មន្ត្រីជាន់ខ្ពស់ធនាគារជាតិនៃកម្ពុជា ត្អូញត្អែរថា អតិផរណានៅកម្ពុជាបានកើនឡើងដល់ ៧,២% ក្នុងឆ្នាំ២០២២ ដែលជាកម្រិតខ្ពស់បំផុតក្នុងរយៈពេលជាង ១ទសវត្សរ៍ចុងក្រោយ បណ្ដាលមកពីវិបត្តិសង្គ្រាមរវាងរុស្ស៊ី និងអ៊ុយក្រែន ដែលបានជះឥទ្ធិពលលើតម្លៃប្រេងឥន្ធនៈ និងម្ហូបអាហារពិភពលោក។
ទេសាភិបាលធនាគារជាតិកម្ពុជា លោក ជា ចាន់តូ បានលើកឡើងក្នុងពិធីបិទសន្និបាតបូកសរុបលទ្ធផលការងារឆមាសទី១ ឆ្នាំ២០២២ របស់ធនាគារជាតិនៃកម្ពុជា កាលពីថ្ងៃទី២០ ខែកក្កដា ឆ្នាំ២០២២ ថា ក្រោមឥទ្ធិពលនៃការកើនឡើងថ្លៃប្រេង និងម្ហូបអាហារពិភពលោក អតិផរណានៅកម្ពុជាក៏បានកើនឡើងជាបន្តបន្ទាប់រហូតដល់ ៧,២% ក្នុងខែឧសភា ដែលជាកម្រិតខ្ពស់បំផុតក្នុងរយៈពេលជាង ១ទសវត្សរ៍ចុងក្រោយនេះ។
មន្ត្រីជាន់ខ្ពស់ធនាគារជាតិកម្ពុជារូបនេះលើកឡើងថា កាលណាតម្លៃប្រាក់រៀលធ្លាក់ចុះ នោះនឹងនាំឱ្យតម្លៃទំនិញ និងសេវានានាកើនឡើងភ្លាម។ ដូច្នេះ ក្នុងស្ថានភាពនេះ ធនាគារជាតិនៃកម្ពុជាបានថ្លឹងថ្លែងការអនុវត្តនយោបាយរូបិយវត្ថុ ដើម្បីគ្រប់គ្រងសម្ពាធអតិផរណាផង និងគាំទ្រការស្ដារកំណើនសេដ្ឋកិច្ចកម្ពុជាផងដែរ។
លោក ជា ចាន់តូ បញ្ជាក់ថា ការកើនឡើងនេះ គឺដោយសារការអូសបន្លាយនៃសង្គ្រាម និងការដាក់ទណ្ឌកម្មនានាទៅលើប្រទេសរុស្ស៊ី របស់មហាអំណាចពិភពលោកនាពេលកន្លងមក ទើបបណ្តាលឱ្យថ្លៃប្រេងឥន្ធនៈ និងម្ហូបអាហារពិភពលោកកើនឡើងជាលំដាប់នៅពេលនេះ ព្រោះថាប្រទេសរុស្ស៊ី និងអ៊ុយក្រែន ជាប្រទេសឈានមុខគេក្នុងការនាំចេញវត្ថុធាតុដើម ដូចជាប្រេងឥន្ធនៈ ឧស្ម័ន ជី និងផលិតផលកសិកម្ម ជាដើម។
កាលពីដើមខែមិថុនា ឆ្នាំ២០២២ រដ្ឋាភិបាលកម្ពុជាបានអះអាងថា ឆ្នាំ២០២២ នេះ កម្រិតអតិផរណាត្រូវបានប៉ាន់ស្មានថាអាចកើនឡើងក្នុងរង្វង់ ៥% ដោយសារការកើនឡើងខ្ពស់នៃតម្លៃប្រេងអន្តរជាតិ និងថ្លៃទំនិញផ្សេងៗដែលបង្កឡើងដោយសង្គ្រាមរវាងរុស្ស៊ី និងអ៊ុយក្រែន ប៉ុន្តែការប៉ាន់ស្មានរបស់រដ្ឋាភិបាលកម្ពុជានៅមានកម្រិតទាបជាងរបាយការណ៍ដែលចេញដោយធនាគារជាតិនៃកម្ពុជានៅឡើយ។
