សមាជិកបក្សភ្លើងទៀន ២នាក់ត្រូវបានស្ថាប័នដែលខ្លួនកំពុងបម្រើការងារបច្ចុប្បន្នបណ្តេញចេញពីក្របខ័ណ្ឌរដ្ឋ បន្ទាប់ពីអ្នកទាំងនោះបានចូលរួមសកម្មភាពនយោបាយជាមួយគណបក្សភ្លើងទៀនដែលបានចូលរួមការបោះឆ្នោតកាលពីពេលថ្មីៗ។
បេក្ខជនជាប់ឆ្នោតជាចៅសង្កាត់រងទី២ សង្កាត់ច្បារអំពៅទី១ រាជធានីភ្នំពេញ លោក កែវ សុមុនី ត្រូវបានរដ្ឋមន្ត្រីក្រសួងសុខាភិបាល លោក ម៉ម ប៊ុនហេង ចេញសេចក្តីប្រកាសលុបឈ្មោះចេញពីក្រសួងសុខាភិបាលកម្ពុជា កាលពីថ្ងៃទី២១ ខែមិថុនា ឆ្នាំ២០២២ នេះ ដោយមិនបានបញ្ជាក់ពីមូលហេតុនៃការលុបឈ្មោះនេះទេ។
លោក កែវ សុមុនី បានប្រាប់ក្រុមអ្នកសារព័ត៌មានថា ក្រសួងបានលុបឈ្មោះរបស់លោកចេញពីក្របខ័ណ្ឌភ្លាមៗ ដោយមិនបានហៅទៅណែនាំ និងបង្ហាញពីវិន័យដែលលោកធ្វើខុសនោះឱ្យបានច្បាស់លាស់ឡើយ។ ករណីនេះ លោកស្នើឱ្យក្រសួងសុខាភិបាលបង្ហាញហេតុផល និងពិនិត្យចំពោះការសម្រេចលុបឈ្មោះលោកឡើងវិញ។
ដោយឡែកប្រធានក្រុមការងារបណ្ដោះអាសន្នគណបក្សភ្លើងទៀនខេត្តត្បូងឃ្មុំ លោក អេង ស្រូយ ក៏ត្រូវរដ្ឋមន្ត្រីក្រសួងមហាផ្ទៃ លោក ស ខេង ចេញសេចក្តីប្រកាសកាលពីថ្ងៃទី១៦ ខែមិថុនា ឆ្នាំ២០២២ នេះ ដើម្បីបណ្តេញចេញពីគ្រូនគរបាលជាតិផងដែរ ក្រោមមូលហេតុថា លោក អេង ស្រូយ បានបោះបង់ការងាររបស់ខ្លួន។
ការបណ្តេញសមាជិកគណបក្សភ្លើងទៀន និងការចោទប្តឹង ព្រមទាំងការចាប់ខ្លួនជាបន្តបន្ទាប់មកនេះ គឺធ្វើឡើងបន្ទាប់ពីអ្នកទាំងនោះបានចូលរួមសកម្មភាពនយោបាយជាមួយគណបក្សភ្លើងទៀន ដែលបានចូលរួមការបោះឆ្នោតកាលពីពេលថ្មីៗនេះ។
ក្រោយការចូលរួមការបោះឆ្នោតកាលពីថ្ងៃទី៥ ខែមិថុនា ឆ្នាំ២០២២ កន្លងទៅ សមាជិកគណបក្សភ្លើងទៀន និងមន្ត្រីជាន់ខ្ពស់បក្សនេះត្រូវរងនូវការធ្វើទុក្ខបុកម្នេញពីរដ្ឋាភិបាលកម្ពុជាជាបន្តបន្ទាប់ ក្នុងនោះមានអ្នកខ្លះរងនូវពាក្យបណ្តឹង អ្នកខ្លះរងនូវការចាប់ខ្លួន និងអ្នកខ្លះទៀតរងនូវការបណ្តេញពីតួនាទីក្នុងក្របខ័ណ្ឌរដ្ឋដូចពេលនេះជាដើម។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី២២ មិថុនា នេះថា ក្នុងករណីនៃការលុបឈ្មោះមន្ត្រីរាជការពីក្របខ័ណ្ឌរដ្ឋដែលមាននិន្នាការនយោបាយផ្សេងពីបក្សកាន់អំណាច ដោយមិនមានមូលហេតុសមស្រប ឬបង្ហាញពីកំហុសរបស់អ្នកទាំងនោះច្បាស់លាស់ គឺជាការបង្ហាញពីការរើសអើងនិន្នាការនយោបាយប៉ុណ្ណោះ។
លោក ស៊ឹង សែនករុណា លើកឡើងថា ការធ្វើបែបនេះក៏ជាការបង្កនូវការមិនពេញចិត្តទៅដល់មន្ត្រីរាជការផ្សេងទៀតដែលគាំទ្រគណបក្សដទៃផងដែរ ដែលគេអាចមើលឃើញថា ចំណាត់ការនេះអនុវត្តតែទៅលើអ្នកដែលមិនគាំទ្របក្សកាន់អំណាច ចំណែកអ្នកដែលមាននិន្នាការស្របនឹងខ្លួន បែរជាអាចធ្វើអ្វីៗបានដោយសេរី រហូតមានមន្ត្រីរាជការខ្លះទៀតយកម៉ោងការងាររដ្ឋទៅធ្វើការបក្សថែមទៀត។
មន្ត្រីសង្គមស៊ីវិលរូបនេះអំពាវនាវឲ្យរដ្ឋាភិបាលកម្ពុជាពិនិត្យឡើងវិញនូវការអនុវត្តច្បាប់របស់ខ្លួន ដើម្បីធានានូវការគោរពសិទ្ធិពលរដ្ឋជាមូលដ្ឋានដែលបានចែងក្នុងរដ្ឋធម្មនុញ្ញស្តីអំពីសិទ្ធិចូលរួមក្នុងនយោបាយ ស្របតាមសង្គមដែលប្រកាន់យករបបលទ្ធិប្រជាធិបតេយ្យ សេរីពហុបក្ស និងដើម្បីធានានូវការមិនរើសអើងនិន្នាការនយោបាយរបស់គណបក្សដែលកំពុងដឹកនាំរដ្ឋាភិបាលសព្វថ្ងៃនេះ។
មាត្រា៣៥ នៃរដ្ឋធម្មនុញ្ញចែងថា ពលរដ្ឋខ្មែរមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ ហើយសេចក្តីស្នើទាំងឡាយរបស់ពលរដ្ឋត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋផងដែរ។
ជុំវិញការបណ្តេញសមាជិកគណបក្សភ្លើងទៀនចេញពីតួនាទីក្នុងក្របខ័ណ្ឌរដ្ឋនេះ សារព័ត៌មាន The Cambodia Daily នៅមិនទាន់អាចទាក់ទងមន្ត្រីជាន់ខ្ពស់គណបក្សនេះ ដើម្បីសុំការបកស្រាយជុំវិញករណីនេះបាននៅឡើយទេរហូតមកទល់នឹងម៉ោងផ្សាយនេះ៕