បុរសខ្លាំងកម្ពុជាដែលតែងចូលចិត្តប្រកាសសង្គ្រាមជាមួយខ្មែរគ្នាឯង អំពាវនាវឱ្យពលរដ្ឋចូលថវិកាបន្ថែមទៀតដើម្បីកម្ពុជាឈានទៅរកការគ្មានវត្តមានគ្រាប់មីននៅឆ្នាំ២០២៥ ខាងមុខនេះ ខណៈមានសប្បុរសជនដែលជាអ្នកវិនិយោគ អ្នកជំនួញបានចូលរួមប្រមាណជាង ៥លានដុល្លាររួចមកហើយគិតត្រឹមថ្ងៃទី១ ខែកក្កដា កន្លងទៅនេះ។
លោក ហ៊ុន សែន បានសរសេរលើទំព័រហ្វេសប៊ុករបស់លោកកាលពីថ្ងៃទី១ ខែកក្កដា ឆ្នាំ២០២២ ថា ការឈានទៅបញ្ចប់នូវសោកនាដកម្មលើប្រជាជនកម្ពុជាដែលស្លាប់ និងរបួសដោយគ្រាប់មីន និងគ្រាប់មិនទាន់ផ្ទុះដែលជាឃាតកលាក់មុខនៅសេសសល់លើទឹកដីកម្ពុជា គឺជាគោលការណ៍កំណត់ជាអាទិភាពរបស់រដ្ឋាភិបាលកម្ពុជានៅពេលនេះ។ លោកអះអាងថា ការអំពាវនាវឱ្យសប្បុរសជនចូលរួមបំបាត់ចោលគ្រាប់មីន និងគ្រាប់មិនទាន់ផ្ទុះនេះ គឺដើម្បីកម្ពុជាឈានទៅរកការគ្មានវត្តមានគ្រាប់មីននៅឆ្នាំ២០២៥ ខាងមុខនេះ។
រហូតមកទល់ពេលនេះ យ៉ាងហោចណាស់មានសប្បុរសជនដែលជាអ្នកវិនិយោគទុន និងអ្នកជំនួញបានចូលរួមប្រមាណជាង ៥លានដុល្លារអាមេរិក។ លោក ហ៊ុន សែន សង្ឃឹមថានឹងមានការចូលរួមបន្ថែមទៀតដើម្បីឱ្យទឹកដីដ៏កម្សត់មួយនេះរួចផុតពីគ្រាប់មីនជារៀងរហូត។
ការអំពាវនាវនេះ ធ្វើឡើងដើម្បីប្រមូលថវិកាពីសប្បុរសជនទាំងក្នុង និងក្រៅប្រទេសក្នុងការអនុវត្តគម្រោងសម្រាប់សកម្មភាពដើម្បីកម្ចាត់មីនឲ្យអស់ពីកម្ពុជានៅក្នុងឆ្នាំ២០២៥ ខាងមុខនេះ។
អ្នកជំនួញធំៗ និងឧកញ៉ាជាច្រើនរូបដែលបានប្រកាសចូលថវិកាជាបន្តបន្ទាប់ រួមមានឧកញ៉ា គិត ម៉េង ឧកញ៉ា ពង់ ឃាវសែ ឧកញ៉ា ហុង ពីវ និងឧកញ៉ា ឡេង ណាវ៉ាត្រា ជាដើម បានប្រកាសបរិច្ចាគថវិកាក្នុងម្នាក់ៗចំនួន ១លានដុល្លារអាមេរិក។ ជាងនេះទៀត កូនស្រីបង្កើតរបស់លោក ហ៊ុន សែន គឺអ្នកស្រី ហ៊ុន ម៉ាណា និងអ្នកស្រី ហ៊ុន ម៉ាលី បានប្រកាសបរិច្ចាគថវិកាចំនួន ១លានដុល្លារអាមេរិកផងដែរ។
ប្រធានវេទិកាពលរដ្ឋ លោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី៤ កក្កដា នេះថា បើតាមលោកកត់សម្គាល់ទំនងជាមជ្ឈមណ្ឌលសកម្មភាពកម្ចាត់មីនកម្ពុជា Cambodian Mine Action Center ដែលហៅកាត់ថា CMAC មិនមានថវិកាដើម្បីអនុវត្តគម្រោងរបស់ខ្លួនបន្តទៀតនោះទេ ទើបលោក ហ៊ុន សែន ចេញមុខរៃលុយដើម្បីឲ្យមជ្ឈមណ្ឌលនេះបន្តផែនការរបស់ខ្លួនទៅមុខទៀតបែបនេះ។
លោក គឹម សុខ លើកឡើងថា ចាប់តាំងពីមជ្ឈមណ្ឌលសកម្មភាពកម្ចាត់មីនកម្ពុជានេះស្ថិតក្នុងការគ្រប់គ្រងរបស់ UNTAC កាលពីអំឡុងទសវត្សឆ្នាំ១៩៩០ គឺទទួលបានថវិការាប់សិបលានដុល្លារអាមេរិក ដើម្បីអនុវត្តផែនការរបស់ខ្លួន ប៉ុន្តែបើទោះបីជា UNTAC មិនបានគ្រប់គ្រងនៅពេលដែលពួកគេបញ្ចប់បេសកកម្មនៅកម្ពុជាទៅហើយក្តី ក៏មជ្ឈមណ្ឌលកម្ចាត់មីននេះនៅតែអាចទទួលបានជំនួយយ៉ាងច្រើនសន្ធឹកសន្ធាប់ដែរ។
ប្រធានវេទិកាពលរដ្ឋរូបនេះបញ្ជាក់ថា ក្រោយពី CMAC ធ្លាក់ទៅក្នុងការគ្រប់គ្រងរបស់រដ្ឋាភិបាលលោក ហ៊ុន សែន មជ្ឈមណ្ឌលសកម្មភាពកម្ចាត់មីនកម្ពុជានេះបានធ្លាក់ចុះនូវការទទួលជំនួយពីអន្តរជាតិជាបន្តបន្ទាប់ ព្រោះថាលោក ហ៊ុន សែន បានប្រើប្រាស់ CMAC បង្កើតជាសមិទ្ធផលរបស់ខ្លួនក្នុងចេតនាលុបបំបាត់សមិទ្ធផលរបស់ UNTAC ដើម្បីកេងប្រវ័ញ្ចផលប្រយោជន៍នយោបាយខ្លួនឯងទៅថ្ងៃមុខ។
កន្លងមក CMAC ទទួលបានទាំងសម្ភារៈ និងថវិកាជារួមពីប្រទេសម្ចាស់ជំនួយប្រមាណជា ២០លានដុល្លារទៅ ៣០លានដុល្លារអាមេរិកជារៀងរាល់ឆ្នាំ ក្នុងនោះរួមមានប្រទេសអូស្ត្រាលី ស្វីស កាណាដា ជប៉ុន ន័រវែស ស៊ុយអែត និងអាល្លឺម៉ង់ ជាដើម ក្នុងនោះសហរដ្ឋអាមេរិកក៏បានផ្តល់ជំនួយជាថវិកាប្រមាណ ២លានដុល្លារអាមេរិកក្នុងមួយឆ្នាំៗដល់ CMAC ដើម្បីទ្រទ្រង់សកម្មភាពដោះមីននៅកម្ពុជាផងដែរ ប៉ុន្តែជំនួយទាំងនោះត្រូវបានផ្អាកទាំងស្រុងកាលពីចុងឆ្នាំ២០១៧ កន្លងទៅដោយសារតែសហរដ្ឋអាមេរិកបានបង្វែរជំនួយនេះទៅលើវិស័យផ្សេងៗជំនួសវិញ ដូចជាវិស័យយោធា ពាណិជ្ជកម្ម កសិកម្ម សេដ្ឋកិច្ច និងអប់រំ ជាដើម។
មន្ត្រីជាន់ខ្ពស់របស់ CMAC មួយរូបធ្លាប់ប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះ ឲ្យដឹងថា មីននៅកម្ពុជានឹងមិនអាចសម្អាតអស់នោះទេ ពីព្រោះមីនទាំងនោះត្រូវបានគេដោះហើយ រួចយកទៅកប់វិញដើម្បីប្រាប់ទៅអន្តរជាតិថា មីននៅតែមានវត្តមាននៅកម្ពុជា ហើយកម្ពុជានៅតែត្រូវការលុយសម្រាប់ធ្វើកិច្ចការសម្អាតមីនទាំងនោះ៕