អាល្លឺម៉ង់អំពាវនាវឱ្យរដ្ឋាភិបាលកម្ពុជា គោរពសេរីភាពបញ្ចេញមតិ និងប្រមូលផ្ដុំដោយសន្តិវិធី ក្រោយពីតុលាការក្រុងភ្នំពេញបានកាត់ទោសមេដឹកនាំគណបក្សសង្គ្រោះជាតិ រួមទាំងកញ្ញា សេង ធារី ដាក់ពន្ធនាគារចន្លោះពី ៥ ដល់ ៨ឆ្នាំ ពីបទ «ញុះញង់ និងរួមគំនិតក្បត់» កាលពីថ្ងៃទី១៤ ខែមិថុនា។
ស្ថានទូតអាល្លឺម៉ង់ប្រចាំនៅកម្ពុជា បានសរសេរលើទំព័រហ្វេសប៊ុកផ្លូវការរបស់ខ្លួនកាលពីព្រឹកថ្ងៃទី១៦ ខែមិថុនា ឆ្នាំ២០២២ អំពាវនាវឱ្យរដ្ឋាភិបាលកម្ពុជាគោរពសេរីភាពនៃការបញ្ចេញមតិ និងការប្រមូលផ្ដុំដោយសន្តិវិធី ក្រោយពីសាលាដំបូងរាជធានីភ្នំពេញបានប្រកាសសាលក្រមលើសមាជិកគណបក្សប្រឆាំង ថាមានទោសពីបទ «ញុះញង់» និង «រួមគំនិតក្បត់»។
កាលពីថ្ងៃទី១៤ ខែមិថុនា ឆ្នាំ២០២២ ចៅក្រមសាលាដំបូងរាជធានីភ្នំពេញ លោក រស់ ពិសិដ្ឋ បានប្រកាសសាលក្រមផ្ដន្ទាទោសទៅលើថ្នាក់ដឹកនាំសកម្មជន និងអ្នកគាំទ្រគណបក្សសង្គ្រោះជាតិ ប្រមាណ ៦០នាក់ ដាក់ពន្ធនាគារចន្លោះពី ៥ ដល់ ៨ឆ្នាំ ខណៈកញ្ញា សេង ធារី ត្រូវសមត្ថកិច្ចប្រមាណ ៥០នាក់ចាប់ដាក់រថយន្តនគរបាលទាំងកម្រោល បញ្ជូនទៅឃុំខ្លួននៅក្នុងពន្ធនាគារភ្លាមៗ។
ក្រោយពីមានការសម្រេចនេះ ស្ថានទូតអាមេរិកប្រចាំនៅកម្ពុជា និងសហគមន៍អន្តរជាតិ ស្នើឱ្យអាជ្ញាធរកម្ពុជាដោះលែងកញ្ញា សេង ធារី និងសកម្មជនសិទ្ធិមនុស្សដទៃទៀតពីសាលក្រមដ៏អយុត្តិធម៌ ដោយចាត់ទុកថាជាការបង្ក្រាបសំឡេងប្រជាធិបតេយ្យដែលនៅសេសសល់ចុងក្រោយនៅកម្ពុជា។
ស្ថានទូតអាមេរិកបញ្ជាក់ថា សេរីភាពក្នុងការបញ្ចេញមតិ និងការចងក្រងគ្នាជាក្រុម ជាសមាគម ហើយនិងការអត់ឱនចំពោះទស្សនៈប្រឆាំង គឺជាផ្នែកដ៏មានសារសំខាន់បំផុតនៃលទ្ធិប្រជាធិបតេយ្យ។ រដ្ឋាភិបាលអាមេរិកអំពាវនាវឱ្យអាជ្ញាធរកម្ពុជាដោះលែងរូបគាត់ ហើយនិងសកម្មជនសិទ្ធិមនុស្សដទៃទៀតពីការដាក់ពន្ធនាគារដ៏អយុត្តិធម៌។
ចំណែកនាយករងប្រចាំតំបន់អាស៊ីនៃអង្គការឃ្លាំមើលសិទ្ធិមនុស្សអន្តរជាតិ លោក ហ្វីល រ៉ូប៊ើតសុន (Phil Robertson) បានលើកឡើងនៅក្នុងសេចក្ដីថ្លែងការណ៍របស់ខ្លួនថា ការផ្ដន្ទាទោសលើអ្នកនយោបាយប្រឆាំងនៅពេលនេះ គឺជាការព្យាយាមរារាំងការប្រកួតប្រជែងនៅក្នុងការបោះឆ្នោតតទល់ទៅនឹងការគ្រប់គ្រងអំណាចរបស់លោក ហ៊ុន សែន និងជាសញ្ញានៃការសម្លាប់ប្រជាធិបតេយ្យនៅកម្ពុជា។
លោក រ៉ូប៊ើតសុន អះអាងថា ការបង្កើតនូវបរិយាកាសនយោបាយមួយមានលក្ខណៈគំរាមកំហែង និងការធ្វើទុក្ខបុកម្នេញចំពោះអ្នកហ៊ានរិះគន់លើរដ្ឋាភិបាល មានន័យថា លោក ហ៊ុន សែន បានបង្ហាញកាន់តែច្បាស់ចំពោះការមិនយកចិត្តទុកដាក់គោរពសិទ្ធិនៅក្នុងសង្គមប្រជាធិបតេយ្យនោះឡើយ៕