32 C
Phnom Penh

លោក សុន ឆ័យ ស្នើ​តុលាការ​ឲ្យ​តម្កល់​ទុក​មិន​ចាត់ការ​បណ្ដឹង​បក្ស​ប្រជាជន​និង​គ.ជ.ប

ដោយ ឌឹ ខេមបូឌា ដេលី

បទវិភាគ

អនុប្រធាន​គណបក្ស​ភ្លើង​ទៀន ស្នើ​តុលាការ​ឲ្យ​តម្កល់​ទុក​មិន​ចាត់ការ​ចំពោះ​បណ្តឹង​របស់​គណបក្ស​ប្រជាជន​កម្ពុជា ដែល​ប្តឹង​ទារ​ប្រាក់​ជិត ១​លាន​ដុល្លារ​ពី​លោក​ពី​បទ «បរិហារកេរ្តិ៍​ជា​សាធារណៈ» និង​បណ្ដឹង​គណៈកម្មាធិការ​ជាតិ​រៀបចំ​ការ​បោះឆ្នោត ដោយ​ថា​អ្វី​ដែល​រូបលោក​បាន​និយាយ​ជា​រឿង​ពិត និង​មាន​ភស្តុតាង​ច្បាស់លាស់។

ការ​ស្នើ​របស់​លោក សុន ឆ័យ អំឡុង​ពេល​ដែល​ចូល​បំភ្លឺ​នៅ​សាលាដំបូង​រាជធានី​ភ្នំពេញ​ពាក់ព័ន្ធ​នឹង​បណ្ដឹង​របស់​គណបក្ស​ប្រជាជន​កម្ពុជា ដែល​ប្ដឹង​រូបលោក​ពី​បទ «បរិហារកេរ្តិ៍​ជា​សាធារណៈ» ក្រោយពី​លោក សុន ឆ័យ រិះគន់​រឿង​ភាព​មិន​ប្រក្រតី​នៃ​ការ​បោះឆ្នោត។

ប្រាប់​អ្នក​សារព័ត៌មាន​នៅ​មុខ​សាលាដំបូង​រាជធានី​ភ្នំពេញ លោក សុន ឆ័យ លើកឡើង​ថា បណ្ដឹង​គណៈកម្មាធិការ​ជាតិ​រៀបចំ​ការ​បោះឆ្នោត និង​បណ្ដឹង​គណបក្ស​ប្រជាជន​កម្ពុជា ដែល​ប្ដឹង​រូបលោក​មាន​លក្ខណៈ​ប្រហាក់ប្រហែល​គ្នា។ លោក​បញ្ជាក់​ថា សវនាការ​នា​ព្រឹក​នេះ តុលាការ​បាន​លើក​យក​ចំណុច​សំខាន់​មួយ​ចំនួន​ពាក់ព័ន្ធ​នឹង​ការ​រិះគន់​របស់​លោក​ក្នុង​បទសម្ភាសន៍​ជាមួយ​សារព័ត៌មាន ឌឹ ខេមបូឌា ដេលី។

លោក សុន ឆ័យ យល់​ថា បណ្ដឹង​ដែល​គណបក្ស​ប្រជាជន​កម្ពុជា និង គ.ជ.ប ប្ដឹង​រូបលោក វា​ជា​ការ​រៀបចំ​ឡើង ទោះបីជា​ការ​ប្ដឹង​មិន​មាន​ផលប្រយោជន៍​សម្រាប់​គណបក្ស​ប្រជាជន​កម្ពុជា និង​មិន​មាន​ផលប្រយោជន៍​សម្រាប់​គណបក្ស​ភ្លើង​ទៀន​ដែរ។ ករណី​នេះ លោក​បាន​ស្នើ​ទៅ​តុលាការ​ឱ្យ​តម្កល់​បណ្ដឹង​របស់​គណបក្ស​ប្រជាជន​កម្ពុជា និង​បណ្ដឹង​គណៈកម្មាធិការ​ជាតិ​រៀបចំ​ការ​បោះឆ្នោត​កុំ​ចាត់ការ ដោយ​ថា​ជុំវិញ​អ្វី​ដែល​រូបលោក​បាន​លើកឡើង​បន្ទាប់ពី​ទទួល​បាន​របាយការណ៍​ពី​សមាជិក​គណបក្ស​ភ្លើង​ទៀន​តាម​បណ្ដា​រាជធានី-ខេត្ត ដូច្នេះ​អ្វី​ដែល​រូបលោក​រិះគន់​នោះ​សុទ្ធតែ​មាន​ភស្តុតាង​ច្បាស់លាស់​ទាំងអស់។

លោក សុន ឆ័យ ថា​ការ​ស្នើ​បែប​នេះ បន្ទាប់ពី​បាន​បំភ្លឺ​ទាក់ទង​នឹង​អ្វី​ដែល​លោក​បាន​រិះគន់ និង​និយាយ​តាម​ប្រព័ន្ធ​ផ្សព្វផ្សាយ ប៉ុន្តែ​ការ​សម្រេច​បែប​ណា​នោះ នៅ​មិនទាន់​ដឹង​លទ្ធផល​នោះ​ទេ។

