32 C
Phnom Penh

អ្នក​ឃ្លាំមើល៖ ការ​ធ្វើ​វិសោធនកម្ម​រដ្ឋធម្មនុញ្ញ​បង្ហាញ​ថា​លោក ហ៊ុន សែន កំពុង​ជ្រែក​រាជ្យ​ព្រះមហាក្សត្រ

ដោយ ឌឹ ខេមបូឌា ដេលី

បទវិភាគ

ប្រធាន​វេទិកា​ពលរដ្ឋ លោក គឹម សុខ លើកឡើង​ថា ការ​ធ្វើ​វិសោធនកម្ម​រដ្ឋធម្មនុញ្ញ​លើក​ទី​១០ នេះ បាន​បង្ហាញ​យ៉ាង​ច្បាស់​ថា លោក​នាយករដ្ឋមន្ត្រី ហ៊ុន សែន កំពុង​ជ្រែក​រាជ្យ​ព្រះមហាក្សត្រ​ដែល​នឹង​ក្លាយ​ជា​បុគ្គល​ដ៏​មាន​អំណាច​បំផុត​មួយ​ទៅ​ថ្ងៃ​មុខ និង​ធ្វើ​ឱ្យ​ធ្លាក់​ចុះ​នូវ​ការ​អនុវត្ត​តាម​បែប​លទ្ធិប្រជាធិបតេយ្យ​នៅ​ប្រទេស​កម្ពុជា​យ៉ាង​ធ្ងន់ធ្ងរ ហើយ​ថា​ការ​ធ្វើ​វិសោធនកម្ម​រដ្ឋធម្មនុញ្ញ​ម្តង​នេះ គណបក្ស​កាន់​អំណាច​របស់​លោក ហ៊ុន សែន បាន​ប្រែ​ក្លាយ​ខ្លួន​ទៅជា​ស្ថាប័ន​ធម្មនុញ្ញ​កំពូល​មួយ​ខ្ពស់​ជាង​ស្ថាប័ន​ជាតិ​ណាៗ​ទាំងអស់។

ប្រធាន​វេទិកា​ពលរដ្ឋ លោក គឹម សុខ បាន​សរសេរ​លើ​គណនី​ហ្វេសប៊ុក​របស់​លោក កាលពី​ថ្ងៃទី​១៤ កក្កដា ថា ការ​ធ្វើ​វិសោធនកម្ម​នេះ គឺ​មាន​គោលដៅ​ប្លន់​អំណាច​ឲ្យ​លោក ហ៊ុន ម៉ាណែត និង​ដាក់​រដ្ឋសភា​ជាតិ​ដែល​ជា​ស្ថាប័ន​តំណាង​ឱ្យ​ឆន្ទៈ​របស់​ប្រជាពលរដ្ឋ​ទៅ​ជា​កន្លែង​បញ្ឈរ​ជើង​អ្នក​តំណាងរាស្ត្រ​ទាំងអស់​ដែល​មកពី​គណបក្ស​កាន់​អំណាច ដែល​អ្នក​ទាំងនោះ​ត្រូវ​គេ​ចាត់ទុក​ថា​មិន​មែន​ជា​បក្ខពួក​របស់​មេដឹកនាំ​រដ្ឋាភិបាល​កម្ពុជា​ដែល​មាន​លោក ហ៊ុន សែន ជា​ជំហរ​ក្នុង​ពេល​បច្ចុប្បន្ន​នេះ។

កាលពី​ថ្ងៃទី​១៣ ខែ​កក្កដា ឆ្នាំ​២០២២ ក្រុមប្រឹក្សា​ធម្មនុញ្ញ​បាន​បើក​កិច្ចប្រជុំ​ពិនិត្យ​ទៅ​លើ​សេចក្តី​ព្រាង​វិសោធនកម្ម​រដ្ឋធម្មនុញ្ញ​ចំនួន ៨​មាត្រា ក្នុង​នោះ​មាន​មាត្រា​១១៩​ថ្មី មាត្រា​៨៩ និង​មាត្រា​៩៨​ថ្មី ជាដើម តាម​ការ​ស្នើសុំ​របស់​សភា​ឯក​បក្ស​របស់​លោក​នាយករដ្ឋមន្ត្រី ហ៊ុន សែន។

