កូនប្រុសច្បងរបស់បុរសខ្លាំងកម្ពុជា លោក ហ៊ុន សែន គឺលោក ហ៊ុន ម៉ាណែត ដែលជាបេក្ខជននាយករដ្ឋមន្ត្រី លើកឡើងថា ដើម្បីឱ្យជាតិខ្មែរមានឯករាជ្យ និងម្ចាស់ការលើខ្លួនឯងពិតប្រាកដ ខ្មែរមិនត្រូវឲ្យបរទេសមកជ្រៀតជ្រែកកិច្ចការផ្ទៃក្នុងរបស់ខ្លួនជាដាច់ខាត។
លោក ហ៊ុន ម៉ាណែត អះអាងកាលពីចុងសប្តាហ៍កន្លងទៅថា ការស្នេហាជាតិ និងការស្រឡាញ់ខ្មែរពិតប្រាកដ មិនមែនស្ថិតត្រឹមតែលើបបូរមាត់នោះទេ ប៉ុន្តែគឺត្រូវតែចេះបង្រួបបង្រួមគ្នា ពង្រឹងនូវសាមគ្គីភាព ហើយក៏មិនមែនស្រឡាញ់ជាតិខ្មែរព្រោះតែខ្លួនឯងត្រូវការអំណាចនោះដែរ។
លោកអះអាងថា ខ្មែរត្រូវតែរឹងមាំ ខ្មែរត្រូវតែខ្លាំង និងមានការឯកភាពជាតិខ្លួនឯង ទើបជារឿងត្រឹមត្រូវ មិនមែនចេះតែនាំគ្នាទៅហៅបរទេសឲ្យមកបំផ្លាញជាតិខ្មែរនោះឡើយ។ ដូច្នេះហើយបានជាគោលនយោបាយរបស់គណបក្សកាន់អំណាចតែងតែបញ្ជាក់ច្បាស់ថា ខ្មែរត្រូវតែរឹងមាំ និងត្រូវតែខ្លាំងជានិច្ច។
លោក ហ៊ុន ម៉ាណែត បញ្ជាក់ថា ខ្មែរត្រូវតែស្រឡាញ់ខ្មែរ ខ្មែរត្រូវតែជួយខ្មែរ ខ្មែរត្រូវតែពង្រឹងកូនខ្មែរឱ្យមានភាពម្ចាស់ការ និងរឹងមាំដោយខ្លួនឯង ទើបខ្មែរមានឯកភាពជាតិពិតប្រាកដ មិនត្រូវនាំគ្នាទៅហៅបរទេសឱ្យមកបំផ្លាញខ្មែរនោះទេ នេះទើបគេហៅថាស្រឡាញ់ជាតិខ្មែរដោយស្មោះត្រង់ពិតៗ។
ទោះជាបែបនេះក្តី សកម្មជនគណបក្សសង្គ្រោះជាតិ លោក ហ៊ុន កុសល បានប្រាប់សារព័ត៌មាន The Cambodia Daily នៅថ្ងៃទី១៨ កក្កដា នេះថា ការលើកឡើងរបស់លោក ហ៊ុន ម៉ាណែត ដែលថាមិនឲ្យបរទេសណាមកជ្រៀតជ្រែកកិច្ចការផ្ទៃក្នុងកម្ពុជានោះ គ្រាន់តែជាលេសដើម្បីបិទបាំងទង្វើដែលបក្សកាន់អំណាចកំពុងត្រូវគេរិះគន់ថាបានលម្អៀងការដឹកនាំរបស់ខ្លួនទៅរកមហាអំណាចកុម្មុយនីស្តចិន ដែលកំពុងតែធ្វើឲ្យប៉ះពាល់ដល់កិច្ចការផ្ទៃក្នុងរបស់កម្ពុជាសព្វថ្ងៃនេះតែប៉ុណ្ណោះ។
