សាលាដំបូងរាជធានីភ្នំពេញ បានប្រកាសសាលក្រមលើសំណុំរឿងឧកញ៉ា សង ថន និងអតីតអភិបាលរងខេត្តបាត់ដំបង លោក ស៊ូ អារ៉ាហ្វាត់ ដាក់ពន្ធនាគារក្នុងម្នាក់ៗចំនួន ៧ឆ្នាំ និងពិន័យជាប្រាក់ក្នុងម្នាក់ៗចំនួន ២ម៉ឺន ៥ពាន់ដុល្លាអាមេរិក ទាក់ទងនឹងករណីជម្លោះដីធ្លីមួយកន្លែងស្ថិតនៅក្នុងស្រុកគាស់ក្រឡ ខេត្តបាត់ដំបង។
សាលាដំបូងរាជធានីភ្នំពេញ បានប្រកាសសាលក្រមលើសំណុំរឿងឧកញ៉ា សង ថន និងលោក ស៊ូ អារ៉ាហ្វាត់ ដែលជាអតីតអភិបាលរងខេត្តបាត់ដំបង នៅថ្ងៃទី១០ ខែមិថុនា ឆ្នាំ២០២២ ដែលត្រូវបានចោទប្រកាន់ពីបទ «ក្លែងឯកសារសាធារណៈ បទផ្តើមគំនិតក្នុងបទបំផ្លិចបំផ្លាញដោយចេតនា បទគៃបំបាត់ដោយទុច្ចរិត និងបទសូកប៉ាន់» ក្នុងសំណុំរឿងជម្លោះដីធ្លីមួយកន្លែងស្ថិតនៅក្នុងស្រុកគាស់ក្រឡ ខេត្តបាត់ដំបង។
សាលាដំបូងរាជធានីភ្នំពេញ បានប្រកាសរឹបអូសយកដីជាច្រើនកន្លែងរបស់ឧកញ៉ា សង ថន ដែលមានទីតាំងនៅក្នុងស្រុកគាស់ក្រឡ ខេត្តបាត់ដំបង ក្នុងចំណោមដីដែលជាកម្មសិទ្ធិរបស់លោកដែលមានប្រមាណ ៥ពាន់ហិកតារមានទំហំស្មើនឹង ១ភាគ៤ នៃផ្ទៃដីទាំងមូលនៃស្រុកគាស់ក្រឡ ខេត្តបាត់ដំបង។
សាលក្រមរបស់សាលាដំបូងរាជធានីភ្នំពេញនេះ ធ្វើឡើងដើម្បីសម្រេចផ្ដន្ទាទោសឧកញ៉ា សង ថន និងអតីតអភិបាលរងខេត្តបាត់ដំបង ដែលត្រូវបានចោទប្រកាន់ពាក់ព័ន្ធការប្រព្រឹត្តអំពើពុករលួយកាលពីអំឡុងឆ្នាំ២០២០ កន្លងទៅ។
ឧកញ៉ា សង ថន ត្រូវបានចាប់ខ្លួនដោយអង្គភាពប្រឆាំងអំពើពុករលួយ (ACU) កាលពីថ្ងៃទី២៧ ខែមិថុនា ឆ្នាំ២០២០ កន្លងទៅ ពាក់ព័ន្ធនឹងការប្រព្រឹត្តអំពើពុករលួយក្នុងទំនាស់ដីធ្លីក្នុងស្រុកគាស់ក្រឡ ខេត្តបាត់ដំបង ដែលត្រូវបានចោទប្រកាន់ពីបទ «ធ្វើជាម្ចាស់គម្រោងបំផ្លិចបំផ្លាញ និងកេងបន្លំ ស៊ីសំណូក និងប្រើប្រាស់ឯកសារសាធារណៈក្លែងក្លាយ» តាមមាត្រា៦៣០ នៃក្រមព្រហ្មទណ្ឌ។ ចំណែកលោក ស៊ូ អារ៉ាហ្វាត់ អតីតអភិបាលរងខេត្តបាត់ដំបង និងជាប្រធានគណៈកម្មការខេត្តដោះស្រាយវិវាទដីធ្លីនៅស្រុកគាស់ក្រឡ ត្រូវបានចោទប្រកាន់ពីបទ «បំផ្លាញ និងកេងបន្លំ និងទទួលសំណូក» តាមមាត្រា៦០៨ នៃក្រមព្រហ្មទណ្ឌ ហើយអ្នកទាំងពីរត្រូវបាននាំខ្លួនមកកាន់ទីស្នាក់ការអង្គភាពប្រឆាំងអំពើពុករលួយ (ACU) កាលពីអំឡុងខែកក្កដា ឆ្នាំ២០២០ ពាក់ព័ន្ធនឹងសំណុំរឿងដូចគ្នានេះ។
កាលពីសវនាការនៅពាក់កណ្តាលខែឧសភា ឆ្នាំ២០២២ ឧកញ៉ា សង ថន បានប្រាប់តុលាការថាគាត់ជាអ្នករកស៊ីដោយស្មោះត្រង់ ហើយដីដែលគាត់កាន់កាប់នៅស្រុកគាស់ក្រឡ នោះ គឺជាដីដែលគាត់បានទិញដោយស្របច្បាប់ពីអ្នកភូមិទាំងអស់ ហើយប័ណ្ណកម្មសិទ្ធិដីធ្លីត្រូវបានមន្ត្រីឃុំ ស្រុក និងខេត្តពាក់ព័ន្ធ ចេញឲ្យប្រើប្រាស់ដោយស្របច្បាប់ដោយគ្មានការក្លែងបន្លំនោះទេ។ ជាងនេះទៀត លោក ស៊ូ អារ៉ាហ្វាត់ បានសារភាពថា គាត់បានទទួលប័ណ្ណកម្មសិទ្ធិលើដីទំហំ ៥ពាន់ហិកតាររបស់ឧកញ៉ា សង ថន កាលពីឆ្នាំ២០២០ ប្រាកដមែន ពីព្រោះឯកសាររបស់លោក សង ថន ត្រូវបានអនុម័តដោយអាជ្ញាធរថ្នាក់ក្រោមពាក់ព័ន្ធរួចអស់ទៅហើយនោះ។
យ៉ាងណាក៏ដោយ ជុំវិញករណីអំពើពុករលួយនេះ លោក ហ៊ុន សែន កាលពីថ្ងៃទី២៧ ខែមិថុនា ឆ្នាំ២០២០ កន្លងទៅ ក៏បានចេញអនុក្រឹត្យបញ្ចប់មុខតំណែងលោក ម៉ៅ សុចាន់ ពីអភិបាលនៃគណៈអភិបាលស្រុកគាស់ក្រឡ ខេត្តបាត់ដំបង ផងដែរ ប៉ុន្តែអតីតអភិបាលស្រុករូបនេះមិនត្រូវបានចោទប្រកាន់ ឬនាំខ្លួនមកសួរនាំជុំវិញអំពើពុករលួយក្នុងជម្លោះដីធ្លីស្រុកគាស់ក្រឡ នេះទេ។
អ្នកឃ្លាំមើលរិះគន់ថា សំណុំរឿងនេះហាក់នៅមានភាពអាថ៌កំបាំងនៅឡើយ ដែលបង្កឱ្យឃើញនូវការប្រព្រឹត្តអំពើពុករលួយថ្មីមួយដើម្បីកាត់ក្តីលើអំពើពុករលួយចាស់ ដែលតុលាការគប់គិតគ្នាជាមួយអ្នកមានលុយ និងអ្នកមានអំណាចដើម្បីបិទបាំងការពិត ជាពិសេសអ្នកមានអំណាចដែលជាប់ពាក់ព័ន្ធនឹងសំណុំរឿងនេះ៕