ជុំវិញ​បញ្ហា​នេះ រដ្ឋមន្ត្រី​ក្រសួង​យុត្តិធម៌ លោក កើត រិទ្ធ អះអាង​កាលពី​ថ្ងៃទី​១៤ ខែ​កក្កដា ឆ្នាំ​២០២២ នេះ​ថា រាល់​ការ​ធ្វើ​វិសោធនកម្ម​រដ្ឋធម្មនុញ្ញ គឺ​ដើម្បី​បំពេញ​ចន្លោះ​ខ្វះខាត​របស់​រដ្ឋធម្មនុញ្ញ និង​ដើម្បី​ធានា​ការពារ​នូវ​ឧត្តម​ប្រយោជន៍​ជាតិ​ទាំងមូល មិនមែន​ដើម្បី​ប្រយោជន៍​ក្រុម បក្ខពួក​ណា​មួយ​នោះ​ឡើយ។

យ៉ាងណាមិញ ប្រធាន​គណៈកម្មាធិការ​នាយក​គណបក្ស​ប្រជាធិបតេយ្យ​មូលដ្ឋាន បណ្ឌិត យ៉ង សាំងកុមារ បាន​សរសេរ​លើ​គណនី​ហ្វេសប៊ុក​របស់​លោក​នៅ​ថ្ងៃទី​១៥ ខែ​កក្កដា ឆ្នាំ​២០២២ នេះ​ថា ការ​ធ្វើ​វិសោធនកម្ម​រដ្ឋធម្មនុញ្ញ​ម្តង​នេះ គេ​អាច​មើល​ឃើញ​យ៉ាង​ច្បាស់​ពី​បំណង​របស់​មេដឹកនាំ​បក្ស​កាន់​អំណាច​ដែល​មាន​ផែនការ​កាត់បន្ថយ​អំណាច មុខនាទី និង​តម្លៃ​សភា​ជាតិ​ដែល​ជា​ស្ថាប័ន​តំណាង​ឱ្យ​ឆន្ទៈ​របស់​ប្រជាពលរដ្ឋ មិន​ឱ្យ​មាន​សិទ្ធិ​ក្នុង​ការ​បង្កើត​រដ្ឋាភិបាល​របស់​ខ្លួន។

មន្ត្រី​ជាន់ខ្ពស់​គណបក្ស​ប្រជាធិបតេយ្យ​មូលដ្ឋាន​រូប​នេះ​លើកឡើង​ថា គេ​អាច​យល់​បាន​ដោយ​ងាយ បើ​ប្រៀបធៀប​លើ​ខ្លឹមសារ​នៃ​មាត្រា​១១៩​ចាស់ ដែល​បាន​ចែង​ថា តាម​សេចក្តី​ស្នើសុំ​ពី​ប្រធាន​ដោយ​មាន​មតិ​ឯកភាព​ពី​អនុប្រធាន​ទាំង​ពីរ​នៃ​រដ្ឋសភា ព្រះមហាក្សត្រ​ទ្រង់​ចាត់តាំង​វរជន​មួយ​រូប​ក្នុង​ចំណោម​តំណាងរាស្ត្រ​នៃ​គណបក្ស​ឈ្នះ​ឆ្នោត​ឲ្យ​បង្កើត​រាជរដ្ឋាភិបាល។ ប៉ុន្តែ​ខ្លឹមសារ​ដែល​បាន​កែប្រែ​ថ្មី​នេះ បាន​ចែង​ផ្ទុយ​ពី​ខ្លឹមសារ​ចាស់​ទៅវិញ ដោយ​កំណត់​ថា តាម​សេចក្តី​ស្នើសុំ​ពី​គណបក្ស​ដែល​មាន​អាសនៈ​ច្រើន​ជាងគេ​ក្នុង​រដ្ឋសភា ព្រះមហាក្សត្រ​ទ្រង់​ចាត់តាំង​វរជន​មួយ​រូប​ជា​នាយករដ្ឋមន្ត្រី​ឲ្យ​បង្កើត​រាជរដ្ឋាភិបាល។

ក្នុង​ខ្លឹមសារ​នេះ បាន​បង្ហាញ​ពី​ការ​ប្រគល់​សិទ្ធិ​អំណាច​ទាំងស្រុង​លើ​មេដឹកនាំ​គណបក្ស​កាន់​អំណាច​ដែល​មាន​ចេតនា​បំបិទ​ចោល​នូវ​ការ​ជំទាស់​របស់​អនុប្រធាន​រដ្ឋសភា​ណា​មួយ​ដែល​អាច​កើតមាន​ទៅ​ថ្ងៃ​ក្រោយ។

