ចលនាយុវជនគណបក្សសង្គ្រោះជាតិនៅកូរ៉េខាងត្បូង អះអាងថា ខ្លួននឹងរៀបចំកម្មវិធីពិធីបុណ្យរំឭកខួប ៦ឆ្នាំនៃមរណភាពរបស់បណ្ឌិត កែម ឡី ដើម្បីឧទ្ទិសកុសលជូនវិញ្ញាណក្ខន្ធរបស់លោកទៅកាន់សុគតិភព ខណៈអង្គការសង្គមស៊ីវិលមួយចំនួននៅក្នុងស្រុកក៏បានរៀបចំពិធីរំឭកខួបពេញមួយខែកក្កដា នេះ។
សេចក្ដីជូនដំណឹងរបស់យុវជនយុវនារីនៃចលនាយុវជនគណបក្សសង្គ្រោះជាតិនៅកូរ៉េខាងត្បូង ឱ្យដឹងថា ការរំឭកខួប ៦ឆ្នាំនៃមរណភាពបណ្ឌិត កែម ឡី នាថ្ងៃទី១០ ខែកក្កដា ឆ្នាំ២០២២ នេះ គឺដើម្បីឧទ្ទិសកុសលជូនវិញ្ញាណក្ខន្ធរបស់លោកទៅកាន់ឋានផុតទុក្ខ។ ប្រភពដដែលឲ្យដឹងថា កម្មវិធីបុណ្យរំឭកខួបនេះចាប់ផ្ដើមជួបជុំគ្នានៅម៉ោង ៩-១០ ហើយនៅម៉ោង ១១ នឹងមានកម្មវិធីរាប់បាត្រ និងមានកម្មវិធីសាសនាមួយចំនួនទៀត។
ចំណែកនៅម៉ោង ១២ថ្ងៃត្រង់នឹងមានមតិសំណេះសំណាលរបស់ប្រធានចលនា លោក មាស ពិសាល ជាមួយអ្នកចូលរួម ខណៈម៉ោង ១រសៀលនឹងមាននិមន្តព្រះសង្ឃសម្ដែងព្រះធម្មទេសនាជាកិច្ចបង្ហើយបុណ្យ។ សេចក្ដីជូនដំណឹងបញ្ជាក់ថា កម្មវិធីពិធីបុណ្យរំឭកខួបនេះ នឹងធ្វើនៅទីក្រុងក្វាងជូធំ ហាងខ្មែរបាយ័ន នៃប្រទេសកូរ៉េខាងត្បូង។
សមាជិកចលនាយុវជនសង្គ្រោះជាតិមួយរូប គឺកញ្ញា រស់ សុផល បានប្រាប់សារព័ត៌មាន The Cambodia Daily នៅថ្ងៃចន្ទ ទី៤ កក្កដា នេះថា យុវជនខ្មែរនៅកូរ៉េខាងត្បូងប្រមាណ ១០០នាក់នឹងចូលរួមកម្មវិធីបុណ្យនេះ។ កញ្ញាបន្តថា ទោះបីបណ្ឌិត កែម ឡី ចែកឋានទៅមានរយៈពេល ៦ឆ្នាំទៅហើយក្ដី ក៏ទឹកចិត្តយុវជនយុវនារីខ្មែរដែលស្នេហាលទ្ធិប្រជាធិបតេយ្យ និងយុត្តិធម៌សង្គម នៅតែចងចាំវីរភាព និងការពលិកម្មដ៏ធំធេងរបស់បណ្ឌិត កែម ឡី ជានិច្ច។
កញ្ញាបន្តថា យុត្តិធម៌សម្រាប់បណ្ឌិត កែម ឡី និងក្រុមគ្រួសាររបស់លោកនៅមិនទាន់បានទទួលនៅឡើយទេ ហើយការបង្ហាញមុខឃាតកឈ្មោះ អឿត អាង ហៅ ជួប សម្លាប់ នោះ អាចគ្រាន់តែជាឃាតកសិប្បនិម្មិតតែប៉ុណ្ណោះ។
អ្នកស្រាវជ្រាវអំពីការអភិវឌ្ឍសង្គម និងជាអ្នកវិភាគនយោបាយ បណ្ឌិត កែម ឡី ត្រូវបានខ្មាន់កាំភ្លើងបាញ់សម្លាប់កាលពីថ្ងៃទី១០ ខែកក្កដា ឆ្នាំ២០១៦ នៅក្នុងស្ដារម៉ាតស្តុបបូកគោ ចំកណ្ដាលរាជធានីភ្នំពេញ។ ការបាញ់សម្លាប់បណ្ឌិត កែម ឡី បានកើតឡើងតែ ២ថ្ងៃក្រោយពេលលោកធ្វើអត្ថាធិប្បាយអំពីរបាយការណ៍អង្គការ Global Witness ដែលមានឈ្មោះថា «អាណាចក្រអាជីវកម្មត្រកូល ហ៊ុន នៅកម្ពុជា»។
ក្នុងរបាយការណ៍អង្គការ Global Witness បានលាតត្រដាងពីការក្ដោបក្ដាប់អាជីវកម្មរបស់ក្រុមគ្រួសារលោក ហ៊ុន សែន យ៉ាងច្រើននៅប្រទេសកម្ពុជាដែលមានតម្លៃរាប់រយលានដុល្លារ។
អស់រយៈពេលជិត ៦ឆ្នាំកន្លងមកនេះ ព្រឹត្តិការណ៍នៃការសម្លាប់បណ្ឌិត កែម ឡី សមត្ថកិច្ចចាប់ខ្លួនឃាតកបានតែម្នាក់ប៉ុណ្ណោះឈ្មោះ អឿត អាង ហៅ «ជួប សម្លាប់» ដែលត្រូវបានចាប់ខ្លួន ហើយតុលាការបានផ្ដន្ទាទោសឱ្យជាប់គុកអស់មួយជីវិត។
ទោះបីជាសមត្ថកិច្ចចាប់ខ្លួនឈ្មោះ អឿត អាង ហៅ «ជួប សម្លាប់» ហើយតុលាការបានផ្ដន្ទាទោសលើរូបគេអស់មួយជីវិតក្ដី ប៉ុន្តែសាធារណជននៅតែយល់ថាបុរសឈ្មោះ អឿត អាង ហៅ «ជួប សម្លាប់» គ្រាន់តែជាឃាតកសិប្បនិម្មិតប៉ុណ្ណោះ។ ពួកគេក៏នៅតែអំពាវនាវទៅរដ្ឋាភិបាលជាថ្មីទៀតឱ្យជំរុញទៅស្ថាប័នពាក់ព័ន្ធរបស់ខ្លួន ត្រូវស្វែងរកអ្នកជាប់ពាក់ព័ន្ធផ្សេងទៀតក្នុងករណីឃាតកម្មលើបណ្ឌិត កែម ឡី មកផ្ដន្ទាទោសតាមច្បាប់ដើម្បីផ្ដល់យុត្តិធម៌ពិតប្រាកដដល់ជនរងគ្រោះ៕