ក្រុមមេដឹកនាំនៃប្រទេសឧស្សាហកម្មជឿនលឿនទាំង៧ ហៅកាត់ថា G-7 កាលពីថ្ងៃអាទិត្យ ទី២៦ មិថុនា បានសន្យាបញ្ចេញកញ្ចប់ថវិកាឱ្យបាន ៦០០ពាន់លានដុល្លារ ដើម្បីជួយផ្ដល់ទៅឱ្យប្រទេសកំពុងអភិវឌ្ឍក្នុងទម្រង់ជាប្រាក់កម្ចីផង និងប្រាក់ជំនួយផង។
សេចក្ដីសម្រេចដែលមាននៅលើសេចក្ដីថ្លែងការណ៍រួមកម្រាស់ ៦ទំព័រ ធ្វើឡើងនៅក្នុងកិច្ចប្រជុំកំពូលប្រចាំឆ្នាំដែលរៀបចំឡើងនៅរដ្ឋ Bavaria នៅភាគខាងត្បូងប្រទេសអាល្លឺម៉ង់។
ក្នុងជំនួបរបស់មេដឹកនាំនៃក្រុមប្រទេស G-7 មកជួបគ្នាផ្ទាល់ហើយ រួមនឹងមេដឹកនាំសហភាពអឺរ៉ុប ផងដែរ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី២៧ ខែមិថុនា នេះ។
គម្រោងនេះជាផ្នែកមួយនៃទម្រង់ជាមូលនិធិឯកជន និងមូលនិធិសាធារណៈក្នុងរយៈពេល ៥ឆ្នាំ ដើម្បីយកទៅគាំទ្រដល់គម្រោងហេដ្ឋារចនាសម្ព័ន្ធដែលត្រូវការជួយជាចាំបាច់ដល់បណ្ដាប្រទេសកំពុងអភិវឌ្ឍទាំងនោះ។
ប៉ុន្តែអ្នកសង្កេតការណ៍មើលឃើញថា គម្រោងដែលមានឈ្មោះថា «ភាពជាដៃគូសម្រាប់ការវិនិយោគ និងហេដ្ឋារចនាសម្ព័ន្ធពិភពលោក» គឺសំដៅទប់ទល់ជាមួយគម្រោងគំនិតផ្ដួចផ្ដើមខ្សែក្រវាត់ និងផ្លូវរបស់ប្រទេសចិន ដែលចិនបញ្ចេញសាច់ប្រាក់រាប់ពាន់លានដុល្លារទៅឱ្យប្រទេសជាច្រើនក្នុងគម្រោងប្រាក់កម្ចី។
ក្នុងសេចក្ដីថ្លែងការណ៍នេះ ប្រធានាធិបតីសហរដ្ឋអាមេរិក លោក ចូ បៃដិន បានប្រកាសថា អាមេរិកនឹងបញ្ចេញថវិកាចំនួន ២០០ពាន់លានដុល្លារ ក្នុងនោះមានកញ្ចប់ជំនួយឥតសំណង មូលនិធិសហព័ន្ធ និងការវិនិយោគឯកជនសម្រាប់រយៈពេល ៥ឆ្នាំ ដើម្បីគាំទ្រដល់គម្រោងផ្សេងៗនៅតាមប្រទេសមានប្រាក់ចំណូលទាប និងមធ្យម ដែលជួយដោះស្រាយបញ្ហានៃការប្រែប្រួលអាកាសធាតុ ក៏ដូចជាលើកកម្ពស់សុខាភិបាលអន្តរជាតិ សមភាពយេនឌ័រ និងហេដ្ឋារចនាសម្ព័ន្ធផ្សេងៗ។
លោក ចូ បៃដិន បានលើកឡើងទៀតថា តាមរយៈគម្រោងវិនិយោគថ្មីនេះ ប្រទេសកំពុងអភិវឌ្ឍនឹងអាចមើលឃើញដោយខ្លួនឯងអំពីផលប្រយោជន៍ដែលទទួលបានពីការចាប់ដៃគូជាមួយនឹងប្រទេសប្រជាធិបតេយ្យ។
ចំណែកប្រធានគណៈកម្មការអឺរ៉ុប អ្នកស្រី Ursula von der Leyen បានថ្លែងក្នុងកិច្ចប្រជុំថា អឺរ៉ុបនឹងបញ្ចេញថវិកា ៣០០ពាន់លានអឺរ៉ូ ស្មើនឹង ៣១៦ពាន់លានដុល្លារអាមេរិកសម្រាប់រយៈពេល ៥ឆ្នាំដោយសំដៅបង្កើតនូវនិរន្តរភាពសម្រាប់គាំទ្រដល់បណ្តាប្រទេសកំពុងអភិវឌ្ឍទាំងនោះ។
