេរិក អ្នកស្រី Wendy R. Sherman បាន​ជំរុញ​ឲ្យ​កម្ពុជា​អនុវត្ត​នូវ​ធម្មនុញ្ញ​របស់​ខ្លួន​ឲ្យ​បាន​ល្អ​ជុំវិញ​ការ​ព្រួយ​បារម្ភ​របស់​សហរដ្ឋ​អាមេរិក អំពី​វត្តមាន​កងទ័ព​ចិន​នៅ​មូលដ្ឋាន​ជើងទឹក​រាម​របស់​កម្ពុជា​សព្វថ្ងៃ​នេះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស