សហរដ្ឋអាមេរិកអំពាវនាវឲ្យអាជ្ញាធរ និងរដ្ឋាភិបាលកម្ពុជា ធ្វើការស៊ើបអង្កេតលើឃាតកម្មបណ្ឌិត កែម ឡី ដែលត្រូវខ្មាន់កាំភ្លើងបាញ់សម្លាប់ទាំងកណ្តាលថ្ងៃក្នុងទីក្រុងភ្នំពេញ ឲ្យបានពេញលេញ និងប្រកបដោយតម្លាភាព។
ស្ថានទូតសហរដ្ឋអាមេរិកប្រចាំនៅកម្ពុជា បានសរសេរលើទំព័រហ្វេសប៊ុករបស់ខ្លួនកាលពីថ្ងៃទី១១ ខែកក្កដា ឆ្នាំ២០២២ នេះថា សហរដ្ឋអាមេរិកសូមចូលរួមជាមួយប្រជាជនកម្ពុជាទូទាំងប្រទេស ក្នុងការចងចាំវីរភាពបណ្ឌិត កែម ឡី ដែលជាអ្នកវិភាគ និងជាគ្រូពេទ្យព្យាបាលជំងឺសង្គមមួយរូបដែលទទួលបានការគោរពយ៉ាងច្រើនពីមជ្ឈដ្ឋានជាតិ និងអន្តរជាតិ ដែលត្រូវបានគេធ្វើឃាតកាលពីឆ្នាំ២០១៦ កន្លងទៅ។
ស្ថានទូតសហរដ្ឋអាមេរិកប្រចាំនៅកម្ពុជាបានសរសេរថា សហរដ្ឋអាមេរិកសូមអំពាវនាវឲ្យអាជ្ញាធរធ្វើការស៊ើបអង្កេតឲ្យបានពេញលេញ និងប្រកបដោយតម្លាភាពលើឃាតកម្មនេះ។
បណ្ឌិត កែម ឡី ដែលជាអ្នកស្រាវជ្រាវការអភិវឌ្ឍសង្គម ត្រូវបានឃាតកបាញ់សម្លាប់កាលពីថ្ងៃទី១០ ខែកក្កដា ឆ្នាំ២០១៦ នៅហាងស្តារម៉ាតក្នុងស្ថានីយប្រេងឥន្ធនៈកាល់តិច (Star Mart Caltex) ត្រង់ចំណុចស្តុបបូកគោកណ្តាលទីក្រុងភ្នំពេញ។ ភ្លាមៗនោះ អាជ្ញាធរកម្ពុជាបានចាប់ខ្លួនបុរសម្នាក់ដែលបានសារភាពថាឈ្មោះ អឿត អាង ហៅ ជួប សម្លាប់ ជាអ្នកបាញ់បណ្ឌិត កែម ឡី ដោយសារជនរងគ្រោះជំពាក់លុយខ្លួនចំនួន ៣ពាន់ដុល្លារ។ តុលាការបានសម្រេចកាត់ទោសបុរសដែលបានសារភាពថាខ្លួនជាឃាតកនោះឲ្យជាប់ពន្ធនាគារអស់មួយជីវិត។
យ៉ាងណាក៏ដោយ ឃាតកម្មលើបណ្ឌិត កែម ឡី នេះបានកើតឡើង ២ថ្ងៃបន្ទាប់ពីលោកបានលាតត្រដាងផែនការលក់ជាតិ និងការគ្រប់គ្រងជំនួញក្នុងប្រទេសកម្ពុជាស្ទើរតែទាំងអស់ដែលមានទឹកប្រាក់រាប់រយលានដុល្លាសហរដ្ឋអាមេរិករបស់បក្ខពួកក្រុមគ្រួសារត្រកូល ហ៊ុន តាមរបាយការណ៍អង្គការ គ្លប៊ល វីនេស (Global Witness) ដែលបានចេញផ្សាយនាពេលកន្លងមក។
អ្នកវិភាគនយោបាយ និងសង្គម បណ្ឌិត ឡៅ ម៉ុងហៃ បានលើកឡើងអំឡុងពេលនៃការប្រារព្ធខួប ៦ឆ្នាំនៃមរណភាពបណ្ឌិត កែម ឡី កាលពីថ្ងៃទី១០ ខែកក្កដា កន្លងទៅថា ការអះអាងរបស់បុគ្គល អឿត អាង ហៅ ជួប សម្លាប់ ពីការធ្វើឃាតដោយសារជំពាក់ប្រាក់ ៣ពាន់ដុល្លារ ជារឿងមិនសមហេតុផលនោះទេ។ ដូច្នេះ សូមតុលាការបើកការស៊ើបអង្កេតការបាញ់សម្លាប់បណ្ឌិត កែម ឡី នេះ សាជាថ្មីឡើងវិញដើម្បីធានាប្រព័ន្ធយុត្តិធម៌នៅកម្ពុជា។
បណ្ឌិត ឡៅ ម៉ុងហៃ លើកឡើងថា វាពិតជាមិនសមហេតុផលទេដែលថាបណ្ឌិត កែម ឡី ជំពាក់លុយបុរសជាឃាតកឈ្មោះ អឿង អាង ចំនួន ៣ពាន់ដុល្លារ ហើយក៏មិនសមហេតុផលដែរថា បុរសឈ្មោះ អឿង អាង ម្នាក់នេះចំណាយលុយទៅទិញកាំភ្លើងដែលមានតម្លៃដល់ទៅជាង ៣ពាន់ដុល្លារដើម្បីបាញ់សម្លាប់បណ្ឌិត កែម ឡី ដោយសារតែបណ្ឌិត កែម ឡី ជំពាក់លុយ ៣ពាន់ដុល្លារនោះ។
លោកបណ្ឌិតបន្តទៀតថា ជាងនេះទៀត បុរសឈ្មោះ អឿត អាង នេះ ក៏មិនល្ងង់ដល់ថ្នាក់គិតមិនឃើញថា ខ្លួននឹងមិនអាចបានលុយមកវិញទេ បើអ្នកជំពាក់លុយខ្លួននឹងត្រូវស្លាប់នោះ។ ជាងនេះទៀត ខ្លួនឯងជាម្ចាស់លុយក៏នឹងត្រូវជាប់គុកថែមទៀត ហើយរឹតតែមិនសមហេតុផលទៀតនោះ នៅពេលខ្លួនបានជួបអ្នកជំពាក់លុយហើយ មិនទាមទារឱ្យគេសងលុយ បែរជាលួចបាញ់សម្លាប់គេទៅវិញ។
អ្នកវិភាគនយោបាយ និងសង្គមរូបនេះបញ្ជាក់ថា ដើម្បីបញ្ចប់អំពើនិទ្ទណ្ឌភាពនៅកម្ពុជា រដ្ឋាភិបាលត្រូវតែទទួលខុសត្រូវក្នុងការស្វែងរកឃាតកពិតមកទទួលទោសចំពោះមុខច្បាប់ឲ្យខាងតែបាន បើមិនដូច្នោះទេ ឃាតកម្មក្រៅប្រព័ន្ធច្បាប់បែបនេះ គឺនៅតែបន្តកើតមានជានិច្ចគ្មានថ្ងៃអាចបញ្ចប់បានឡើយ៕