លោក ហ៊ុន សែន អះអាងថា ខ្លួនកំពុងធ្វើលិខិតទៅកាន់មេយោធាផ្ដាច់ការភូមា លោក មីន អ៊ុងឡាំង ឱ្យពិចារណាលើការកាត់ទោសប្រហារជីវិតយុវជន ២នាក់ដែលធ្លាប់ចេញមុខប្រឆាំងនឹងរបបសឹកមួយនេះកាលពីពេលកន្លងទៅនេះ។
ការអះអាងរបស់លោក ហ៊ុន សែន ធ្វើឡើងក្នុងពិធីចែកសញ្ញាបត្រជូននិស្សិតសាលាភូមិន្ទរដ្ឋបាល និងការបើកវគ្គបណ្ដុះបណ្ដាលឆ្នាំសិក្សា២០២២ នៅថ្ងៃទី១៣ ខែមិថុនា ឆ្នាំ២០២២ នេះថា លោកសង្ឃឹមថាមេដឹកនាំផ្ដាច់ការនៃរបបសឹកភូមា នឹងពិនិត្យពិចារណាលើសំណើរបស់លោកដែលជាប្រធានអាស៊ាននៅពេលនេះ។
លោក ហ៊ុន សែន អះអាងថា ការចេញមុខដាក់សំណើទៅមេផ្ដាច់ការរបបសឹកភូមានេះ គឺដោយសារតែលោកមិនចង់ឃើញបញ្ហានៅប្រទេសភូមា កាន់តែមានស្ថានភាពអាក្រក់ឡើងៗថែមទៀត ហើយលោកក៏មិនចង់ឃើញនូវអ្វីដែលកើតឡើងបន្ថែមទៅលើអ្វីដែលជាបញ្ហាកំពុងតែកើតមានស្រាប់នោះដែរ។
លោកប្ដេជ្ញាថា នឹងសម្របសម្រួល និងដោះស្រាយបញ្ហាវិបត្តិនយោបាយនៅភូមា ឱ្យទទួលបានផ្លែផ្កា បើទោះដឹងថាវាលំបាកក៏ដោយ ពីព្រោះការទាញភូមាឱ្យត្រឡប់ទៅរកកៅអីអាស៊ានវិញ គឺជារឿងចាំបាច់បំផុត ព្រោះថាបើមិនជួយដោះស្រាយបញ្ហាមីយ៉ាន់ម៉ាឱ្យទាន់ពេលវេលាទេ នោះអាស៊ានក៏ប្រឈមមុខនឹងការបែកបាក់គ្នាដែរ។
ការអះអាងនេះ ធ្វើឡើងបន្ទាប់ពីយុវជនភូមា ២នាក់កំពុងប្រឈមមុខនឹងការផ្ដន្ទាទោសប្រហារជីវិតដោយសារតែពួកគេចេញមុខប្រឆាំងនឹងការប្លន់អំណាចនៃរបបសឹករបស់មេយោធាផ្ដាច់ការភូមាកាលពីពេលកន្លងទៅ។
កាលពីថ្ងៃទី១០ ខែមិថុនា ឆ្នាំ២០២២ ប្រមុខរដ្ឋាភិបាលកម្ពុជា និងជាប្រធានអាស៊ានប្តូរវេន លោក ហ៊ុន សែន ធ្លាប់បានផ្ញើលិខិតមួយស្នើឲ្យមេយោធាផ្ដាច់ការភូមា លោក មីន អ៊ុងឡាំង ពិចារណាឡើងវិញនូវការផ្ដន្ទាទោស និងផែនការប្រហារជីវិតលើបុគ្គលមួយចំនួនដែលប្រឆាំងនឹងរបបសឹករបស់លោក។
លោក ហ៊ុន សែន បញ្ជាក់ថា ការផ្ដន្ទាទោស និងផែនការប្រហារជីវិតលើបុគ្គលមួយចំនួនដែលប្រឆាំងនឹងរបបសឹកភូមា បានបង្កឲ្យមានការព្រួយបារម្ភយ៉ាងខ្លាំងក្នុងចំណោមរដ្ឋជាសមាជិកអាស៊ាន ក៏ដូចជាដៃគូខាងក្រៅអាស៊ានផងដែរ។
