ឧបការីរដ្ឋមន្ត្រីក្រសួងការបរទេសរបស់សហរដ្ឋអាមេរិកទទួលបន្ទុកកិច្ចការអាស៊ីបូព៌ា និងឥណ្ឌូប៉ាស៊ីហ្វិក កំពុងធ្វើទស្សនកិច្ចនៅកម្ពុជារយៈពេល ២ថ្ងៃ ពីថ្ងៃទី១២-១៣ ខែកក្កដា ឆ្នាំ២០២២ នេះ ដើម្បីជួបពិភាក្សាបញ្ហាក្នុងតំបន់មួយចំនួនក្នុងនាមកម្ពុជាជាប្រធានអាស៊ានប្តូរវេននៅឆ្នាំ២០២២។
សហរដ្ឋអាមេរិកបានចេញសេចក្តីប្រកាសព័ត៌មាន នៅថ្ងៃទី១២ ខែកក្កដា ឆ្នាំ២០២២ នេះថា ឧបការីរដ្ឋមន្ត្រីក្រសួងការបរទេសសហរដ្ឋអាមេរិកទទួលបន្ទុកកិច្ចការអាស៊ីបូព៌ា និងឥណ្ឌូប៉ាស៊ីហ្វិក លោក Daniel J. Kritenbrink នឹងជួបជាមួយរដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន និងមន្ត្រីជាន់ខ្ពស់ដទៃទៀតដើម្បីពិភាក្សាពីទំនាក់ទំនងទ្វេភាគី ក្នុងនោះលោក Daniel J. Kritenbrink ក៏នឹងជួបជាមួយយុវជន និងមេដឹកនាំសង្គមស៊ីវិលមួយចំនួនផងដែរ។
សហរដ្ឋអាមេរិកលើកឡើងថា ការជួបពិភាក្សាគ្នារវាងមន្ត្រីការបរទេសនៃប្រទេសទាំងពីរ នឹងលើកឡើងអំពីកិច្ចគាំទ្ររបស់សហរដ្ឋអាមេរិកចំពោះកម្ពុជា ក្នុងនាមជាប្រធានអាស៊ានប្តូរវេននៅឆ្នាំ២០២២ នេះ ក្នុងនោះក៏នឹងលើកឡើងពីបញ្ហាក្នុងតំបន់មួយចំនួន និងបញ្ហាក្នុងសកលលោកផងដែរ។
ដំណើរទស្សនកិច្ចរបស់មន្ត្រីជាន់ខ្ពស់សហរដ្ឋអាមេរិកទៅកម្ពុជានេះ ធ្វើឡើងបន្ទាប់ពីកម្ពុជាបានធ្វើជាប្រធានអាស៊ានប្តូរវេនអស់រយៈពេលជាងកន្លះឆ្នាំក្នុងឆ្នាំ២០២២ នេះ ប៉ុន្តែត្រូវគេរិះគន់ថាកម្ពុជាបានធ្វើឲ្យអាស៊ានរងនូវវិបត្តិធ្ងន់ធ្ងរទៅវិញ។
ឧបការីការបរទេសសហរដ្ឋអាមេរិក លោក Daniel J. Kritenbrink នឹងធ្វើដំណើរទស្សនកិច្ចរយៈពេល ៥ថ្ងៃ គឺនៅកម្ពុជា ២ថ្ងៃដើម្បីពិភាក្សាបញ្ហាក្នុងតំបន់ និងបន្តទៅប្រទេសជប៉ុន រយៈពេល ៣ថ្ងៃ ដើម្បីសម្ដែងសមានទុក្ខដល់ពលរដ្ឋជប៉ុន ចំពោះការបាត់បង់អតីតនាយករដ្ឋមន្ត្រី លោក Shinzo Abe ដោយសារអំពើឃាតកម្មកាលពីសប្តាហ៍កន្លងទៅ។
ប្រធានវេទិកាពលរដ្ឋ លោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី១២ កក្កដា នេះថា ដំណើរទស្សនកិច្ចនេះ គឺជាដំណើរទស្សនកិច្ចដែលមានគោលដៅសម្របសម្រួលទំនាក់ទំនងការទូតរវាងកម្ពុជា និងសហរដ្ឋអាមេរិក ហើយក៏ជាការបញ្ជាក់ជំហររបស់សហរដ្ឋអាមេរិកលើរឿងថ្មីៗ និងវិបត្តិចាស់ៗរវាងកម្ពុជា និងអាមេរិកផងដែរ មុនពេលសហរដ្ឋអាមេរិកផ្លាស់ប្ដូរទូតនៅទីក្រុងភ្នំពេញ។
លោក គឹម សុខ លើកឡើងថា ឧបការីការបរទេសអាមេរិកនឹងមិនភ្លេចទេអំពីការប្រកាន់ជំហរឲ្យមានការជម្រះលើការសង្ស័យមូលដ្ឋានទ័ពចិនក្នុងទឹកដីកម្ពុជា ការទាមទារឲ្យស្ដារប្រជាធិបតេយ្យ និងភាពជាអព្យាក្រឹតរបស់អាស៊ាន ស្របពេលដែលកម្ពុជាជាប្រធានប្ដូរវេនរបស់អាស៊ាននៅឆ្នាំ២០២២ នេះ។
ក្រុមអ្នកសង្កេតការណ៍រិះគន់ថា ក្នុងឋានៈលោក ហ៊ុន សែន ជាប្រធានអាស៊ាននៅឆ្នាំ២០២២ នេះ បានធ្វើឱ្យខូចតម្លៃនយោបាយការទូតលើឆាកអន្តរជាតិរបស់អាស៊ានយ៉ាងធ្ងន់ធ្ងរ ជាពិសេសធ្វើឱ្យខូចគោលការណ៍កុងសង់ស៊ីសទាំង ៥ចំណុចរបស់អាស៊ានតែម្តង ដែលគេសង្ស័យថាកម្ពុជាមានទំនោរបម្រើផលប្រយោជន៍ឲ្យមហាអំណាចកុម្មុយនីស្តចិន។
ប្រភពដដែលបញ្ជាក់ថា ដោយសារតែកម្ពុជាដឹកនាំអាស៊ាន និងដឹកនាំកម្ពុជាខ្លួនឯង ដែលគេមើលឃើញថាមិនមានអព្យាក្រឹត ទើបប្រធានាធិបតីសហរដ្ឋអាមេរិក លោក ចូ បៃដិន (Joe Biden) មិនបានអនុញ្ញាតឲ្យកម្ពុជាចូលជាសមាជិកក្របខ័ណ្ឌសេដ្ឋកិច្ចឥណ្ឌូ-ប៉ាស៊ីហ្វិក (IPEF) កាលពីថ្ងៃទី២៣ ខែឧសភា ឆ្នាំ២០២២ កន្លងទៅនេះ ក្នុងនោះកម្ពុជាក៏ត្រូវគេចាត់ចូលក្នុងក្រុមប្រទេសរំលោភសិទ្ធិមនុស្ស និងជាន់ឈ្លីលទ្ធិប្រជាធិបតេយ្យដូចគ្នានឹងរបបសឹកភូមា ដែរ៕