ប្រេសិតពិសេសរបស់ប្រធានអាស៊ាន អះអាងថា សមាជិកអាស៊ានទាំង៩ មិនអនុញ្ញាតឱ្យតំណាងរបបសឹកភូមា ចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ នៅចុងខែកក្កដា ឆ្នាំ២០២២ នេះទេ ដោយសារតែភូមាមិនទាន់បានអនុវត្តនូវកិច្ចព្រមព្រៀងជាឯកច្ឆន្ទ ៥ចំណុចរបស់អាស៊ានដែលបានសម្រេចនាពេលកន្លងមក។
ប្រេសិតពិសេសរបស់ប្រធានអាស៊ាន លោក ប្រាក់ សុខុន បានលើកឡើងក្នុងបទសម្ភាសន៍ជាមួយទីភ្នាក់ងារសារព័ត៌មានជាតិកម្ពុជា (AKP) កាលពីថ្ងៃទី២០ ខែកក្កដា ឆ្នាំ២០២២ ថា ដោយមានការបដិសេធពីសមាជិកអាស៊ាន រដ្ឋាភិបាលកម្ពុជាក្នុងនាមជាប្រធានអាស៊ានបានសម្រេចមិនអញ្ជើញតំណាងរបបសឹកភូមា លោក វ៉ុនណា ម៉ោងល្វីន ឲ្យមកចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធក្នុងទីក្រុងភ្នំពេញនៅចុងខែកក្កដា ឆ្នាំ២០២២ នេះទេ។
ការអះអាងនេះ ធ្វើឡើងបន្ទាប់ពីសមាជិកអាស៊ានទាំង៩ បានសម្រេចជាឯកច្ឆន្ទបដិសេធមិនឱ្យតំណាងរបបសឹកភូមា ចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ របស់ខ្លួននាពេលខាងមុខនេះ។
កិច្ចប្រជុំរដ្ឋមន្ត្រីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធ រួមមានសន្និសីទក្រោយកិច្ចប្រជុំរដ្ឋមន្ត្រីការបរទេសអាស៊ាន កិច្ចប្រជុំអាស៊ានបូក៣លើកទី២៣ កិច្ចប្រជុំកំពូលអាស៊ីបូព៌ាលើកទី១២ និងវេទិកាតំបន់អាស៊ានលើកទី២៩ ដែលនឹងត្រូវរៀបចំឡើងចាប់ពីថ្ងៃទី៣១ ខែកក្កដា រហូតដល់ថ្ងៃទី៦ ខែសីហា ឆ្នាំ២០២២ នៅក្នុងទីក្រុងភ្នំពេញដោយផ្ទាល់នាពេលខាងមុខនេះ។
លោក ប្រាក់ សុខុន បានអះអាងថា ចម្លើយរបស់របបសឹកភូមា គឺនៅតែដូចមុនដដែលថា ពួកគេនឹងមិនតែងតាំងអ្នកតំណាងមិនមែនកម្រិតនយោបាយឲ្យមកចូលរួមកិច្ចប្រជុំទាំងនេះទេ។ លោកបន្ថែមថា ទោះបីជាយ៉ាងនេះក្តី កៅអីរបស់មីយ៉ាន់ម៉ានៅអាស៊ាន គឺនៅតែរក្សាវត្តមានដដែល មិនត្រូវបានដកចេញនោះឡើយ។
រដ្ឋមន្ត្រីការបរទេសកម្ពុជារូបនេះអះអាងថា កម្ពុជានឹងរកវិធីយកប្រទេសភូមា មកចូលក្នុងអាស៊ានវិញឱ្យបាន បើទោះបីជាភូមាបានសម្រេចមិនបញ្ជូនតំណាងរបស់ខ្លួនឱ្យមកចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធក្នុងទីក្រុងភ្នំពេញនៅចុងខែកក្កដា ឆ្នាំ២០២២ នេះក៏ដោយ។
អនុប្រធានវេទិកាពលរដ្ឋ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី២២ កក្កដា ដោយរំឭកថា កាលពីលោក ប្រាក់ សុខុន ទៅទស្សនកិច្ចនៅប្រទេសភូមា កាលពីដើមខែកក្កដា ឆ្នាំ២០២២ គាត់អះអាងថា ដំណើរការចរចាសន្តិភាពដើម្បីបញ្ចប់វិបត្តិនៅប្រទេសភូមា គឺមានក្តីសង្ឃឹមហើយ ប៉ុន្តែនៅពេលនេះគាត់បែរជានិយាយថា របបសឹកភូមាមិនទាន់បានអនុវត្តកិច្ចព្រមព្រៀងជាឯកច្ឆន្ទ ៥ចំណុចរបស់អាស៊ានដែលបានសម្រេចឲ្យបានជឿនលឿនទៅវិញ។
លោក ម៉ែន ណាត លើកឡើងថា ការនិយាយដែលគ្មានភាពពិតប្រាកដរបស់លោក ប្រាក់ សុខុន បែបនេះ គ្រាន់តែជាមូលហេតុនាំឲ្យកម្ពុជាអស់កិត្តិយស និងបាត់បង់នូវតម្លៃរបស់ខ្លួនលើឆាកអន្តរជាតិប៉ុណ្ណោះ ហើយការនិយាយបែបនេះ គឺស្មើនឹងការកុហកពលរដ្ឋខ្មែរ កុហកពលរដ្ឋភូមា ព្រមទាំងកុហកមេដឹកនាំអាស៊ានដទៃទៀតដែលផ្តល់ក្តីសង្ឃឹមលើកម្ពុជាក្នុងការចូលទៅដោះស្រាយវិបត្តិភូមានៅពេលនេះផងដែរ។
អនុប្រធានវេទិកាពលរដ្ឋរូបនេះរិះគន់ថា លទ្ធផលនៃការដឹកនាំអាស៊ានរបស់កម្ពុជាអស់រយៈពេលប្រមាណជាកន្លះឆ្នាំមកនេះ បានត្រឹមតែបង្ហាញពីភាពកម្សោយនៃនយោបាយការទូតរបស់ខ្លួនទៅកាន់មេដឹកនាំអាស៊ានដទៃទៀត និងពិភពលោកប៉ុណ្ណោះ ដែលបញ្ហាបានបំបាក់មុខប្រទេសកម្ពុជាលើឆាកអន្តរជាតិយ៉ាងធ្ងន់ធ្ងរ។
ប្រេសិតពិសេសរបស់ប្រធានអាស៊ានមានតួនាទីត្រូវសម្រុះសម្រួលនៃដំណើរការរៀបចំកិច្ចសន្ទនាអាស៊ាន ត្រូវផ្តល់ជំនួយមនុស្សធម៌តាមរយៈមជ្ឈមណ្ឌលអាស៊ាន ដើម្បីសម្របសម្រួលជំនួយមនុស្សធម៌ និងគ្រប់គ្រងគ្រោះមហន្តរាយ (AHA) និងគោលការណ៍ចុងក្រោយ គឺតម្រូវឱ្យប្រេសិតពិសេសអាស៊ាន ធ្វើទស្សនកិច្ចនៅប្រទេសមីយ៉ាន់ម៉ា ដើម្បីជួបជាមួយភាគីពាក់ព័ន្ធទាំងអស់ផងដែរ ប៉ុន្តែកិច្ចព្រមព្រៀងទាំង ៥ចំណុចនេះ មិនត្រូវបានអនុវត្តនៅឡើយ៕