 ទាមទារឱ្យតុលាការទម្លាក់ចោលបទចោទប្រកាន់លើអតីត និងអ្នកការពារសិទ្ធិមនុស្សអាដហុក ៥រូប។ អង្គការនេះចាត់ទុកថា ការដាក់ទោសលើអ្នកទាំង ៥រូបនេះជាការបំភិតបំភ័យដល់សង្គមស៊ីវិលផ្សេងទៀតនៅកម្ពុជា ដែលហ៊ានរិះគន់រដ្ឋាភិបាលដឹកនាំដោយលោក ហ៊ុន សែន។){kind=link}
អង្គការឃ្លាំមើលសិទ្ធិមនុស្សអន្តរជាតិ (Human Rights Watch) ទាមទារឱ្យតុលាការទម្លាក់ចោលបទចោទប្រកាន់លើអតីត និងអ្នកការពារសិទ្ធិមនុស្សអាដហុក ៥រូប។ អង្គការនេះចាត់ទុកថា ការដាក់ទោសលើអ្នកទាំង ៥រូបនេះជាការបំភិតបំភ័យដល់សង្គមស៊ីវិលផ្សេងទៀតនៅកម្ពុជា ដែលហ៊ានរិះគន់រដ្ឋាភិបាលដឹកនាំដោយលោក ហ៊ុន សែន។
នាយករងអាស៊ីនៃអង្គការឃ្លាំមើលសិទ្ធិមនុស្សអន្តរជាតិ លោក Phil Robertson បានអះអាងនៅក្នុងសេចក្ដីថ្លែងការណ៍របស់អង្គការនេះ ដែលបានចេញផ្សាយជាសាធារណៈនៅថ្ងៃទី២២ ខែមិថុនា ឆ្នាំ២០២២ ថា អាជ្ញាធរកម្ពុជាគួរតែលុបចោលចំពោះការផ្ដន្ទាទោសលើអតីតអ្នកការពារសិទ្ធិមនុស្សអាដហុក ៤នាក់ និងជាអតីតមន្ត្រី គ.ជ.ប លោក នី ចរិយា វិញ ហើយបញ្ចប់ការគាបសង្កត់លើអ្នកការពារសិទ្ធិមនុស្សទាំងអស់។
លោក Phil Robertson លើកឡើងថា ការដាក់ទោសទណ្ឌកម្មទាំងអយុត្តិធម៌លើពួកគេទាំង ៥រូប បង្ហាញពីការបំភិតបំភ័យ និងគំរាមកំហែងលើសកម្មជនសង្គមស៊ីវិលនៅកម្ពុជាដែលហ៊ានរិះគន់រដ្ឋាភិបាលរបស់លោក ហ៊ុន សែន។
ការលើកឡើងរបស់នាយករងអាស៊ីនៃអង្គការឃ្លាំមើលសិទ្ធិមនុស្សអន្តរជាតិ លោក Phil Robertson បានធ្វើឡើងបន្ទាប់ពីមេធាវីការពារក្ដីឱ្យមន្ត្រី និងអតីតមន្ត្រីសិទ្ធិមនុស្សសមាគមអាដហុកទាំង ៥រូប បានប្ដឹងសាទុក្ខទៅតុលាការកំពូល ដោយមិនសុខចិត្តចំពោះការសម្រេចរបស់សាលាឧទ្ធរណ៍កាលពីថ្ងៃទី២៣ ខែឧសភា ឆ្នាំ២០២២ ដែលបានសម្រេចតម្កល់សាលក្រមសាលាដំបូងរាជធានីភ្នំពេញទុកជាបានការដដែល។
កាលពីខែកញ្ញា ឆ្នាំ២០១៨ បុគ្គលិក និងអតីតបុគ្គលិកសមាគមការពារសិទ្ធិមនុស្សអាដហុក ៥រូប ត្រូវបានសាលាដំបូងរាជធានីភ្នំពេញកាត់ទោសឱ្យជាប់ពន្ធនាគារម្នាក់ៗចំនួន ៥ឆ្នាំក្រោមបទចោទប្រកាន់ «សូកប៉ាន់សាក្សី និងសមគំនិតសូកប៉ាន់សាក្សី» ប៉ុន្តែទោស ៥ឆ្នាំនេះ តុលាការសម្រេចឱ្យអនុវត្តទោសក្នុងពន្ធនាគាររយៈពេល ១៤ខែ ហើយទោសដែលនៅសល់ត្រូវព្យួរ។
បុគ្គលិក និងអតីតបុគ្គលិកសមាគមការពារសិទ្ធិមនុស្សអាដហុក ៥រូបនេះរួមមាន លោក នី សុខា លោក យី សុខសាន្ត អ្នកស្រី លឹម មុនី្ន លោក ណៃ វ៉ង់ដា និងលោក នី ចរិយា។
អង្គការឃ្លាំមើលសិទ្ធិមនុស្សអន្តរជាតិ (Human Rights Watch) បានចងក្រងឯកសារអំពីស្ថានភាពអ្នកទោសនយោបាយបច្ចុប្បន្នជាង ៥០នាក់នៅកម្ពុជា រួមទាំងអ្នកដែលកំពុងឃុំខ្លួនបណ្ដោះអាសន្ន និងអ្នកដែលជាប់ពន្ធនាគារបន្ទាប់ពីការកាត់ទោសដោយហេតុផលនយោបាយ។ ពួកគេរួមមានសមាជិកបក្សប្រឆាំង អ្នកការពារសិទ្ធិមនុស្ស សកម្មជនដីធ្លី និងបរិស្ថាន និងអ្នកសារព័ត៌មាន៕