32 C
Phnom Penh

ប្រេសិត​ពិសេស​របស់​ប្រធាន​អាស៊ាន​ទៅ​បំពេញ​ទស្សនកិច្ច​លើក​ទី​២​នៅ​ភូមា

ដោយ ឌឹ ខេមបូឌា ដេលី

បទវិភាគ

ប្រេសិត​ពិសេស​របស់​ប្រធាន​អាស៊ាន​ស្ដីពី​មីយ៉ាន់ម៉ា បាន​ដឹកនាំ​គណៈប្រតិភូ​ជាន់ខ្ពស់​របស់​ខ្លួន​ទៅ​បំពេញ​ទស្សនកិច្ច​ជា​លើក​ទី​២ នៅ​ប្រទេស​ភូមា រយៈពេល ៥​ថ្ងៃ នៅ​ថ្ងៃ​ពុធ សប្តាហ៍​នេះ ដើម្បី​តាមដាន​ការ​វិវឌ្ឍ​នៃ​ការ​អនុវត្ត​កិច្ចព្រមព្រៀង​ឯកច្ឆន្ទ ៥​ចំណុច​របស់​អាស៊ាន។

រដ្ឋមន្ត្រី​ការបរទេស និង​សហប្រតិបត្តិការ​អន្តរជាតិ លោក ប្រាក់ សុខុន បាន​ចេញ​សេចក្តី​ប្រកាស​ព័ត៌មាន​កាលពី​ថ្ងៃទី​២៨ ខែ​មិថុនា ឆ្នាំ​២០២២ នេះ​ថា ក្នុង​នាម​ប្រេសិត​ពិសេស​របស់​ប្រធាន​អាស៊ាន​ស្ដីពី​មីយ៉ាន់ម៉ា នឹង​ធ្វើ​ទស្សនកិច្ច​នៅ​ប្រទេស​ភូមា រយៈពេល ៥​ថ្ងៃ​ជា​លើក​ទី​២ ចាប់ពី​ទី​២៩ ខែ​មិថុនា រហូត​ដល់​ថ្ងៃទី​៣ ខែ​កក្កដា ឆ្នាំ​២០២២ នេះ ដែល​មាន​ការ​ចូលរួម​ដំណើរ​ពី​អគ្គលេខាធិការ​រង​អាស៊ាន លោក ឯកផាប់ ផាន់ថាវង់ និង​បុគ្គលិក​របស់​លេខាធិការដ្ឋាន​អាស៊ាន​ជាច្រើន​រូប​ទៀត។

ប្រេសិត​ពិសេស​របស់​ប្រធាន​អាស៊ាន លោក ប្រាក់ សុខុន បាន​លើកឡើង​ថា ដំណើរ​ទស្សនកិច្ច​លើក​ទី​២ ទៅ​កាន់​ប្រទេស​ភូមា នេះ មាន​គោល​បំណង​តាមដាន​ពី​ការ​អនុវត្ត​នូវ​គោលការណ៍​ទាំង ៥​ចំណុច​របស់​អាស៊ាន និង​លទ្ធផល​នៃ​កិច្ចប្រជុំ​ពិគ្រោះ​យោបល់​ស្ដីពី​ជំនួយ​មនុស្សធម៌​របស់​អាស៊ាន​សម្រាប់​មីយ៉ាន់ម៉ា កាលពី​ខែ​ឧសភា កន្លងទៅ​ផង​ដែរ ដើម្បី​រួម​ចំណែក​បង្កើត​បរិយាកាស​អំណោយ​ផល​សម្រាប់​ដំណើរការ​សន្ទនា​ប្រកប​ដោយ​ប្រសិទ្ធភាព តាមរយៈ​នៃ​ការ​ជួប​ពិភាក្សា​ជាមួយ​គ្រប់​ភាគី​ដែល​ពាក់ព័ន្ធ​នឹង​វិបត្តិ​នៅ​ភូមា ទាំងអស់។

ការ​ចេញ​ដំណើរ​ទៅ​ធ្វើ​ទស្សនកិច្ច​នៅ​ប្រទេស​ភូមា របស់​រដ្ឋមន្ត្រី​ការបរទេស​កម្ពុជា​លើក​ទី​២ នេះ ធ្វើឡើង​ក្រោយ​ទស្សនកិច្ច​លើក​ទី​១ របស់​ខ្លួន​កាលពី​ចុងខែ​មីនា ឆ្នាំ​២០២២ កន្លងទៅ ដែល​មិន​ទាន់​ទទួល​បាន​លទ្ធផល​ជា​វិជ្ជមាន​នៅឡើយ​រហូត​មក​ទល់​នឹង​ពេលនេះ។

កាលពី​ចុង​ខែ​មីនា ឆ្នាំ​២០២២ កន្លងទៅ ប្រេសិត​ពិសេស​របស់​ប្រធាន​អាស៊ាន​ស្ដីពី​មីយ៉ាន់ម៉ា លោក ប្រាក់ សុខុន បាន​ធ្វើ​ដំណើរ​ទស្សនកិច្ច​ទៅកាន់​ប្រទេស​ភូមា ម្តង​រួច​មក​ហើយ ដើម្បី​ជំរុញ​ឱ្យ​របប​សឹក​មីយ៉ាន់ម៉ា អនុវត្ត​គោលការណ៍ ៥​ចំណុច​របស់​អាស៊ាន។ ជាង​នេះ​ទៀត ក៏​ដើម្បី​ដោះស្រាយ​ពី​ភាព​ជាប់​គាំង​នយោបាយ​របស់​ភូមា ផង​ដែរ។