បណ្ឌិត យ៉ង សាំងកុមារ ពន្យល់​ថា ចំពោះ​មាត្រា​៩៨ នៃ​រដ្ឋធម្មនុញ្ញ​ស្ដីពី​ញត្តិ​បន្ទោស​រាជរដ្ឋាភិបាល​ត្រូវ​បាន​លើកឡើង​ជូន​រដ្ឋសភា​ដោយ​តំណាងរាស្ត្រ​ចំនួន ៣០​នាក់ ប៉ុន្តែ​ការ​ធ្វើ​វិសោធនកម្ម​រដ្ឋធម្មនុញ្ញ​ថ្មី​នេះ​បាន​បង្កើន​ចំនួន​តំណាងរាស្ត្រ​ពី ៣០​នាក់​ទៅ​ជា ១​ភាគ​៣ វិញ ដែល​ស្មើ​នឹង​តំណាងរាស្ត្រ ៤២​នាក់​នៃ​តំណាងរាស្ត្រ​សរុប ១២៥​រូប​សព្វថ្ងៃ​នេះ។

មន្ត្រី​ជាន់ខ្ពស់​គណបក្ស​ក្រៅ​រដ្ឋាភិបាល​រូប​នេះ​អះអាង​ថា ការ​ធ្វើ​វិសោធនកម្ម​រដ្ឋធម្មនុញ្ញ​ក្នុង​ខ្លឹមសារ​ខាងលើ​នេះ បាន​ប៉ះពាល់​យ៉ាង​ខ្លាំង​ដល់​គោលការណ៍​ប្រជាធិបតេយ្យ​សេរី​ពហុបក្ស​តាម​បែប​សភា​និយម ជាពិសេស​តម្លៃ និង​អំណាច​នយោបាយ​នៃ​តំណាងរាស្ត្រ និង​រដ្ឋសភា​ជាតិ​នៃ​ប្រទេស​កម្ពុជា​ទាំង​ក្នុង​ពេល​បច្ចុប្បន្ន និង​នៅ​ពេល​អនាគត។

បណ្ឌិត យ៉ង សាំងកុមារ បញ្ជាក់​ថា ប្រជាពលរដ្ឋ​បោះឆ្នោត​ជ្រើសរើស​សមាជិក​រដ្ឋសភា​ជាតិ​ដើម្បី​រៀបចំ​រដ្ឋាភិបាល​ឱ្យ​ធ្វើ​ការ​បម្រើ​ប្រជាពលរដ្ឋ មិនមែន​បោះឆ្នោត​ជ្រើសរើស​នាយករដ្ឋមន្ត្រី​នោះ​ទេ។

រដ្ឋធម្មនុញ្ញ​កម្ពុជា​បាន​បង្កើត​ឡើង​កាលពី​ថ្ងៃទី​២៤ ខែ​កញ្ញា ឆ្នាំ​១៩៩៣ ដែល​ឡាយ​ព្រះហស្តលេខា​ឲ្យ​ប្រើប្រាស់​ជា​ផ្លូវការ​ដោយ​ព្រះបាទ នរោត្តម សីហនុ ដែល​បាន​ផ្ដួចផ្ដើម​ឡើង​ក្នុង​កិច្ចព្រមព្រៀង​សន្តិភាព​ទីក្រុង​ប៉ារីស ២៣ តុលា ឆ្នាំ​១៩៩១។

គិត​តាំងពី​ឆ្នាំ​១៩៩៤ មក រដ្ឋធម្មនុញ្ញ​កម្ពុជា​ត្រូវ​បាន​ធ្វើ​វិសោធនកម្ម ឬ​កែប្រែ​ចំនួន ៩​លើក​រួច​មក​ហើយ ប៉ុន្តែ​ត្រូវ​គេ​រិះគន់​ថា ការ​ធ្វើ​វិសោធនកម្ម​កន្លងមក​នោះ​សុទ្ធសឹងតែ​ដើម្បី​ការ​កេង​ចំណេញ​ផលប្រយោជន៍​ខាង​បក្ស​កាន់​អំណាច​ទាំងអស់៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស