សហមេធាវីការពារក្តីប្រធានគណបក្សសង្គ្រោះជាតិ អះអាងថា លោក កឹម សុខា បានបដិសេធរាល់ការចោទប្រកាន់ទាក់ទងនឹងការធ្វើបាតុកម្មក្រៅពីទីលានប្រជាធិបតេយ្យ និងការបង្កអំពើហិង្សាផ្សេងៗមិនមែនជាជំហររបស់លោកទេ។
សហមេធាវីការពារក្តីឱ្យមេដឹកនាំបក្សប្រឆាំង លោក ចាន់ ចេន បានផ្តល់បទសម្ភាសន៍នៅមុខសាលាដំបូងរាជធានីភ្នំពេញបន្ទាប់ពីសវនាការលោក កឹម សុខា នៅថ្ងៃទី៦ កក្កដា នេះថា សវនាការលើកទី៤៧ នៅថ្ងៃនេះ គឺផ្ដោតទៅលើអង្គហេតុប្រទូសរ៉ាយដដែល។ ក្នុងនោះ ក្រុមប្រឹក្សាជំនុំជម្រះបានចោទសួរលោក កឹម សុខា ជុំវិញការធ្វើបាតុកម្មនៅក្នុងរាជធានីភ្នំពេញត្រង់ម្តុំស្ពានក្បាលថ្នល់ កាលពីឆ្នាំ២០១៣ ប៉ុន្តែលោក កឹម សុខា បានច្រានចោលថាមិនមែនជាការដឹកនាំរបស់លោកនោះទេ។
លោក ចាន់ ចេន អះអាងថា សវនាការនេះគ្មានភាពរីកចម្រើននោះទេ គឺនៅតែមានភាពតានតឹងដដែល ខណៈអយ្យការអមសាលាដំបូងចេះតែព្យាយាមចង់ឱ្យកូនក្ដីរបស់លោកព្រមទទួលយកនូវសកម្មភាពបាតុកម្មនៅស្ពានក្បាលថ្នល់ ដែលពួកគេបានលើកយកមកចោទសួរលោក កឹម សុខា ក្នុងសវនាការពេញមួយព្រឹកនៅថ្ងៃពុធនេះ។
កាលពីថ្ងៃទី២៩ ខែមិថុនា ឆ្នាំ២០២២ ក្នុងសវនាការលើកទី៤៦ តំណាងអយ្យការអមសាលាដំបូងរាជធានីភ្នំពេញ បានស្នើទៅក្រុមប្រឹក្សាជំនុំជម្រះឱ្យឃុំខ្លួនលោក កឹម សុខា ឡើងវិញ ក្រោមហេតុផលថា លោក កឹម សុខា បានបំពានបម្រាមរបស់តុលាការដោយសារតែលោកបានធ្វើសកម្មភាពចូលរួមក្នុងពិធីសាសនា និងកម្មវិធីប្រពៃណីនាពេលកន្លងមក។
បន្ទាប់ពីការហាមប្រាមរបស់តុលាការកាលពីសវនាការកន្លងទៅ ត្រូវគេសង្កេតឃើញថា ប្រធានគណបក្សសង្គ្រោះជាតិ លោក កឹម សុខា ហាក់មិនបានធ្វើអត្ថាធិប្បាយច្រើនជុំវិញសកម្មភាពរបស់លោកដូចមុននោះទេ ប៉ុន្តែបម្រាមរបស់តុលាការដែលហាមលោក កឹម សុខា មិនឱ្យនិយាយស្តី និងធ្វើសកម្មភាពពាក់ព័ន្ធនឹងនយោបាយ ត្រូវគេរិះគន់ថាជាចេតនានយោបាយក្រោមការបង្គាប់បញ្ជារបស់បក្សកាន់អំណាច។
ជាក់ស្តែង កាលពីថ្ងៃទី៥ ខែកក្កដា ឆ្នាំ២០២២ នេះ មេដឹកនាំបក្សប្រឆាំង លោក កឹម សុខា បានសរសេរលើគណនីហ្វេសប៊ុករបស់លោកថា លោកមានសេចក្តីសោមនស្សរីករាយយ៉ាងខ្លាំងដែលតំណាងសហភាពអឺរ៉ុប បាននាំគ្នាមកសួរសុខទុក្ខលោកដោយផ្ទាល់ដល់គេហដ្ឋានរបស់លោកក្នុងរាជធានីភ្នំពេញ ប៉ុន្តែលោក កឹម សុខា មិនបានលើកឡើងពីការពិភាក្សារបស់លោកជាមួយតំណាងសហភាពអឺរ៉ុប ពីបញ្ហាណាមួយដូចពេលមុននោះទេ។
ប្រធានគណបក្សសង្គ្រោះជាតិ លោក កឹម សុខា ត្រូវបានអាជ្ញាធរក្រុងភ្នំពេញចាប់ខ្លួនកាលពីថ្ងៃទី៣ ខែកញ្ញា ឆ្នាំ២០១៧ ពីបទឃុបឃិតជាមួយរដ្ឋបរទេស ដើម្បីផ្តួលរំលំរដ្ឋាភិបាលកម្ពុជា ប៉ុន្តែរហូតមកទល់នឹងពេលនេះ លោកនៅតែមានភាពស្អាតស្អំ ព្រោះតុលាការកម្ពុជាមិនទាន់កាត់ទោសលោកពីបទល្មើសណាមួយនៅឡើយទេ។
ជុំវិញសំណុំរឿងរបស់មេដឹកនាំបក្សប្រឆាំង លោក កឹម សុខា ដែលកំពុងដំណើរការសវនាការសព្វថ្ងៃនេះ ត្រូវគេចាត់ទុកថាជារឿងនយោបាយប៉ុណ្ណោះ៕