បុរសខ្លាំងក្រាញអំណាចជិត ៤០ឆ្នាំ ប្រកាសថានឹងដំឡើងប្រាក់បៀវត្សរ៍ដល់មន្ត្រីរាជការ និងកងកម្លាំងប្រដាប់អាវុធគ្រប់ប្រភេទនៅក្នុងឆ្នាំ២០២២ បន្ទាប់ពីខកខានរយៈពេលពីរឆ្នាំ និងត្រៀមបោះឆ្នោតជ្រើសតាំងតំណាងរាស្ត្រនៅឆ្នាំ២០២៣។
ក្នុងពិធីប្រគល់សញ្ញាបត្រដល់សិស្សសាលាភូមិន្ទរដ្ឋបាល នាព្រឹកថ្ងៃទី១៣ ខែមិថុនា ឆ្នាំ២០២២ លោក ហ៊ុន សែន ថ្លែងថា រដ្ឋាភិបាលខកខានមិនបានដំឡើងប្រាក់បៀវត្សរ៍ដល់មន្ត្រីរាជការ និងកងកម្លាំងប្រដាប់អាវុធរយៈពេល ២ឆ្នាំ ដោយសារកម្ពុជាជួបវិបត្តិកូវីដ-១៩។ លោកបន្តថា រដ្ឋាភិបាលនឹងដំឡើងឱ្យបានច្រើនចំពោះមន្ត្រីណាដែលមានប្រាក់បៀវត្សរ៍ទាប ហើយអ្នកដែលមានបៀវត្សរ៍ខ្ពស់ នោះរដ្ឋាភិបាលនឹងដំឡើងតិចតួចប៉ុណ្ណោះ។
មួយវិញទៀត ការដំឡើងនេះត្រូវផ្តល់អាទិភាពដល់គ្រូបង្រៀន និងគ្រូពេទ្យយ៉ាងហោចណាស់ឱ្យបានចំនួន ១លាន ៥សែនរៀល (១.៥០០.០០០រៀល) ក្នុងមួយខែ។ សម្រាប់ការដំឡើងផ្សេងៗទៀតនោះ លោកថាត្រូវធ្វើតាមរបៀបផ្សេង ដោយអ្នកប្រាក់ខែច្រើនឡើងកម្រិតណាមួយ អ្នកប្រាក់ខែតិចឡើងកម្រិតណាមួយដើម្បីឱ្យសមតុល្យនឹងគ្នា។
យ៉ាងណាក៏ដោយ ការប្រកាសដំឡើងប្រាក់បៀវត្សរ៍មន្ត្រីរាជការ និងកងកម្លាំងប្រដាប់អាវុធរបស់លោក ហ៊ុន សែន ដែលជាមេដឹកនាំកាន់អំណាចជិត ៤០ឆ្នាំ បានធ្វើឡើងបន្ទាប់ពីកម្ពុជាបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ កាលពីថ្ងៃទី៥ ខែមិថុនា ឆ្នាំ២០២២ និងគ្រោងបោះឆ្នោតជ្រើសតាំងតំណាងរាស្ត្រនៅឆ្នាំ២០២៣ ខាងមុខ៕