សាលាដំបូងខេត្តកោះកុង សម្រេចផ្ដន្ទាទោសតំណាងសហគមន៍ដីធ្លីម្នាក់នៅឃុំជីខលើ ស្រុកស្រែអំបិល ខេត្តកោះកុង ឱ្យជាប់ពន្ធនាគារ ១ឆ្នាំ ក្រោមបទចោទប្រកាន់ «បរិហារកេរ្តិ៍ និងបង្កាច់កេរ្តិ៍» តាមបណ្ដឹងរបស់ក្រុមហ៊ុន ហេង ហ៊ុយ។
តំណាងសហគមន៍១៩៧ នៅភូមិតានី ឃុំជីខលើ ស្រុកស្រែអំបិល លោកស្រី ដេត ហួរ ត្រូវបានព្រះរាជអាជ្ញារងខេត្តកោះកុង លោក អេង ចាន់តារា កោះហៅឱ្យចូលបំភ្លឺនៅតុលាការកាលពីថ្ងៃទី១៤ ខែមិថុនា ឆ្នាំ២០២២ នេះ ក្រោមបទចោទ «បរិហារកេរ្តិ៍ជាសាធារណៈ» ទៅតាមបណ្ដឹងចោទប្រកាន់របស់ឧកញ៉ា ហេង ហ៊ុយ ជាមន្ត្រីនគរបាលជាន់ខ្ពស់ក្រសួងមហាផ្ទៃ និងជាប្រធានក្រុមហ៊ុន ហេង ហ៊ុយ អភិវឌ្ឍន៍ (Heng Huy Development Co., Ltd) និងមន្ត្រីនគរបាលជាន់ខ្ពស់នៅខេត្តកោះកុង។
នៅថ្ងៃទី២០ កក្កដា នេះ ចៅក្រមសាលាដំបូងខេត្តកោះកុង បានប្រកាសសាលក្រមផ្ដន្ទាទោសឱ្យតំណាងសកម្មជនដីធ្លី លោកស្រី ដេត ហួរ ឱ្យជាប់ពន្ធនាគារ ១ឆ្នាំ និងពិន័យជាប្រាក់ ២លានរៀល ក្រោមបទចោទប្រកាន់ «បរិហារកេរ្តិ៍ និងបង្កាច់កេរ្តិ៍» ក្រោយពីលោកស្រីបានបង្ហោះសារលើបណ្ដាញសង្គមពាក់ព័ន្ធនឹងរឿងជម្លោះដីធ្លីជាមួយក្រុមហ៊ុនឧកញ៉ា ហេង ហ៊ុយ។
តំណាងសហគមន៍ លោកស្រី ផាវ ញ៉ើង បានចាត់ទុកការសម្រេចរបស់តុលាការខេត្តកោះកុង ថាជារឿងអយុត្តិធម៌ និងជាការគំរាមកំហែងដល់សកម្មជនដីធ្លីផ្សេងទៀតដែលគ្រាន់តែបញ្ចេញមតិក្នុងករណីពួកគាត់កំពុងរងគ្រោះ ហើយគ្មានដំណោះស្រាយនោះ។
លោកស្រីបន្តថា អ្វីដែលលោកស្រី ដេត ហួរ បានបង្ហោះលើបណ្ដាញសង្គមនោះ វាជារឿងពិត ហើយការផុសនោះដោយសារពួកគាត់ឈឺចាប់ព្រោះជម្លោះដីធ្លីជាមួយលោក ហេង ហ៊ុយ បានកើតឡើងជាច្រើនឆ្នាំហើយ ប៉ុន្តែនៅមិនមានដំណោះស្រាយសម្រាប់ពួកគាត់។ លោកស្រីបង្ហាញការសោកស្ដាយចំពោះការសម្រេចរបស់តុលាការខេត្តកោះកុង ដោយថាការសម្រេចកាត់ទោសអ្នកដែលបាត់បង់ដី នឹងធ្វើឱ្យពលរដ្ឋអស់ជំនឿលើប្រព័ន្ធតុលាការ។
លោកស្រីបន្តថា ពួកគាត់បានរងគ្រោះដីធ្លីដោយសារអ្នកមានប្រាក់រំលោភយកដីធ្លីអស់ជាច្រើនឆ្នាំ ដោយមិនមានស្ថាប័នណាមួយជួយដោះស្រាយ ថែមទាំងមករងគ្រោះដោយប្រព័ន្ធយុត្តិធម៌បន្ថែមទៀត។
ចាប់តាំងពីពាក់កណ្ដាលឆ្នាំ២០១៩ មក ពលរដ្ឋចំនួន ១៩៧គ្រួសារមកពីឃុំជីខលើ និងជីខក្រោម បានឡើងមកតវ៉ានៅរាជធានីភ្នំពេញជាបន្តបន្ទាប់ ដើម្បីស្វែងរកអន្តរាគមន៍ពីក្រសួងរៀបចំដែនដី នគរូបនីយកម្ម និងសំណង់ ឱ្យជួយដោះស្រាយវិវាទដីធ្លី ដោយពួកគេចោទថា ក្រុមហ៊ុន ហេង ហ៊ុយ បានរំលោភយកដីធ្លីពួកគេតាំងពីឆ្នាំ២០០៧ ប៉ុន្តែការស្វែងរកកិច្ចអន្តរាគមន៍នេះត្រូវបានក្រសួងរៀបចំដែនដីបដិសេធដោះស្រាយ។
ក្រៅពីបដិសេធដោះស្រាយហើយ ក្រសួងរៀបចំដែនដី ក៏បានស្នើទៅអាជ្ញាធរពាក់ព័ន្ធឱ្យចាត់វិធានការផ្លូវច្បាប់ចំពោះអ្នកដែលក្រសួងថាបានញុះញង់ឱ្យពលរដ្ឋ ១៩៧គ្រួសារនោះឡើងមកតវ៉ាទៀតផង។
ពាក់ព័ន្ធជម្លោះដីធ្លីនេះដែរ ក៏មានតំណាងពលរដ្ឋ ៩នាក់នៅសហគមន៍ ១៩៧គ្រួសារ រួមមានអ្នកស្រី អិប តឹង អ្នកស្រី ដេត ហួរ អ្នកស្រី កើត នៅ អ្នកស្រី អ៊ិន ធូ លោក គង់ មែន និងតំណាងពលរដ្ឋផ្សេងទៀតកំពុងជាប់បណ្តឹងនៅតុលាការ ក្រោមបទចោទ «បរិហារកេរ្តិ៍ និងញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ទៅតាមបណ្ដឹងរបស់លោក ហេង ហ៊ុយ ប្រធានក្រុមហ៊ុន «ហេង ហ៊ុយ អភិវឌ្ឍន៍»៕