នាយកប្រតិបត្តិនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក មឿន តុលា បានប្រាប់ The Cambodia Daily ថា ប្រសិនបើរដ្ឋាភិបាលកម្ពុជាមានឆន្ទៈក្នុងការដោះស្រាយវិបត្តិជូនពលរដ្ឋ ទោះលទ្ធភាពមិនអាចដោះស្រាយបានទាំងស្រុង ក៏អាចកាត់បន្ថយបានមួយភាគធំដែរ ប៉ុន្តែប្រសិនបើរដ្ឋាភិបាលមិនមានលទ្ធភាព ឬគ្មានឆន្ទៈក្នុងការដោះស្រាយទេ នោះពួកគេនឹងទម្លាក់កំហុសទាំងនេះទៅលើសង្គ្រាមរុស្ស៊ី និងអ៊ុយក្រែនបន្តទៀតជាមិនខាន។
លោក មឿន តុលា អះអាងថា រដ្ឋាភិបាលអាចដាក់ចេញនូវវិធានការកាត់បន្ថយពន្ធនានាដែលជាផ្នែកមួយជួយបន្ធូរបន្ថយអតិផរណានេះឲ្យធ្លាក់ចុះមកវិញផងដែរ។ ជាងនេះទៀត រដ្ឋាភិបាលក៏អាចបង្កើតកម្មវិធីគាំទ្រអាជីវកម្មតាមស្ថានភាពជាក់ស្តែង ដោយផ្តល់ជាដើមទុនដើម្បីជួយអ្នកដែលងាយរងគ្រោះពីការហក់ឡើងនៃអតិផរណានេះ។
ចំណែកអតីតនាយកប្រតិបត្តិអង្គការអភិវឌ្ឍផ្នត់គំនិត លោក សេក សុជាតិ ក៏បានប្រាប់ The Cambodia Daily ថា រដ្ឋាភិបាលមិនមានសញ្ញាវិជ្ជមានណាមួយក្នុងការដោះស្រាយវិបត្តិនេះទេ ដោយសារតែឆន្ទៈ និងការប្ដេជ្ញាចិត្តរបស់មេដឹកនាំខ្មែរ និងមេដឹកនាំនយោបាយធំៗមួយចំនួនគ្មានចេតនាដោះស្រាយបញ្ហាជាតិ ពីព្រោះពួកគេគិតតែពីអំណាចខ្លួនឯង ជាជាងផលប្រយោជន៍ជាតិ និងពលរដ្ឋ។
លោក សេក សុជាតិ អះអាងថា មេដឹកនាំខ្មែរ និងមេដឹកនាំគណបក្សនយោបាយទាំងអស់គួរទម្លាក់ចោលការលាបពណ៌គ្នា ឈប់ស្វែងរកវិធីកម្ចាត់គ្នា ព្រោះការបែកបាក់បែបនេះនឹងធ្វើឲ្យកម្ពុជាក៏ដូចជាពលរដ្ឋខ្មែរកាន់តែជួបការលំបាក ហើយអាចប្រឈមជាមួយនឹងបញ្ហាធំៗជាច្រើនទៀតនៅពេលអនាគត។
អតីតនាយកប្រតិបត្តិអង្គការអភិវឌ្ឍផ្នត់គំនិតរូបនេះត្អូញត្អែរថា បញ្ហាធំៗសម្រាប់មេដឹកនាំខ្មែរ និងអ្នកនយោបាយខ្មែរមួយចំនួននៅពេលនេះ មិនមែនជាវិបត្តិសេដ្ឋកិច្ចជាតិ ឬអតិផរណាដែលកំពុងញាំញីកម្ពុជានៅពេលនេះទេ ប៉ុន្តែពួកគេកំពុងសម្លឹងរកច្រកបង្កើនអំណាចផ្តួលគ្នាប៉ុណ្ណោះ ដូច្នេះបើគ្មានវិបត្តិសកលនេះ ក៏កម្ពុជាកើតមានវិបត្តិដោយសារតែមេដឹកនាំបែបនេះដែរ៕