កាលពីថ្ងៃទី៣ ខែមិថុនា ឆ្នាំ២០២២ របបសឹកភូមាបានប្រកាសថា ពួកគេនឹងកាត់ទោសប្រហារជីវិតមនុស្ស ៤នាក់ ដោយការព្យួរក ក្នុងនោះរួមមាន អតីតសមាជិកសភាមកពីគណបក្សសម្ព័ន្ធជាតិប្រជាធិបតេយ្យរបស់អ្នកស្រី អ៊ុងសាន ស៊ូជី។ អតីតមេដឹកនាំចលនានិស្សិតដ៏ល្បីឈ្មោះដែលធ្លាប់ចេញមុខប្រឆាំងរបបសឹកភូមា អតីតអ្នកចម្រៀង Hip Hop និងសកម្មជនដើម្បីលទ្ធិប្រជាធិបតេយ្យម្នាក់ទៀតផងដែរ។
អនុប្រធានវេទិកាពលរដ្ឋ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី១៣ មិថុនា ថា លិខិតរបស់មេដឹកនាំកម្ពុជា លោក ហ៊ុន សែន ដែលស្នើសុំឱ្យលើកលែងទោសប្រហារជីវិតនេះ គឺជារឿងត្រឹមត្រូវ។ ជាងនេះទៀត លោក ហ៊ុន សែន ក្នុងនាមប្រធានអាស៊ានក៏ត្រូវតែស្នើឱ្យមានការលើកលែងទោសដល់អ្នកទោសទាំងអស់ និងជំរុញឱ្យមានការចរចាគ្រប់ភាគីទាំងអស់ដែលកំពុងមានជម្លោះផ្ទៃក្នុងដាក់គ្នានៅពេលនេះផងដែរ ជាពិសេសគឺត្រូវទាមទារឱ្យមានការចរចារវាងរបបសឹក និងអ្នកស្រី អ៊ុងសាន ស៊ូជី តែម្តង។
លោក ម៉ែន ណាត អះអាងថា ការស្នើសុំរបស់លោក ហ៊ុន សែន ចំពោះបញ្ហានេះ ហាក់មិនមានសង្ឃឹមនោះទេ ប្រសិនបើបញ្ហានេះប៉ះពាល់ដល់ប្រយោជន៍របស់របបសឹកភូមា ព្រោះថាអត្តចរិតរបស់មេដឹកនាំភូមាដែលកំពុងគ្រប់គ្រងអំណាចផ្ដាច់ការសព្វថ្ងៃនេះ ក៏មិនខុសពីចរិតរបស់លោក ហ៊ុន សែន ដែរ។ លោកបន្តថា សហគមន៍អន្តរជាតិក៏ធ្លាប់ស្នើឱ្យរដ្ឋាភិបាលលោក ហ៊ុន សែន គោរពសិទ្ធិមនុស្សនៅកម្ពុជាដែរ ប៉ុន្តែលោក ហ៊ុន សែន មិនដែលធ្វើតាមការស្នើសុំរបស់ពួកគេនោះឡើយ។
អនុប្រធានវេទិកាពលរដ្ឋរូបនេះបញ្ជាក់ថា ស្ថានភាពនៅប្រទេសភូមា ក្នុងពេលបច្ចុប្បន្ននេះហាក់ពុំមានភាពប្រែប្រួលទៅរកភាពវិជ្ជមានជាដុំកំភួនទេ ខណៈគោលការណ៍កុងសង់ស៊ីសទាំង ៥ចំណុចរបស់អាស៊ាននៅតែមិនទាន់ត្រូវបានអនុវត្តនៅឡើយ ស្របពេលដែលការកាត់ទោសប្រហារជីវិតនៅប្រទេសនេះត្រូវវិលមកវិញសាជាថ្មី ក្រោយរដ្ឋប្រហារដែលដឹកនាំដោយរបបសឹកសព្វថ្ងៃនេះ។
របបសឹកភូមា បានប្រកាសអនុវត្តទោសប្រហារជីវិតជាមួយអ្នកទោសនយោបាយដែលប្រឆាំងនឹងរដ្ឋប្រហាររបស់ខ្លួនឡើងវិញ បន្ទាប់ពីប្រទេសភូមាបំបាត់ចោលនូវច្បាប់នេះអស់រយៈពេលប្រមាណជា ៣០ឆ្នាំមកហើយនោះ បើគិតចាប់តាំងពីឆ្នាំ១៩៩០៕