ប្រធានគណបក្សសង្គ្រោះជាតិដែលមិនទាន់មានសេរីភាពពេញលេញឡើងវិញ លោក កឹម សុខា ថារាជរដ្ឋាភិបាលនៃប្រទេសញូហ្សេឡែន (New Zealand) កំពុងតាមដាននូវដំណើរការសវនាការ និងសិទ្ធិសេរីភាពរបស់លោកជាប់ជានិច្ច ជាពិសេសសិទ្ធិក្នុងការចូលរួមធ្វើសកម្មភាពនយោបាយ។
មេដឹកនាំបក្សប្រឆាំងដែលកំពុងរងការគាបសង្កត់ពីបក្សកាន់អំណាច លោក កឹម សុខា បានសរសេរលើទំព័រហ្វេសប៊ុករបស់លោកនៅថ្ងៃទី១៣ មិថុនា ថា លោកបានជួបពិភាក្សាការងារនៅគេហដ្ឋានរបស់លោកជាមួយឯកអគ្គរាជទូតថ្មីនៃប្រទេសញូហ្សេឡែន ប្រចាំនៅកម្ពុជា ថៃ និងឡាវ ជុំវិញសិទ្ធិមនុស្ស និងលទ្ធិប្រជាធិបតេយ្យនៅកម្ពុជាសព្វថ្ងៃនេះ។ មេដឹកនាំបក្សប្រឆាំង លោក កឹម សុខា អះអាងថា ឯកអគ្គរាជទូតថ្មីនៃប្រទេសញូហ្សេឡែន ក៏មិនខុសពីឯកអគ្គរដ្ឋទូត និងឯកអគ្គរាជទូតនៃប្រទេសដែលប្រកាន់យកនូវគោលការណ៍ប្រជាធិបតេយ្យសំខាន់ៗក្នុងតំបន់ និងពិភពលោកដទៃទៀតដែរ ដែលនៅតែផ្តល់កិត្តិយស និងផ្តល់តម្លៃដល់រូបលោកថាជាមេដឹកនាំដែលតំណាងឱ្យសំឡេងពលរដ្ឋខ្មែរដែលគាំទ្រលទ្ធិប្រជាធិបតេយ្យពិតប្រាកដនៅកម្ពុជាក្នុងពេលបច្ចុប្បន្ននេះ។
ការអះអាងនេះ ធ្វើឡើងស្របពេលដែលសំណុំរឿងរបស់លោក កឹម សុខា កំពុងដំណើរការនៅក្នុងនីតិវិធីរបស់តុលាការនៅឡើយ ដែលគេមើលឃើញថា តុលាការកំពុងព្យាយាមអូសបន្លាយសំណុំរឿងរបស់លោករហូតមក។
ប្រធានគណបក្សសង្គ្រោះជាតិ លោក កឹម សុខា ត្រូវបានអាជ្ញាធរក្រុងភ្នំពេញចាប់ខ្លួនកាលពីថ្ងៃទី៣ ខែកញ្ញា ឆ្នាំ២០១៧ ពីបទ ឃុបឃិតជាមួយរដ្ឋបរទេស ដើម្បីផ្តួលរំលំរដ្ឋាភិបាលកម្ពុជា ប៉ុន្តែរហូតមកទល់នឹងពេលនេះ លោកនៅតែមានភាពស្អាតស្អំ ព្រោះតុលាការកម្ពុជាមិនទាន់កាត់ទោសលោកពីបទល្មើសណាមួយនៅឡើយទេ។
ទាក់ទិននឹងបញ្ហានេះ សហមេធាវីការពារក្តីប្រធានគណបក្សសង្គ្រោះជាតិ លោក ចាន់ ចេន កាលពីថ្ងៃទី១ ខែមិថុនា ឆ្នាំ២០២២ ក្នុងសវនាការលើកទី៤២ បានរិះគន់ថា តុលាការនៅតែមិនហ៊ានសាកសួរលើអង្គហេតុពិតប្រាកដថា តើរដ្ឋបរទេសមួយណាដែលបានឃុបឃិតជាមួយលោក កឹម សុខា ដើម្បីផ្តួលរំលំរដ្ឋាភិបាលកម្ពុជា។
សហមេធាវីការពារក្តីទាំងអស់របស់លោក កឹម សុខា បានទាមទារឲ្យតុលាការសាកសួរលើអង្គហេតុពិតប្រាកដ ប៉ុន្តែតុលាការបែរជាព្យាយាមចោទសួរលើខ្លឹមសារក្នុងវីដេអូជាងមួយម៉ោងដែលតុលាការបានកាត់ជាកង់ៗប្រវែង ១៦នាទីម្តង ដើម្បីសាកសួរលោក កឹម សុខា ពីខ្លឹមសារដែលគាត់បាននិយាយនោះទៅវិញ។
ក្រុមអ្នកឃ្លាំមើលសង្គម លើកឡើងថា តុលាការហាក់មានចេតនាគេចវេះពីការដោះស្រាយសំណុំរឿងរបស់ប្រធានគណបក្សសង្គ្រោះជាតិ លោក កឹម សុខា ដើម្បីផ្តល់យុត្តិធម៌ជូនរូបលោក ព្រោះថាតុលាការកំពុងព្យាយាមបង្វែរសាច់រឿងនៃសំណុំរឿងរបស់លោកពីការឃុបឃិតជាមួយរដ្ឋបរទេស មកជាការឃុបឃិតជាមួយអតីតមេដឹកនាំប្រឆាំង លោក សម រង្ស៊ី វិញកាលពីក្នុងសវនាការលើកទី៤៣ នៅថ្ងៃទី៨ មិថុនា កន្លងទៅនេះ។
ជុំវិញសំណុំរឿងរបស់មេដឹកនាំបក្សប្រឆាំង លោក កឹម សុខា នេះ ឯកអគ្គរដ្ឋទូតសហរដ្ឋអាមេរិក លោក Patrick Murphy ធ្លាប់បានលើកឡើងកាលពីពេលថ្មីៗនេះថា ក្នុងនាមលោកតំណាងឱ្យសហរដ្ឋអាមេរិក នៅតែខកចិត្តចំពោះសវនាការដែលមានចរិតនយោបាយរបស់មេដឹកនាំបក្សប្រឆាំងដែលនៅតែអូសបន្លាយដោយគ្មានដំណោះស្រាយ។ ក្នុងនោះ លោកបញ្ជាក់ថា កម្ពុជានឹងទទួលបានផលប្រយោជន៍ពីការស្ដារនីតិសម្បទានៃសិទ្ធិនយោបាយរបស់លោក កឹម សុខា ឡើងវិញផងដែរ ប្រសិនបើកម្ពុជាធ្វើឱ្យមាននូវលំហប្រជាធិបតេយ្យនេះ។
យ៉ាងណាក៏ដោយ កាលពីអំឡុងខែកញ្ញា ឆ្នាំ២០២០ ក្នុងកិច្ចប្រជុំគណៈរដ្ឋមន្ត្រីនៅវិមានសន្តិភាព មេដឹកនាំបក្សកាន់អំណាច លោក ហ៊ុន សែន បានអះអាងថា ករណីលោក កឹម សុខា អាចនឹងត្រូវពន្យារពេល ៤ឆ្នាំទៀត គឺត្រូវពន្យាររហូតដល់ក្រោយការបោះឆ្នោតឃុំ-សង្កាត់ឆ្នាំ២០២២ និងក្រោយការបោះឆ្នោតជាតិក្នុងឆ្នាំ២០២៣ ឯណោះ៕