មេដឹកនាំបក្សកាន់អំណាច លោក ហ៊ុន សែន លើកឡើងថា ចាប់តាំងពីក្រោយថ្ងៃរំដោះ ៧ មករា ឆ្នាំ១៩៧៩ មក រដ្ឋាភិបាលកម្ពុជាដែលកំពុងដឹកនាំដោយបក្សកាន់អំណាចបានយកចិត្តទុកដាក់ខ្ពស់ក្នុងការអនុវត្តនូវគោលនយោបាយនានាដើម្បីលើកកម្ពស់សុខុមាលភាព និងជីវភាពរស់នៅរបស់អតីតយុទ្ធជនកម្ពុជាឱ្យបានល្អប្រសើរ។
ប្រមុខរដ្ឋាភិបាលកម្ពុជា លោក ហ៊ុន សែន បានចេញលិខិតក្នុងខួបលើកទី១៥ នៃទិវាអតីតយុទ្ធជនកម្ពុជា ថ្ងៃទី២១ ខែមិថុនា ឆ្នាំ២០២២ ដែលត្រូវបានផ្សព្វផ្សាយនៅថ្ងៃនេះថា សង្គ្រាមដែលបង្កឡើងដោយជនក្បត់ជាតិមួយក្តាប់តូចដែលបានឃុបឃិតជាមួយបរទេស បាននាំមកនូវវិនាសកម្មដល់សង្គមកម្ពុជាយ៉ាងធ្ងន់ធ្ងរ និងរបបប្រល័យពូជសាសន៍ ប៉ុល ពត ដែលបានបំផ្លិចបំផ្លាញសង្គមជាតិឱ្យខ្ទេចខ្ទីដល់ឫសគល់ ថែមទាំងបានបន្សល់ទុកនូវអតីតយុទ្ធជនពិការ និវត្តជន និងគ្រួសារពលីជាច្រើននាក់ថែមទៀត។
បុរសខ្លាំងកម្ពុជា លោក ហ៊ុន សែន អះអាងថា ការធ្វើពលិកម្មប្រកបដោយស្មារតីស្នេហាជាតិរបស់អតីតយុទ្ធជន និងពលរដ្ឋនៅគ្រប់ដំណាក់កាលនៃប្រវត្តិសាស្ត្រ គឺជាការរួមចំណែកយ៉ាងសំខាន់ក្នុងកិច្ចការការពារបូរណភាពទឹកដី ការកសាងសុខសន្តិភាព និងស្ថិរភាពសង្គមសម្រាប់កម្ពុជា ដើម្បីជាប្រយោជន៍សម្រាប់ប្រទេសជាតិ និងប្រជាជនកម្ពុជាទូទាំងប្រទេស។
អតីតទាហានខ្មែរក្រហមរូបនេះបញ្ជាក់ថា ការប្រារព្ធខួបលើកទី១៥ ទិវាអតីតយុទ្ធជនកម្ពុជា គឺធ្វើឡើងដើម្បីរំឭកនូវគំរូវីរភាពដ៏មោះមុត និងគុណបំណាច់ដ៏ធំធេងរបស់វីរអតីតយុទ្ធជនយុទ្ធនារីនៃកងកម្លាំងប្រដាប់អាវុធ និងពលរដ្ឋគ្រប់ស្រទាប់ដែលបានពលិកម្មយ៉ាងអង់អាចក្លាហាន ដោយការបូជាសាច់ស្រស់ ឈាមស្រស់ ដើម្បីបុព្វហេតុជាតិមាតុភូមិរបស់ខ្លួន។
របាយការណ៍របស់រដ្ឋាភិបាលកម្ពុជា បានឲ្យដឹងថា បច្ចុប្បន្ននេះ អតីតយុទ្ធជនកម្ពុជាមានចំនួនជាង ១សែន ៣ពាន់នាក់ ហើយសមាជិកគ្រួសារដែលស្ថិតនៅក្នុងបន្ទុករបស់អតីតយុទ្ធជនទាំងនោះមានចំនួនជាង ១សែន ៥ម៉ឺននាក់ផងដែរ ប៉ុន្តែអតីតយុទ្ធជន និងសមាជិកគ្រួសាររបស់ពួកគេស្ទើរតែទាំងអស់ត្រូវគេមើលឃើញថា មិនត្រូវបានធានាឱ្យទទួលបាននូវជីវភាពក្នុងការរស់នៅសមរម្យពីសំណាក់រដ្ឋាភិបាលកម្ពុជាឱ្យបានពេញលេញនោះទេ។
ប្រភពច្បាស់ការណ៍មួយធ្លាប់បានទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះថា រដ្ឋាភិបាលកម្ពុជាតែងប្រើប្រាស់ស្ថានភាពរបស់អតីតយុទ្ធជនកម្ពុជាដែលកំពុងជួបការលំបាកទាំងនោះ ដើម្បីកេងចំណេញនយោបាយរបស់ខ្លួន។
ការកេងចំណេញនោះរួមមាន ការប្រើប្រាស់រូបភាពនៃការយកចិត្តទុកដាក់គ្រប់បែបយ៉ាង ដូចជាការសង់លំនៅឋានជូនអតីតយុទ្ធជនដែលគ្មានផ្ទះសម្បែង និងការចុះចែកអំណោយផ្សេងៗដល់អតីតយុទ្ធជនទាំងនោះ ជាដើម។
ប្រភពដដែលបញ្ជាក់ថា ការសាងសង់លំនៅឋានជូនអតីតយុទ្ធជននៅតាមតំបន់ព្រំដែន និងតំបន់ដាច់ស្រយាល គ្រាន់តែជាផែនការរបស់រដ្ឋាភិបាលចង់ឱ្យពលរដ្ឋរស់នៅតាមតំបន់នោះប៉ុណ្ណោះ មិនជាការយកចិត្តទុកដាក់លើសុខុមាលភាពរបស់ពួកគេនោះទេ ព្រោះថាអំណោយដែលរដ្ឋាភិបាលបានផ្តល់ជូនសម្រាប់អ្នកដែលព្រមទៅរស់នៅតំបន់នោះ គ្មាននរណាព្រមទទួលយកនោះទេ ក្រៅតែពីអតីតយុទ្ធជនដែលគ្មានផ្ទះសម្បែង និងកំពុងជួបការលំបាកទាំងនោះ។
ជាងនេះទៀត ទីតាំងលំនៅឋានដែលអតីតយុទ្ធជនទាំងនោះរស់នៅក៏គ្មានការរៀបចំទឹក ឬភ្លើងឱ្យបានត្រឹមត្រូវ ដើម្បីសម្រួលដល់ជីវភាពរស់នៅរបស់ពួកគាត់ដែរ គឺមានតែសម្បកផ្ទះដែលសាងសង់ក្នុងតម្លៃថោកៗប៉ុណ្ណោះ ហើយដីធ្លីរបស់អតីតយុទ្ធជនទាំងនោះនឹងធ្លាក់ទៅលើមេទាហានដែលប្រចាំការនៅតំបន់នោះវិញទាំងអស់ ដោយការប្រមូលទិញក្នុងតម្លៃថោកៗខ្លះ និងរឹបអូសយកខ្លះនៅពេលដែលអតីតយុទ្ធជនទាំងនោះមិនអាចតស៊ូរស់នៅក្នុងតំបន់នោះបាន។
ក្រុមអ្នកសង្កេតការណ៍លើកឡើងថា អតីតយុទ្ធជនពិការ និវត្តជន និងគ្រួសារពលីជាច្រើននាក់មិនមែនរងគ្រោះដោយសារតែសង្គ្រាមតែម្យ៉ាងនោះទេ ប៉ុន្តែក៏មានអតីតយុទ្ធជនកម្ពុជាជាច្រើនដែលបានរងគ្រោះពីការដឹកនាំរបស់លោក ហ៊ុន សែន ដែលបានកេណ្ឌពួកគេឱ្យចូលរួមផែនការ «ក៥» របស់វៀតណាម ក្នុងអំឡុងទសវត្សឆ្នាំ១៩៨០ ដែរ ក្នុងនោះ យុទ្ធជនខ្មែរដែលបានស្លាប់នៅក្នុងផែនការ «ក៥» នេះ មានចំនួនមិនតិចជាង ១០ម៉ឺននាក់ដែរ។ នេះនៅមិនទាន់គិតដល់អ្នកដែលបានរួចផុតជីវិតត្រឡប់មកស្រុកកំណើតវិញទាំងធ្លាក់ខ្លួនទៅជាជនពិកាផងនោះ៕