កូដករក្រុមហ៊ុនណាហ្គាវើលដ៍ (Naga World) ជាង ១០០នាក់ នាំគ្នាយកញត្តិទៅដាក់នៅខុទ្ទកាល័យលោក ហ៊ុន សែន និងរដ្ឋសភា ដើម្បីសុំឱ្យជួយអន្តរាគមន៍ដោះស្រាយវិវាទការងារនៅក្រុមហ៊ុនណាហ្គាវើលដ៍ ក្រោយពីវិវាទនេះបានអូសបន្លាយជាង ១ឆ្នាំមកហើយ។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ បានលើកឡើងក្នុងអំឡុងពេលដាក់ញត្តិថា ទោះបីមានការជួបចរចារវាងតំណាងកូដករ សហជីព ជាមួយតំណាងក្រុមហ៊ុនបានចំនួន ១១ដងហើយក្ដី ប៉ុន្តែជាលទ្ធផល នៅតែមិនទទួលបានដំណោះស្រាយ។ ហេតុដូច្នេះហើយបានជាពួកគាត់ធ្វើញត្តិដាក់នៅខុទ្ទកាល័យនាយករដ្ឋមន្ត្រី និងរដ្ឋសភា។
កញ្ញា ឈឹម ស៊ីថរ អះអាងថា ញត្តិដែលពួកគាត់ដាក់នេះ ក្រុមកូដករស្នើសុំឱ្យលោក ហ៊ុន សែន និងរដ្ឋសភាជួយដោះស្រាយវិវាទការងារចំនួន ៣ចំណុច ក្នុងនោះ ជួយជំរុញទៅក្រុមហ៊ុនទទួលយកកូដករដែលនៅសេសសល់ប្រមាណ ២០០នាក់ឲ្យចូលធ្វើការវិញ និងទូទាត់សំណងឱ្យបានត្រឹមត្រូវតាមផ្លូវច្បាប់ រួមទាំងទម្លាក់ចោលបទចោទប្រកាន់លើថ្នាក់ដឹកនាំ និងសមាជិកសហជីពទាំង ១៥នាក់វិញ។
ក្រោយពីមានការជួបជុំ និងប្រមូលផ្ដុំនៅខុទ្ទកាល័យលោក ហ៊ុន សែន នោះ មន្ត្រីខុទ្ទកាល័យបានចេញមកទទួលយកញត្តិពីក្រុមកូដករ និងសហជីព។ បន្ទាប់ពីដាក់ញត្តិនៅខុទ្ទកាល័យលោក ហ៊ុន សែន រួចនោះ ក្រុមកូដករក៏បាននាំគ្នាដើរដោយថ្មើរជើងទៅដាក់ញត្តិនៅរដ្ឋសភាបន្តទៀត។
យ៉ាងណាក៏ដោយ ការដាក់ញត្តិរបស់ក្រុមកូដករនាព្រឹកថ្ងៃចន្ទ ទី២០ មិថុនា នេះ ក្រោមការតាមដាន ឬឃ្លាំមើល និងរារាំងពីសំណាក់សមត្ថកិច្ចទាំងស្លៀកពាក់ឯកសណ្ឋាន និងស៊ីវិលជាច្រើននាក់ផងដែរ។
ក្រៅពីការដាក់ញត្តិនោះ ជារៀងរាល់ថ្ងៃ ក្រុមកូដករតែងតែនាំគ្នាចេញធ្វើកូដកម្មដើម្បីទាមទារឱ្យក្រុមហ៊ុនល្បែងស៊ីសងដ៏ធំមួយនេះដោះស្រាយវិវាទការងារដល់ពួកគេ ទោះបីជាត្រូវប្រឈមនឹងការប្រើប្រាស់អំពីហិង្សា ការរុញច្រាន និងរារាំងពីសំណាក់ក្រុមសមត្ថកិច្ចក៏ដោយ។
កូដករក្រុមហ៊ុនណាហ្គាវើលដ៍ បាននាំគ្នាធ្វើកូដកម្មទាមទារលក្ខខណ្ឌការងារដោយកាលពីចុងឆ្នាំ២០២១ ការធ្វើកូដកម្មនេះក៏មានតំណាងសហជីព និងសមាជិក ១១រូបត្រូវសមត្ថកិច្ចចាប់ខ្លួនបញ្ជូនទៅឃុំនៅពន្ធនាគារព្រៃស។ ប៉ុន្តែក្រោយពីមានការសម្របសម្រួលនោះ ពួកគេត្រូវបានដោះលែងឱ្យនៅក្រៅឃុំបណ្ដោះអាសន្ន ខណៈបទចោទប្រកាន់ដែលតុលាការកម្ពុជាចោទទៅលើតំណាងសហជីព និងសមាជិក ១១រូប មិនទាន់ត្រូវបានទម្លាក់ចោលនៅឡើយ។
យ៉ាងណាក៏ដោយ ការធ្វើកូដកម្មរបស់ក្រុមកូដករ ធ្វើឡើងបន្ទាប់ពីក្រុមហ៊ុនណាហ្គាវើលដ៍បានបញ្ឈប់បុគ្គលិកចំនួន ១៣២៩នាក់ពីការងារ ដោយក្នុងនោះ បុគ្គលិកជាង ៨ពាន់នាក់ដែលថៅកែក្រុមហ៊ុនបញ្ឈប់នាពេលនោះ ក្រោមហេតុផលជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩។
នៅក្នុងឆ្នាំ២០១៩ ក្រុមហ៊ុនល្បែងស៊ីសងប្រចាំទីក្រុងភ្នំពេញមួយនេះ ក៏បានបង្ហាញរបាយការណ៍ប្រាក់ចំណេញរបស់ខ្លួនបន្ថែមទៀតថា ប្រាក់ចំណេញសរុបរបស់ក្រុមហ៊ុនបានកើនឡើងជិតដល់ ៣២១,២លានដុល្លារក្នុងរយៈពេល ៣ខែដំបូងក្នុងឆ្នាំ២០១៩ ដែលបានកើនឡើង ៣២% បើធៀបនឹងរយៈពេលដូចគ្នាកាលពីឆ្នាំ២០១៨៕