យ៉ាងណាក៏ដោយ ក្រោយ​ដំណើរ​ទស្សនកិច្ច​លើក​ទី​១ នៃ​ប្រេសិត​ពិសេស​របស់​ប្រធាន​អាស៊ាន​ទៅ​កាន់​ប្រទេស​ភូមា រហូត​ដល់​ពេលនេះ មិន​អាច​ឱ្យ​របប​សឹក​ភូមា​អនុវត្ត​នូវ​កិច្ចព្រមព្រៀង​ទាំង ៥​ចំណុច​បាន​នៅឡើយ​ទេ ខណៈ​ការ​ផ្តល់​ជំនួយ​មនុស្សធម៌​ដែល​ជា​កិច្ចព្រមព្រៀង​មួយ​ក្នុង​ចំណោម​កិច្ចព្រមព្រៀង​ទាំង ៥​ចំណុច​នោះ​ត្រូវ​បាន​អនុវត្ត​តិចតួច​ប៉ុណ្ណោះ។

អនុប្រធាន​វេទិកា​ពលរដ្ឋ លោក ម៉ែន ណាត បាន​ប្រាប់​សារព័ត៌មាន The Cambodia Daily នៅ​ថ្ងៃទី​២៩ មិថុនា នេះ​ថា ការ​ធ្វើ​ដំណើរ​ទស្សនកិច្ច​របស់​ប្រេសិត​ពិសេស​របស់​ប្រធាន​អាស៊ាន​ទៅ​កាន់​ប្រទេស​ភូមា នៅ​ពេលនេះ គ្រាន់តែ​ជា​ការ​ធ្វើឡើង​ដើម្បី​បង្គ្រប់​កិច្ច​ក្នុង​តួនាទី​របស់​ខ្លួន​ប៉ុណ្ណោះ ព្រោះ​ថា​រយៈពេល​កន្លះ​ឆ្នាំ​មកនេះ ប្រធាន​អាស៊ាន លោក ហ៊ុន សែន គ្មាន​វិធានការ​ណា​មួយ​ដើម្បី​ដាក់​សម្ពាធ​ឱ្យ​របប​សឹក​ភូមា អនុវត្ត​តាម​នោះ​ទេ។ ស្រប​ពេល​ដែល​ការ​ដឹកនាំ​របស់​ខ្លួន​ក្នុង​នាម​ជា​ប្រធាន​អាស៊ាន ក៏​ត្រូវ​គេ​រិះគន់​ពី​ការ​រំលោភ​សិទ្ធិមនុស្ស​នៅ​កម្ពុជា​ធ្ងន់ធ្ងរ​ដែរ​នោះ។

លោក ម៉ែន ណាត បញ្ជាក់​ថា ការ​បរាជ័យ​ក្នុង​ដំណើរ​ទស្សនកិច្ច​របស់​ខ្លួន លោក ហ៊ុន សែន ទៅ​កាន់​ប្រទេស​ភូមា កាលពី​ដើម​ខែ​មករា ឆ្នាំ​២០២២ កន្លងទៅ គឺជា​ភាព​អាម៉ាស់​លើ​ឆាក​អន្តរជាតិ​យ៉ាង​ធំធេង ដែល​ធ្វើ​ឱ្យ​លោក ហ៊ុន សែន លែង​ហ៊ាន​ចូល​ទៅ​ដោះស្រាយ​វិបត្តិ​នៅ​ភូមា បន្ត​ទៀត និង​ព្យាយាម​អូស​បន្លាយ​ពេលវេលា​ដើម្បី​ឱ្យ​ផុត​អាណត្តិ​របស់​ខ្លួន​ក្នុង​ឆ្នាំ​២០២២ នេះ។

កាលពី​ថ្ងៃទី​៥ ខែ​មករា ឆ្នាំ​២០២២ ប្រធានាធិបតី​ឥណ្ឌូនេស៊ី លោក Joko Widodo បាន​អះអាង​ថា ឥណ្ឌូនេស៊ី ស្នើ​ឱ្យ​ភូមា ត្រូវតែ​អនុវត្ត​លើ​សំណើ​អាស៊ាន​ទាំង ៥​ចំណុច​ឱ្យ​បាន ដើម្បី​ឱ្យ​ភូមា ត្រឡប់​ទៅ​រក​លទ្ធិប្រជាធិបតេយ្យ​វិញ។

កាលពី​ខែ​មេសា ឆ្នាំ​២០២១ កន្លងទៅ កិច្ចប្រជុំ​កំពូល​មេដឹកនាំ​អាស៊ាន​នៅ​រដ្ឋធានី​ហ្សាកាតា ប្រទេស​ឥណ្ឌូនេស៊ី បាន​ចុះ​កិច្ចព្រមព្រៀង​ជាមួយ​របប​សឹក​ភូមា ដាក់​ចេញ​នូវ​គោលការណ៍​កុងសង់ស៊ីស ៥​ចំណុច ក្នុង​នោះ​រួម​មាន​ការ​ផ្អាក​នូវ​ការ​ប្រើ​អំពើ​ហិង្សា​លើ​ជនស៊ីវិល​ដែល​ពុំ​មាន​ប្រដាប់​អាវុធ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស