លោក សម រង្ស៊ី អតីតប្រធានគណបក្សសង្គ្រោះជាតិដែលកំពុងរស់នៅនិរទេសគេចពីការចាប់ខ្លួនរបស់តុលាការ ហើយដែលតែងនិយាយមិនដាច់ពីមាត់ថា «សម រង្ស៊ី និង កឹម សុខា ជាមនុស្សតែមួយ ជាដៃគូមិនបែកគ្នា» បានធ្វើការរិះគន់សម្ពន្ធមិត្តនយោបាយរបស់ខ្លួនជាលើកដំបូង ដោយទាមទារឲ្យលោក កឹម សុខា បកស្រាយចំពោះការលើកឡើងថា «លោកមិនទៅបោះឆ្នោត ព្រោះគ្មានគណបក្សណាដែលត្រូវបោះឲ្យ»។
ក្នុងបទសម្ភាសន៍ជាមួយវិទ្យុអាស៊ីសេរី កាលពីថ្ងៃទី៨ ខែមិថុនា ឆ្នាំ២០២២ លោក សម រង្ស៊ី បានចាត់ទុកសម្ដីរបស់លោក កឹម សុខា ដែលនិយាយថា «ភ្លើងទៀនមិនខុសពីគណបក្សប្រជាជនកម្ពុជា» ប្រៀបដូចជាជេរប្រមាថមើលងាយអ្នកប្រជាធិបតេយ្យ និងអ្នកស្នេហាជាតិដែលបានគាំទ្របក្សសង្គ្រោះជាតិ។ លោកសង្ឃឹមថា លោក កឹម សុខា នឹងភ្ញាក់រឭកថា បក្សភ្លើងទៀនគ្រាន់បើជាងគណបក្សប្រជាជនឆ្ងាយណាស់។ លោក សម រង្ស៊ី ក៏បានបន្ទោសលោក កឹម សុខា ថាមានកំហុសធ្ងន់ណាស់ដែលមិនព្រមចេញទៅបោះឆ្នោតឲ្យគណបក្សភ្លើងទៀន។
សកម្មជនគណបក្សសង្គ្រោះជាតិ លោក ហ៊ុន កុសល បានប្រាប់សារព័ត៌មាន The Cambodia Daily នៅមុនការផ្សាយនេះបន្តិចថា លោក កឹម សុខា ប្រើប្រាស់សិទ្ធិមិនទៅបោះឆ្នោតដោយសារលោកមើលឃើញថា គ្មានបក្សនយោបាយណាអាចទុកចិត្តបាន។ លោកបន្តថា លោក កឹម សុខា មិនបានប្រៀបធៀបបក្សភ្លើងទៀនទៅនឹងបក្សប្រជាជនកម្ពុជា ឬយកបក្សប្រជាជនមកប្រៀបធៀបជាមួយគណបក្សភ្លើងទៀនដូចការចោទប្រកាន់របស់លោក សម រង្ស៉ី នោះទេ។ លោកបន្តថា ការចោទប្រកាន់របស់លោក សម រង្ស៊ី ធ្វើឡើងក្នុងចេតនាទុច្ចរិតមួលបង្កាច់លោក កឹម សុខា ដោយគ្រាន់តែប្រើសិទ្ធិមិនទៅបោះឆ្នោត។
លោក ហ៊ុន កុសល អះអាងថា អ្នកដែលត្រូវភ្ញាក់រឭកនោះ គឺលោក សម រង្ស៉ី ទៅវិញទេ ព្រោះលោក កឹម សុខា មិនបានបំបែកខ្លួនចេញពីស្មារតីរួបរួមសង្គ្រោះជាតិទៅចូលរួមបោះឆ្នោត ដើម្បីគ្រាន់តែបង្កើតរូបភាពប្រជាធិបតេយ្យគ្មានខ្លឹមសារជាមួយអ្នកសម្លាប់ប្រជាធិបតេយ្យនោះទេ។
កាលពីថ្ងៃទី២៨ ខែវិច្ឆិកា ឆ្នាំ២០២១ លោក កឹម សុខា បានបង្ហោះសារនៅលើហ្វេសប៊ុករបស់លោកថា លោក សម រង្ស៊ី និងសហការីនៅតែបន្តយកឈ្មោះ និងរូបថតរបស់លោកទៅប្រើប្រាស់ភ្ជាប់ជាមួយសកម្មភាពនានា ដែលលោកថា «មិនមានការអនុញ្ញាត ឬការគាំទ្រ» ពីរូបលោកឡើយ។
លោកសរសេរថា លោក សម រង្ស៊ី និងសហការីបានដើរចេញពីគោលការណ៍ និងស្មារតីដើមនៃការរួបរួមទៅបង្កើតចលនានយោបាយផ្សេងៗ និងមុខតំណែងរបស់ខ្លួនឯង ជាពិសេសថ្មីៗនេះ គឺការត្រឡប់ទៅគាំទ្រដោយចំហ ឬនៅពីក្រោយការដឹកនាំគណបក្សនយោបាយចាស់របស់ពួកគេ គឺគណបក្សភ្លើងទៀន។ លោកបញ្ជាក់ថា ទង្វើរបស់ពួកគេសបញ្ជាក់ឲ្យឃើញថា «សម រង្ស៊ី និង កឹម សុខា» មិនមែនជាមនុស្សតែមួយទៀតនោះទេ ព្រោះសកម្មភាពទាំងអស់នេះមិនមានការគាំទ្រ ឬជាជំហររបស់លោកឡើយ។
លោក កឹម សុខា ត្រូវបានតុលាការដកសិទ្ធិធ្វើនយោបាយជាង ៤ឆ្នាំមកហើយចាប់ពីថ្ងៃដែលលោកត្រូវបានសមត្ថកិច្ចឆ្មក់ចូលចាប់ខ្លួនទាំងយប់នៅគេហដ្ឋានក្នុងរាជធានីភ្នំពេញ អំឡុងថ្ងៃទី៣ ខែកញ្ញា ឆ្នាំ២០១៧ ក្រោមបទចោទថា «គប់គិតជាមួយបរទេសចង់ផ្តួលរំលំរដ្ឋាភិបាល» ខណៈគណបក្សប្រឆាំងមួយនេះទទួលបានសំឡេងឆ្នោតគាំទ្រជាង ៤៣ភាគរយ ប្រហាក់ប្រហែលគណបក្សប្រជាជនកម្ពុជាដែរនោះ។
បច្ចុប្បន្ន លោក កឹម សុខា ត្រូវបានតុលាការដាក់ឱ្យស្ថិតក្រោមការតាមដានមិនឱ្យចេញទៅក្រៅប្រទេស និងធ្វើសកម្មភាពនយោបាយ ដែលការណ៍នេះជំរុញឱ្យក្រុមប្រទេសលោកសេរីដែលនាំមុខគេដោយសហរដ្ឋអាមេរិក និងសហភាពអឺរ៉ុប ចង់ឃើញកម្ពុជាវិលទៅរកការផ្សះផ្សាជាតិ ដើម្បីស្ដារប្រជាធិបតេយ្យឡើងវិញតាមរយៈការបើកផ្លូវឱ្យគណបក្សប្រឆាំងធំមួយនេះបានចូលរួមប្រកួតការបោះឆ្នោតឡើងវិញ៕