ចំណែក​ប្រធាន​គណបក្ស​ប្រជាធិបតេយ្យ​មូលដ្ឋាន លោក យ៉េង វីរៈ ដែល​មក​ឃ្លាំមើល​សវនាការ​លោក សុន ឆ័យ បាន​ប្រាប់​អ្នក​សារព័ត៌មាន​ថា ការ​ប្ដឹង​លោក សុន ឆ័យ ទៅ​តុលាការ​ដោយ​គ្រាន់តែ​រិះគន់​គណៈកម្មាធិការ​ជាតិ​រៀបចំ​ការ​បោះឆ្នោត​ពាក់ព័ន្ធ​នឹង​រឿង​ភាព​មិន​ប្រក្រតី រឿង​បោះឆ្នោត មិន​គួរ​កើត​មាន​ឡើង​ឡើយ។

លោក​ចាត់ទុក​បណ្ដឹង​គណៈកម្មាធិការ​ជាតិ​រៀបចំ​ការ​បោះឆ្នោត និង​គណបក្ស​ប្រជាជន​កម្ពុជា ដែល​ប្ដឹង​លោក សុន ឆ័យ ថា​ជា​រឿង​មិន​សម​ហេតុផល ហើយ​ថា​បណ្តឹង​នេះ​នឹង​ធ្វើ​ឱ្យ គ.ជ.ប និង​គណបក្ស​ប្រជាជន​កម្ពុជា រង​ការ​រិះគន់​បន្ថែម​ទៀត ខណៈ​បច្ចុប្បន្ន​កម្ពុជា​កំពុង​ជួប​បញ្ហា​វិបត្តិ​នយោបាយ​ហើយ​នោះ។

លោក​បង្ហាញ​ក្ដី​សង្ឃឹម​ថា សំណុំរឿង​លោក សុន ឆ័យ នឹង​ត្រូវ​បាន​បញ្ជាប់​ដោយ​មិន​មាន​ចំណាត់ការ​អាក្រក់​ណា​មួយ​បន្ថែម​ទៀត ហើយ​ករណី​នេះ​នឹង​មិន​កើតឡើង​ទៅ​លើ​គណបក្ស​នយោបាយ​ផ្សេងៗ​ទៀត។ មួយ​វិញ​ទៀត លោក​ថា​គណៈកម្មាធិការ​ជាតិ​រៀបចំ​ការ​បោះឆ្នោត និង​គណបក្ស​នយោបាយ គួរតែ​នាំគ្នា​ជជែក​រឿង​កែលំអ​ប្រព័ន្ធ​បោះឆ្នោត ជាជាង​មក​ប្ដឹង​គណបក្ស​នយោបាយ​ដែល​រិះគន់​ប្រព័ន្ធ​បោះឆ្នោត។

លោក​បញ្ជាក់​ថា គណបក្ស​ទាំងអស់​នេះ​ហើយ​ជា​តួអង្គ​សំខាន់​ក្នុង​ការ​ដំណើរការ​ប្រជាធិបតេយ្យ​នៅ​កម្ពុជា ដូច្នេះ​គណបក្ស​នយោបាយ​ទាំងអស់​គួរ​មាន​សិទ្ធិ​សេរីភាព​ក្នុង​ការ​ធ្វើ​សកម្មភាព​ឱ្យ​បាន​ពេញលេញ។

កាលពី​ថ្ងៃទី​១៤ ខែ​មិថុនា ឆ្នាំ​២០២២ មេធាវី​របស់​គណបក្ស​ប្រជាជន​កម្ពុជា គឺ​លោក គី តិច បាន​ដាក់​ពាក្យ​បណ្ដឹង​ទៅ​កាន់​តុលាការ​ប្រឆាំង​នឹង​លោក សុន ឆ័យ ដោយ​ក្នុង​បណ្ដឹង​នោះ លោក សាយ ឈុំ អនុប្រធាន​គណបក្ស​ប្រជាជន​កម្ពុជា និង​ជា​ប្រធាន​ព្រឹទ្ធសភា​ផង​នោះ បាន​ទាមទារ​សំណង​ជំងឺ​ចិត្ត​ពី​លោក សុន ឆ័យ ចំនួន ១​លាន​ដុល្លារ​អាមេរិក។

ក្រៅពី​បណ្ដឹង​គណបក្ស​ប្រជាជន​កម្ពុជា លោក សុន ឆ័យ ក៏​ត្រូវ​បាន​គណៈកម្មាធិការ​ជាតិ​រៀបចំ​ការ​បោះឆ្នោត​ប្ដឹង​ទៅ​តុលាការ​ពី​បទ «បរិហារកេរ្តិ៍​ជា​សាធារណៈ» និង​បាន​ទាមទារ​សំណង​ពី​លោក សុន ឆ័យ ចំនួន ១​លាន​ដុល្លារ ហើយ​ត្រូវ​ធ្វើ​លិខិត​សុំទោស​ជា​សាធារណៈ​ថែម​ទៀត ប៉ុន្តែ​លោក សុន ឆ័យ ប្រកាស​ជំហរ​នឹង​មិន​សុំទោស​នោះ​ទេ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស