សហភាពសហជីពកម្ពុជា ទាមទារឱ្យរដ្ឋាភិបាលដាក់ចេញនូវវិធានការបញ្ចុះពន្ធលើការនាំចូលប្រេងឥន្ធនៈ និងបញ្ចេញថវិកាជាតិដើម្បីធានានូវតម្លៃប្រេងឥន្ធនៈឱ្យស្ថិតក្នុងតម្លៃមួយសមរម្យ ពីព្រោះពលរដ្ឋខ្មែរក្រីក្រជាច្រើនលាននាក់បានរងនូវផលប៉ះពាល់យ៉ាងធ្ងន់ធ្ងរទៅដល់សេដ្ឋកិច្ចគ្រួសារ។
សហភាពសហជីពកម្ពុជា បានចេញសេចក្តីថ្លែងការណ៍កាលពីថ្ងៃទី២២ ខែមិថុនា ឆ្នាំ២០២២ ថា រដ្ឋាភិបាលកម្ពុជាមិនបានខ្វល់ខ្វាយពីការហក់ឡើងនៃតម្លៃប្រេងឥន្ធនៈដែលកំពុងតែញាំញីសេដ្ឋកិច្ចពលរដ្ឋខ្មែរនៅពេលនេះទេ ខណៈអ្នកដែលមានប្រាក់ចំណូលទាប និងមធ្យម ត្រូវរងនូវផលប៉ះពាល់យ៉ាងធ្ងន់ធ្ងរចំពោះជីវភាពប្រចាំថ្ងៃរបស់ពួកគេ។
ប្រភពដដែលអះអាងថា តម្លៃប្រេងឥន្ធនៈដែលកំពុងហក់ឡើងខ្ពស់ហួសហេតុសព្វថ្ងៃនេះជាមូលហេតុដ៏ចម្បងដែលនាំឱ្យតម្លៃទំនិញនៅលើទីផ្សារហក់ឡើងខ្ពស់ បណ្តាលឲ្យពលរដ្ឋខ្មែរក្រីក្រជាច្រើនលាននាក់ធ្លាក់ចូលក្នុងវិបត្តិសេដ្ឋកិច្ចគ្រួសារធ្ងន់ធ្ងរ ខណៈតម្លៃប្រេងឥន្ធនៈនៅពេលនេះមិនសមាមាត្រនឹងចំណូលរបស់ពួកគេដែលទទួលបានក្នុងពេលបច្ចុប្បន្ននេះទេ។
សហភាពសហជីពកម្ពុជា បញ្ជាក់ថា មន្ត្រីរាជការ អាជីវករ កម្មករ អ្នកលក់ដូរមិនរៀបរយ និងកសិករ ជាដើម សុទ្ធសឹងតែជាអ្នកដែលទទួលរងនូវផលប៉ះពាល់ពីការហក់ឡើងនៃតម្លៃប្រេងឥន្ធនៈ ដូច្នេះរដ្ឋាភិបាលគួរតែយកបញ្ហានេះមកគិតពិចារណាដើម្បីរកដំណោះស្រាយបន្ទាន់ជូនពួកគេឱ្យបានទាន់ពេលវេលា។
ការអះអាងនេះ ធ្វើឡើងស្របពេលដែលតម្លៃប្រេងឥន្ធនៈនៅកម្ពុជាសព្វថ្ងៃនេះកំពុងស្ទុះឡើងខ្ពស់ ខណៈរដ្ឋាភិបាលកម្ពុជាមិនមានវិធានការណាមួយដើម្បីទប់ស្កាត់បញ្ហានេះឡើយ។
កាលថ្ងៃទី២១ ខែមិថុនា ឆ្នាំ២០២២ ក្រសួងពាណិជ្ជកម្ម បានចេញសេចក្តីជូនដំណឹងស្ដីពីតម្លៃប្រេងឥន្ធនៈនៅតាមស្ថានីយថា ផ្អែកតាមតម្លៃមធ្យមប្រេងឥន្ធនៈលើទីផ្សារអន្តរជាតិ កម្ពុជាបានកំណត់តម្លៃប្រេងឥន្ធនៈចាប់ពីថ្ងៃទី២១ ដល់ថ្ងៃទី៣០ ខែមិថុនា ឆ្នាំ២០២២ ក្នុងតម្លៃ ៦០៦៤រៀលក្នុងមួយលីត្រសម្រាប់សាំងធម្មតា និងប្រេងម៉ាស៊ូតមានតម្លៃ ៦៥៦៤រៀលក្នុងមួយលីត្រ។
ក្រសួងបញ្ជាក់ថា ដើម្បីជួយសម្រួលដល់ជីវភាពរបស់ពលរដ្ឋ និងដោយមានការចូលរួមចំណែកពីក្រុមហ៊ុនចែកចាយប្រេងឥន្ធនៈផង ប្រមុខរដ្ឋាភិបាលកម្ពុជា លោក ហ៊ុន សែន បានសម្រេចបញ្ចុះតម្លៃលក់រាយប្រេងឥន្ធនៈនៅកម្ពុជា ចំនួន ៦,៥សេនដុល្លារក្នុងមួយលីត្រ ដូច្នេះប្រេងឥន្ធនៈនៅកម្ពុជាលក់ត្រឹមតែក្នុងតម្លៃ ៥៨០០រៀលក្នុងមួយលីត្រសម្រាប់សាំងធម្មតា និងប្រេងម៉ាស៊ូតតម្លៃ ៦៣០០រៀលក្នុងមួយលីត្រផងដែរ។
កាលពីពាក់កណ្តាលខែមីនា ឆ្នាំ២០២២ លោក ហ៊ុន សែន ធ្លាប់បានលើកឡើងថា សូមប្រជាពលរដ្ឋកុំបន្ទោសលោកអំពីរឿងសាំងឡើងថ្លៃអី ពីព្រោះបញ្ហាសាំងឡើងថ្លៃនេះជាបញ្ហាសកលបណ្ដាលមកពីសង្គ្រាមរវាងរុស្ស៊ី និងអ៊ុយក្រែនប៉ុណ្ណោះ។
ប្រធានវេទិកាពលរដ្ឋ លោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី២៤ មិថុនា ថា នៅអឺរ៉ុបក៏មានការដំឡើងថ្លៃប្រេងឥន្ធនៈដែរ ប៉ុន្តែពួកគេដំឡើងតាមតម្លៃទីផ្សារសកល ហើយរដ្ឋាភិបាលសហគមន៍អឺរ៉ុបក៏បានត្រៀមខ្លួនរួចជាស្រេចក្នុងការទប់ស្កាត់ចរន្តឡើងថ្លៃប្រេងឥន្ធនៈរបស់ទីផ្សារពិភពលោកនេះ ដោយការសហការជាមួយក្រុមហ៊ុនប្រេងឲ្យកាត់បន្ថយប្រាក់ចំណេញរបស់ពួកគេ។ ជាងនេះទៀត រដ្ឋាភិបាលសហភាពអឺរ៉ុប ក៏បានកាត់បន្ថយពន្ធនាំចូល និងបញ្ចេញប្រេងបម្រុងពីក្នុងឃ្លាំងរបស់រដ្ឋ ព្រមទាំងបញ្ចេញថវិកាជាតិដើម្បីទប់ស្កាត់បញ្ហានេះថែមទៀត។
លោក គឹម សុខ រិះគន់ថា នៅកម្ពុជា បើរដ្ឋាភិបាលត្រៀមខ្លួនដើម្បីជួយពលរដ្ឋមែននោះ បើទោះបីជាតម្លៃប្រេងឥន្ធនៈរបស់ពិភពលោកឡើងថ្លៃ ក៏ប្រេងគ្រប់ប្រភេទនៅកម្ពុជាមិនអាចឡើងថ្លៃហួសពី ៥១០០រៀលក្នុង ១លីត្រដែរ។ លោកបន្តថា រដ្ឋាភិបាលលោក ហ៊ុន សែន មិនបានបម្រុងទាំងប្រេងក្នុងស្តុករបស់រដ្ឋ ដើម្បីត្រៀមជួយពលរដ្ឋនោះទេ ហើយក៏គ្មានទាំងថវិកាជាតិបម្រុងជួយពលរដ្ឋដើម្បីទប់ស្កាត់បញ្ហានេះដែរ ខណៈការទម្លាក់តម្លៃពន្ធគ្រាន់តែមាននៅលើក្រដាសប៉ុណ្ណោះ។
លោក គឹម សុខ អះអាងថា រដ្ឋាភិបាលលោក ហ៊ុន សែន បានដើរតួដូចគ្នានឹងឈ្មួញទុច្ចរិតដែរ គឺពេលមានព្រឹត្តិការណ៍អាសន្នមិនជួយពលរដ្ឋរបស់ខ្លួននោះទេ តែបែរជានាំគ្នាប្រើគ្រាអាសន្ននេះកេងប្រវ័ញ្ចលើពលរដ្ឋទៅវិញ។
ការលក់ប្រេងឥន្ធនៈតាមស្ថានីយទូទាំងប្រទេសនៅកម្ពុជាសព្វថ្ងៃនេះ ត្រូវបានបែងចែកទៅជា ៣កម្រិតផ្សេងគ្នា គឺកម្រិតសាំងល្អ ឬ Supper កម្រិតសាំងធម្មតា ឬ Regular និងប្រេងម៉ាស៊ូត ឬ Diesel ក្នុងនោះតម្លៃសាំងល្អត្រូវលក់ក្នុងតម្លៃ ៦៤០០រៀលក្នុងមួយលីត្រ ចំណែកសាំងធម្មតាត្រូវលក់ក្នុងតម្លៃ ៥៨០០រៀលក្នុងមួយលីត្រ និងប្រេងម៉ាស៊ូតលក់ក្នុងតម្លៃ ៦៣០០រៀលក្នុងមួយលីត្រផងដែរ៕