អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា អះអាងថា ការឡើងថ្លៃជី និងថ្នាំកសិកម្មបច្ចុប្បន្នបណ្ដាលមកពីកម្ពុជានាំចូលជី និងថ្នាំកសិកម្មពីក្រៅប្រទេសទាំងស្រុង ទោះបីជី និងថ្នាំកសិកម្មមិនជាប់កាតព្វកិច្ចបង់ពន្ធក៏ដោយ។
នេះជាការលើកឡើងរបស់អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា លោក គុណ ញឹម ក្នុងសន្និសីទសារព័ត៌មានមួយនាព្រឹកថ្ងៃទី៧ ខែកក្កដា ឆ្នាំ២០២២។
អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា លោក គុណ ញឹម ថ្លែងក្នុងសន្និសីទសារព័ត៌មាននាព្រឹកថ្ងៃទី៧ ខែកក្កដា ឆ្នាំ២០២២ នេះថា រដ្ឋាភិបាលមានគោលនយោបាយគាំទ្រវិស័យកសិកម្ម ជី និងថ្នាំកសិកម្ម រួមទាំងបរិក្ខារកសិកម្មមិនបានជាប់ពន្ធទេ។
លោកថា តម្លៃជី និងថ្នាំកសិកម្មឡើងថ្លៃមិនមែនដោយសារបង់ពន្ធទេ ព្រោះជី និងថ្នាំ រួមទាំងបរិក្ខារកសិកម្ម មិនបានជាប់ពន្ធអាករ ដោយពន្ធនេះជាបន្ទុករបស់រដ្ឋ។ លោក គុណ ញឹម ថាជី និងថ្នាំ រួមទាំងបរិក្ខារកសិកម្មផ្សេងៗដែលកសិករកំពុងប្រើប្រាស់មានតម្លៃថ្លៃខ្លាំង បណ្ដាលមកពីកម្ពុជាមិនមែនជាប្រទេសអ្នកផលិតជី និងថ្នាំ រួមទាំងបរិក្ខារកសិកម្មផ្សេងៗ ត្រូវនាំចូលពីក្រៅប្រទេសទាំងស្រុង។
យ៉ាងណាក៏ដោយ មន្ត្រីក្រសួងកសិកម្មធ្លាប់លើកឡើងថា ជី និងថ្នាំកសិកម្មដែលកសិករនៅប្រទេសកម្ពុជាកំពុងប្រើប្រាស់នាពេលបច្ចុប្បន្ន បាននាំចូលភាគច្រើនពីប្រទេសវៀតណាម និងមួយចំនួនពីថៃដែរ។
ករណីតម្លៃជី និងថ្នាំកសិកម្មឡើងថ្លៃនេះ បានជះឥទ្ធិពលដល់កសិករដែលជាអ្នកប្រើប្រាស់ ស្របពេលផលិតផលដែលលក់ចេញវិញមានតម្លៃថោក ហើយគ្មានទីផ្សារសម្រាប់លក់ចេញថែមទៀត ដូចជាស្វាយ ស្រូវ រួមទាំងបន្លែ ផ្លែឈើផ្សេងៗ។
បើតាមកសិករ ឱ្យដឹងថា មុនកូវីដ-១៩ តម្លៃជីក្រោម ១០ម៉ឺនរៀល ប៉ុន្តែបច្ចុប្បន្ន ជី និងថ្នាំកសិកម្មចាប់ផ្ដើមឡើងថ្លៃ ១០ម៉ឺនរៀលក្នុងមួយបាវ ហើយថ្នាំកសិកម្មវិញឡើងចន្លោះពី ៥ ទៅ ១០ម៉ឺនរៀល៕