ចាប់តាំងពីរុស្ស៊ី ដកទ័ពរបស់ខ្លួនចេញពីភាគខាងជើងប្រទេស ដោយសារតែវាយកាន់កាប់រដ្ឋធានីគៀវ មិនបាន ដោយសម្រេចប្រមូលទ័ពមកវាយយកតំបន់ភាគខាងកើតប្រទេស គឺតំបន់ដុនបាស ដែលមកដល់ពេលនេះមានរយៈពេល ៤០ថ្ងៃមកហើយ គឺកងទ័ពរុស្ស៊ី នៅតែមិនអាចវាយយកបានទីតាំងណាមួយពិតប្រាកដពីកងទ័ពអ៊ុយក្រែន នៅឡើយ។
តាមទីភ្នាក់ងារសារព័ត៌មាន Reuters បានរាយការណ៍មកថា ស្រុកមួយនៅក្នុងខេត្ត Luhansk គឺស្រុក Severodonetsk កងទ័ពនៃប្រទេសទាំងពីរកំពុងវាយប្រយុទ្ធគ្នាមិនបង្អង់ឡើយ។ កងទ័ពទាំងពីរបង្កើនការវាយប្រយុទ្ធគ្នាយ៉ាងសហាវបំផុត ដោយកងទ័ពស្លាប់ទាំងសងខាងចំនួនពី ១៥០នាក់ដល់ទៅ ៣០០នាក់ក្នុងមួយថ្ងៃ។
ភាគីអ៊ុយក្រែន អះអាងថា ក្នុងសមរភូមិនេះ កងទ័ពទាំងពីរប្រទេសនេះប្រយុទ្ធគ្នាខ្លាំងក្លាណាស់អស់រយៈពេល ២សប្ដាហ៍មកហើយ ដែលនៅថ្ងៃខ្លះ កងទ័ពអ៊ុយក្រែនស្លាប់ដល់ទៅ ១៥០ ទៅ ២០០នាក់ ហើយចំណែកកងទ័ពរុស្ស៊ីស្លាប់ពី ២៥០ ទៅ ៣០០នាក់។
នៅសមរភូមិភាគខាងកើតប្រទេសអ៊ុយក្រែន នេះ សម្រាប់រុស្ស៊ី បានបង្កើនកងទ័ពដល់ជាង ១០ម៉ឺននាក់ហើយ ចំណែកអ៊ុយក្រែន បានបង្កើនទ័ពជាង ៥ម៉ឺននាក់។ តាមអភិបាលខេត្ត Luhansk លោក Serhiy Haidai ឲ្យដឹងថា ភាគីរុស្ស៊ី វាយសន្ធប់យ៉ាងខ្លាំងដើម្បីកាន់កាប់ស្រុក Severodonetsk ដែលជាតំបន់ឧស្សាហកម្មដ៏សំខាន់របស់អ៊ុយក្រែន នៅតំបន់នេះ។ លោកថា រុស្ស៊ីប្រើគ្រប់មធ្យោបាយនៃសង្គ្រាមទាំងអស់ មានទាំងយន្តហោះចម្បាំង រថក្រោះ កាំភ្លើងធំ និងទ័ពមីស៊ីល ដោយបានបាញ់ស្រោចមកលើកងទ័ពអ៊ុយក្រែន។
លោកបញ្ជាក់ថា សូម្បីតែសាលារៀន មន្ទីរពេទ្យ ទីផ្សាររបស់ប្រជាជន ក៏រងការវាយប្រហារផងដែរ។ លោកថា កងទ័ពរុស្ស៊ី វាយប្រហារមិនរើសគោលដៅនោះទេ ទោះតំបន់នោះមានជនស៊ីវិលរស់នៅ ក៏កងទ័ពរុស្ស៊ីវាយប្រហារដែរ។ ក្នុងរយៈពេល ១០៧ថ្ងៃហើយ សង្គ្រាមរុស្ស៊ីឈ្លានពានអ៊ុយក្រែន បណ្តាលឲ្យភាគីទាំងសងខាងនៅតែលាក់បាំងការស្លាប់កងទ័ពរបស់ពួកគេរៀងៗខ្លួន។
អ៊ុយក្រែន អះអាងថា កងទ័ពរុស្ស៊ីបានស្លាប់ដល់ទៅជាង ៣១៩០០នាក់ រថក្រោះត្រូវបានបាញ់កម្ទេច និងរឹបអូសបានចំនួន ១៤០៩គ្រឿង រថពាសដែក ៣៤៥០គ្រឿង រថយន្តដឹកកងទ័ព ២៤៣៨គ្រឿង ប្រព័ន្ធកាំភ្លើងធំ ៧១២គ្រឿង ប្រព័ន្ធរ៉ុក្កែត ២២២គ្រឿង ប្រព័ន្ធបាញ់យន្តហោះ ៩៧គ្រឿង បាញ់ធ្លាក់យន្តហោះចម្បាំង ២១២គ្រឿង ឧទ្ធម្ភាគចក្រ ១៧៨គ្រឿង យន្តហោះ Drones ៥៧២គ្រឿង និងនាវាចម្បាំង ១៣គ្រឿង។
នេះជាតួលេខដែលបង្ហាញអំពីការខូចខាតសព្វាវុធ និងកងទ័ពរុស្ស៊ី ដែលជាការចុះផ្សាយដោយក្រសួងការពារជាតិអ៊ុយក្រែន។ ចំណែកឯភាគីរុស្ស៊ីវិញ មិនបានបង្ហាញតួលេខខាងភាគីអ៊ុយក្រែន នោះទេ។
បើនិយាយអំពីសង្គ្រាមនៅតំបន់ដុនបាស លោកប្រធានាធិបតីអ៊ុយក្រែន Volodymyr Zelenskyy បានអះអាងថា គឺជាសមរភូមិចុងក្រោយរបស់រុស្ស៊ី គឺថាបើរុស្ស៊ីមិនអាចវាយកាន់កាប់បានទេ រុស្ស៊ីអាចនឹងស្ថិតក្នុងភាពទាល់ច្រក ហើយនឹងបង្កើតផែនការថ្មីទៀត។
បើតាមការគិតរបស់លោក Zelenskyy គឺរុស្ស៊ីនឹងប្រើមធ្យោបាយថ្មីទៀត គឺអាចវាយប្រហារចេញពីលំហសមុទ្រខ្មៅដោយបាញ់មីស៊ីលពីនាវាចម្បាំង និងនាវាមុជទឹកទៅលើទីតាំងនៅភាគខាងជើង និងភាគខាងលិច ហើយចំណែកនៅតំបន់ភាគខាងកើតប្រទេស គឺរុស្ស៊ីមិនដកកម្លាំងទៅវិញនោះទេ លើកលែងតែកងទ័ពអ៊ុយក្រែនវាយរុញច្រានឲ្យត្រឡប់ទៅវិញ។
លោកប្រធានាធិបតីអ៊ុយក្រែនរូបនេះបញ្ជាក់ថា តំបន់ Severodonetsk គឺជាសមរភូមិចុងក្រោយរបស់កងទ័ពរុស្ស៊ី ដែលលោកថា បើទ័ពរុស្ស៊ីមិនអាចវាយកាន់កាប់បាន គឺតំបន់ផ្សេងៗទៀត ទ័ពរុស្ស៊ីនឹងមិនមានស្មារតីប្រយុទ្ធស្វិតស្វាញនោះទេ។ តែលោកទទូចថា ដោយសារតែអាវុធរបស់បស្ចិមប្រទេសនេះហើយ បាននាំឲ្យកងទ័ពអ៊ុយក្រែនមានលទ្ធភាព និងសមត្ថភាពខ្លាំងទប់ទល់នឹងអាវុធទំនើបៗរបស់រុស្ស៊ី។ លោកសូមគោរព និងកោតសរសើរដល់កងទ័ពអ៊ុយក្រែន ដែលបានប្រយុទ្ធដ៏អង់អាចក្លាហានការពារដែនដីរបស់ខ្លួន។ លោកសូមគោរពផងដែរដល់ប្រជាជនអ៊ុយក្រែននៅតំបន់ដុនបាស ដែលបានឱ្យកូនចៅរបស់ពួកគេកាន់អាវុធប្រយុទ្ធនឹងសត្រូវឈ្លានពាន។ លោកបញ្ជាក់ថា ដុនបាសគឺនៅតែជាទឹកដីរបស់អ៊ុយក្រែន។
លោកបន្តថា ដុនបាសមិនអាចក្លាយជាទឹកដីរបស់អ្នកឈ្លានពានឡើយ។
លោកប្រធានាធិបតីអ៊ុយក្រែនដែលប្រែក្លាយឆាកជីវិតពីតារាកំប្លែងមកជាប្រធានាធិបតី តែងតែសច្ចាថា នឹងមិនបណ្ដោយឱ្យទឹកដីអ៊ុយក្រែន ក្លាយជារបស់ប្រទេសឈ្លានពានឡើយ ទោះជាកាលៈទេសៈណាក៏ដោយ។
សម្រាប់លោក Zelenskyy ការប្រគល់ទឹកដីឱ្យប្រទេសឈ្លានពានជាថ្នូរនឹងសន្តិភាព ជាថ្នូរនឹងការពង្រឹងអំណាចដើម្បីគ្រួសារ បក្សពួក គឺជាអំពើក្បត់ជាតិដែលលោកមិនអាចធ្វើបានឡើយ ទោះជាលោកត្រូវការចរចាដើម្បីពន្លត់ភ្លើងសង្គ្រាមក៏ដោយ៕