ប្រធានគណៈកម្មការនេះបញ្ជាក់បន្ថែមថា គោលដៅនៃគម្រោងវិនិយោគនេះ គឺចង់បង្ហាញឲ្យប្រទេសកំពុងអភិវឌ្ឍឃើញថា ពួកគេមិនមែនមានជម្រើសតែមួយនោះទេ ក៏ប៉ុន្តែអាចមានជម្រើសច្រើននៅក្នុងការចាប់ដៃគូវិនិយោគទៅលើហេដ្ឋារចនាសម្ព័ន្ធក្នុងប្រទេសរបស់ពួកគេ។ នៅក្នុងសហភាពអឺរ៉ុបនេះ គឺអាល្លឺម៉ង់ និងបារាំង ក៏ជាសមាជិកក្រុម G-7 ដែរ។
ជាមួយគ្នានេះ មេដឹកនាំប្រទេសអង់គ្លេស អ៊ីតាលី កាណាដា និងជប៉ុន ក៏បានលើកឡើងពីផែនការរៀងៗខ្លួនរបស់ពួកគាត់នូវកញ្ចប់ថវិកាក្នុងគម្រោង «ភាពជាដៃគូសម្រាប់ការវិនិយោគ និងហេដ្ឋារចនាសម្ព័ន្ធពិភពលោក»។
ដោយបុព្វហេតុនេះ ក្រុមប្រទេស G-7 បានសម្រេចថាកញ្ចប់ថវិកា ៦០០ពាន់លានដុល្លារ គឺជាអាទិភាពសម្រាប់ការវិនិយោគ និងហេដ្ឋារចនាសម្ព័ន្ធពិភពលោក។ ប្រទេស G-7 មានសហរដ្ឋអាមេរិក អង់គ្លេស បារាំង អាល្លឺម៉ង់ កាណាដា អ៊ីតាលី និងជប៉ុន។
យ៉ាងណា ចំពោះគម្រោងគំនិតផ្ដួចផ្ដើមខ្សែក្រវាត់ និងផ្លូវរបស់ប្រទេសចិន មកទល់ពេលនេះកំពុងមាននៅបណ្ដាប្រទេសជាង ១០០ ដែលជាផ្នែកមួយដើម្បីវិនិយោគទៅលើហេដ្ឋារចនាសម្ព័ន្ធនៃប្រទេសនេះ។
តែបើតាមសេចក្ដីថ្លែងការណ៍របស់ក្រុមមេដឹកនាំ G-7 គឺខុសពីគម្រោងផ្លូវមួយខ្សែក្រវាត់មួយដែលទុនវិនិយោគមានប្រភពពីរដ្ឋ និងស្ថាប័នហិរញ្ញវត្ថុរបស់រដ្ឋចិន។
គម្រោងវិនិយោគរបស់ក្រុមប្រទេស G-7 មានប្រភពហិរញ្ញវត្ថុពីក្រុមហ៊ុនឯកជន គឺមានន័យថា ទុនវិនិយោគអាចនឹងពិបាកទទួលបានជាងគម្រោងរបស់ចិន។
តែអ្នកសង្កេតការណ៍ និងអ្នកជំនាញសេដ្ឋកិច្ច យល់ថា ការផ្តល់ទុនវិនិយោគដោយមានការតាមដានច្បាស់លាស់ គឺត្រូវតែមានតម្លាភាព និងអាចជួយកុំឱ្យប្រទេសត្រូវទាញទម្លាក់ក្នុងអន្ទាក់បំណុល ព្រោះប្រទេសជាច្រើនដែលខ្ចីបុលចិនពាន់លានដុល្លារ កំពុងជួបវិបត្តិទៅហើយនោះ មានដូចជាប្រទេសស្រីលង្កា ប៉ាគីស្ថាន ជាដើម ហើយទីបំផុត ចិនរឹបអូសសំណង់ទាំងនោះយកមកក្នុងភាគហ៊ុនរបស់ចិន ក្នុងកិច្ចសន្យា ៩០ឆ្នាំ ដោយសារប្រទេសនោះសងបំណុលចិនមិនទាន់ពេលវេលា ហើយការប្រាក់គរឡើងដូចភ្នំ។
ប្រទេសជីបូទី នៅក្នុងទ្វីបអាហ្វ្រិក ដែលមិនអាចបង្វិលការប្រាក់ និងសាច់ប្រាក់សងចិនមិនទាន់ពេលវេលា គឺប្រទេសនេះបានជួលដីឱ្យចិនស្ថាបនាមូលដ្ឋានទ័ពរបស់ចិន ដែលមានមកដល់ទល់សព្វថ្ងៃនេះ៕