អង្គការតម្លាភាពកម្ពុជា ថាគិតត្រឹមដំណាច់ឆ្នាំ២០២១ រាជរដ្ឋាភិបាលកម្ពុជាបានជំពាក់បំណុលបរទេសជាលក្ខណៈទ្វេភាគីជាង ៩ពាន់លានដុល្លារអាមេរិក ក្នុងនោះជំពាក់មហាអំណាចកុម្មុយនីស្តចិនជាង ៤២ភាគរយ។
អង្គការតម្លាភាពកម្ពុជា បានចេញសេចក្តីរាយការណ៍របស់ខ្លួនកាលពីដើមខែកក្កដា ឆ្នាំ២០២២ នេះថា ប្រទេសកម្ពុជាបានជំពាក់បំណុលបរទេសជាលក្ខណៈទ្វេភាគីចំនួន ៥ប្រទេស ក្នុងនោះរួមមាន ចិន ជប៉ុន កូរ៉េខាងត្បូង បារាំង ឥណ្ឌា ថៃ និងវៀតណាម ខណៈបំណុលទាំងនេះរាជរដ្ឋាភិបាលមានលទ្ធភាពចរចាដោះស្រាយត្រឹមតែក្នុងទំហំ ៦ភាគរយប៉ុណ្ណោះ។
ប្រភពដដែលលើកឡើងថា ក្រៅពីបំណុលទ្វេភាគី ប្រទេសកម្ពុជាក៏មានបំណុលពហុភាគីផងដែរ ប៉ុន្តែបំណុលនេះមានត្រឹមតែ ៣០ភាគរយប៉ុណ្ណោះ ក្នុងនោះជំពាក់បំណុលធនាគារអភិវឌ្ឍន៍អាស៊ីជាង ២០ភាគរយ ធនាគារពិភពលោក ៧ភាគរយ មូលនិធិអន្តរជាតិសម្រាប់អភិវឌ្ឍន៍កសិកម្មជាង ១ភាគរយ និងបំណុលពហុភាគីចំនួនទៀតផងដែរ។
ការចេញសេចក្តីរាយការណ៍នេះ ធ្វើឡើងបន្ទាប់ពីអង្គការតម្លាភាពកម្ពុជាបានធ្វើការស្រាវជ្រាវលើឯកសាររបស់រដ្ឋាភិបាលកម្ពុជាជាច្រើន ដូចជាច្បាប់ស្ដីពីការគ្រប់គ្រងហិរញ្ញវត្ថុសម្រាប់ឆ្នាំ២០២១ ជាដើម។
ប្រធានវេទិកាពលរដ្ឋ លោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី១៤ កក្កដា នេះថា មានហេតុផលធំៗមួយចំនួនដែលបំណុលកើតឡើងពីការដឹកនាំរបស់លោក ហ៊ុន សែន សព្វថ្ងៃនេះ អាចរុញច្រានកម្ពុជាឱ្យជួបគ្រោះមហន្តរាយធំធេងនៅពេលខាងមុខ ដោយសារតែបំណុលទ្វេភាគីមានទំហំធំពេក ហើយក៏ជាបំណុលដែលគ្មានតម្លាភាព និងជាបំណុលដែលគ្មានការអនុគ្រោះថែមទៀត។
លោកបន្តថា ចិននឹងមិនអនុគ្រោះទេបើកម្ពុជាមិនអាចរកលុយសងគេទាន់ពេលវេលា ក្នុងនោះពួកគេនឹងទាមទារកាន់កាប់ទីតាំងសំខាន់ៗនៅប្រទេសកម្ពុជាជាមិនខាន។ ជាក់ស្តែងនៅពេលនេះ ចិនបានគ្រប់គ្រងមួយជំហានទៅហើយ ដូចជាកាន់កាប់តំបន់សេដ្ឋកិច្ចពិសេស កំពង់ផែទឹកជ្រៅ និងព្រលានយន្តហោះ ជាដើម។ ប៉ុន្តែលោកមិនអាចបញ្ជាក់បានទេថា ការកាន់កាប់របស់ចិនលើទីតាំងសំខាន់ៗទាំងនេះ គឺជាការរំលស់បំណុលពីកម្ពុជាឲ្យទៅចិនជាបណ្តើរៗ ឬក៏យ៉ាងណានោះទេ។ រឿងដូច្នេះ កើតមាននៅប្រទេសដទៃរួចទៅហើយ។
ប្រធានវេទិកាពលរដ្ឋរូបនេះបញ្ជាក់ថា កម្ពុជាសព្វថ្ងៃនេះមិនមានដើមទុនសម្រាប់វិនិយោគដោយខ្លួនឯង ដើម្បីទទួលបានចំណូលជាតិសម្រាប់ទប់ទល់ការចំណាយឱ្យបានគ្រប់គ្រាន់នោះឡើយ ស្របពេលដែលធនធានធម្មជាតិរបស់ខ្លួនក៏ត្រូវបានវិនាសហិនហោច ខណៈសេដ្ឋកិច្ចពាណិជ្ជកម្មធំៗត្រូវបានរដ្ឋាភិបាលចិន និងវៀតណាម ប្រើប្រាស់រូបភាពជាក្រុមហ៊ុនទៅគ្រប់គ្រងស្ទើរពេញផ្ទៃប្រទេសទៅហើយនោះ។ ដូច្នេះ ប្រទេសកម្ពុជាគ្មានសង្ឃឹមថានឹងមានលុយសងគេឱ្យផុតអស់បំណុលទាំងនោះទេ បើនៅតែបន្តដឹកនាំតាមរបៀបរដ្ឋាភិបាលលោក ហ៊ុន សែន សព្វថ្ងៃនេះទៀតនោះ។
វិទ្យាស្ថាន Kiel Institute ដែលមានមូលដ្ឋាននៅប្រទេសអាល្លឺម៉ង់ កាលពីចុងឆ្នាំ២០១៩ បានរកឃើញថា ប្រទេសកម្ពុជាស្ថិតក្នុងចំណោមប្រទេសដែលមានអត្រាជំពាក់បំណុលប្រទេសចិនច្រើនបំផុតលំដាប់ទី៦ ក្នុងចំណោមប្រទេស៥០ លើពិភពលោក ដែលជាបំណុលមានហានិភ័យ ការប្រាក់ខ្ពស់ និងកង្វះតម្លាភាព។
ក្រសួងសេដ្ឋកិច្ចកម្ពុជា បានចេញផ្សាយព្រឹត្តិបត្រស្ថិតិបំណុលសាធារណៈរបស់ខ្លួន កាលពីថ្ងៃទី៩ ខែមិថុនា ឆ្នាំ២០២២ នេះថា ប្រទេសកម្ពុជាបានចុះកិច្ចព្រមព្រៀងខ្ចីបុលបរទេសចាប់ពីឆ្នាំ២០១៩ ដល់ឆ្នាំ២០២២ ក្នុងទំហំទឹកប្រាក់ ១ម៉ឺន ៥ពាន់លានដុល្លារអាមេរិក ប៉ុន្តែកម្ពុជាបានចំណាយអស់ ១ម៉ឺន ៥៥១លានដុល្លារអាមេរិកហើយ ខណៈបំណុលជាក់ស្តែងដែលកម្ពុជាមិនទាន់បានទូទាត់សងម្ចាស់បំណុលសព្វថ្ងៃនេះ គឺមានដល់ទៅជាង ៩៤០០លានដុល្លារអាមេរិកឯណោះ៕