លោក ហ៊ុន កុសល អះអាងថា រដ្ឋាភិបាលកម្ពុជាក្រោមការដឹកនាំរបស់បក្សកាន់អំណាច ត្រូវបានពលរដ្ឋខ្មែរ និងមជ្ឈដ្ឋានអន្តរជាតិជាច្រើនកំពុងមើលឃើញថា លម្អៀងទៅរករដ្ឋាភិបាលកុម្មុយនីស្តចិន ដែលជាការបំពានរដ្ឋធម្មនុញ្ញរបស់កម្ពុជា និងបំពានលើស្មារតីនៃកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ យ៉ាងធ្ងន់ធ្ងរ ហើយក៏ជាមូលហេតុដែលនឹងធ្វើឲ្យកម្ពុជាអាចធ្លាក់ចូលទៅក្នុងការគ្រប់គ្រងរបស់ចិន លើភូមិសាស្ត្រនយោបាយទៅថ្ងៃអនាគតផងដែរ។
ទាក់ទិននឹងបញ្ហានេះ មេដឹកនាំបក្សកាន់អំណាច លោក ហ៊ុន សែន អះអាងនៅក្នុងសន្និសីទអន្តរជាតិលើកទី២៦ ស្ដីពីអនាគតអាស៊ី កាលពីថ្ងៃទី២០ ខែឧសភា ឆ្នាំ២០២១ ថា «បើមិនឲ្យលោកទៅពឹងចិន តើឲ្យលោកត្រូវពឹងបរទេសមួយណា ស្របពេលដែលជំនួយរបស់ចិនទាំងអស់បាននាំឱ្យកម្ពុជាមានភាពឯករាជ្យទាំងផ្នែកសេដ្ឋកិច្ច និងនយោបាយរបស់ខ្លួនរហូតមក»។
ទាក់ទិននឹងបញ្ហានេះ ក្រុមអ្នកឃ្លាំមើលសង្គម លើកឡើងថា បញ្ហានៃការជ្រៀតជ្រែកកិច្ចការផ្ទៃក្នុងរបស់កម្ពុជាពីមហាអំណាចកុម្មុយនីស្តចិន នៅតែជាប្រធានបទដ៏សំខាន់សម្រាប់ពិភពលោក និងក្នុងតំបន់ ព្រោះថាកម្ពុជានៅពេលនេះមិនមានភស្តុតាងជាក់ច្បាស់ណាមួយបង្ហាញថា ខ្លួនមិនបានពាក់ព័ន្ធនឹងកិច្ចសន្យាសម្ងាត់ជាមួយចិន អំពីមូលដ្ឋានទ័ពជើងទឹករាម ដែលគេបានសង្ស័យជាប់រហូតមកនោះទេ។
ប្រភពដដែលលើកឡើងថា តាមរយៈនៃការអះអាងរបស់លោក ហ៊ុន សែន ពីការពឹងពាក់ចិន និងសកម្មភាពជាច្រើនដែលបានសហការជាមួយចិន នាពេលកន្លងមក ដូចជាការវាយកម្ទេចអគារដែលជាជំនួយរបស់អាមេរិក ដោយជំនួសមកវិញនូវអគាររបស់ចិន នៅមូលដ្ឋានទ័ពជើងទឹករាម និងកម្ចីរបស់ចិនជាលក្ខណៈទ្វេភាគីដែលគ្មានតម្លាភាព ព្រមទាំងការចុះអនុសារណៈយោគយល់រវាងកងទ័ពជើងគោកកម្ពុជា និងចិន កាលពីពេលថ្មីៗនេះ ជាដើម គឺសុទ្ធសឹងតែជាមូលហេតុដែលបញ្ជាក់ថា កម្ពុជាទំនងជាមិនអាចចៀសផុតពីការជ្រៀតជ្រែកកិច្ចការផ្ទៃក្នុងរបស់ចិនក្នុងកម្រិតណាមួយនោះឡើយទៅថ្ងៃមុខ៕